2Sam 14 - Hdi

Vradanaghata Avsalum da Ursalima

¹ Ka snaŋtá Yuʼav, zwaŋa Tseruya kazlay ta ndanu mgham ta ghəŋa Avsalum ta mgham kəʼa.

² Ka ghunaftá Yuʼav ta mndu da luwa Tekuwa da hgaktá sana marakw hada nda ɗifil ma ghəŋa ni, kaʼa nda tsi mantsa: « Pghava pgha ta lguta ŋəzu, ma masava ka ta rɗi, nza nza manda marakw ta nzəɗavata ta ŋza mnda ni ta mtuta.

³ Ka dzaʼa ka slanaghatá mgham ka mnanata ka ta gwaɗa dzaʼa yu mnaghata, » kaʼa. Ka balanustá Yuʼav ta gwaɗa ya dzaʼa tsa marakw ya mnay ŋa mgham.

⁴ Ka lagha tsa markwa la Tekuwa ya da mgham. Ka zləmbatá tsi zlumbruh ta haɗik, ka tsəlɓata, kaʼa mantsa: « Ta mblam ka hafa gha mghama ɗa, kata ta iʼi! » kaʼa.

⁵ Ka mgham zlghanaftá wi mantsa: « Nya na? » kaʼa. Ka tsa marakw ya mantsa: « Aʼ iy nda mta zəʼala ɗa, wadgu yu!

⁶ Iʼi kurɗa gha ná, si his zwana ɗa. Ka lmavaghatá həŋ ta lmu hista taŋ ma vwah, haɗ mndu ŋa dganatá həŋ wa. Ka dzuŋtá sani ta sani ka mtutá tsi.

⁷ Ka sliʼavaftá inda gwal ta uʼa ŋni ta ghəŋa kurɗa gha, ka həŋ mantsa: “Vlaŋna vla ta tsa ta dzatá zwaŋama ni ya! Ta kumay ŋni ta dzata ŋa pla hafa tsa zwaŋama ni dza tsi ya. Ta kumay ŋni ta zaɗanata, dər má si tsatsi má dzaʼa za həga!” ka həŋ. Manda tsaya, dzaʼa kɗiŋ kɗa həŋ ta kɗakwa kɗakwa skwi faf yu ta ghəŋ tida, ŋa zwaɗuta zivira zəʼala ini ta ghəŋa haɗik, » kaʼa.

⁸ Ka mgham nda tsa marakw ya mantsa: « Vra dzagha gha. Dzaʼa mnaf mna yu ta gwaɗa ta ghəŋa tsa gwaɗa gha ya, » kaʼa.

⁹ Ka tsa markwa la Tekuwa ya mantsa: « Rveri, mghama ɗa! Ta iʼi nda ya ta la da ɗa dzaʼa zləmbafta dmakwa ni, haɗ dmakwa mgham, nda dughurukwa ga mghama ni tani mida wu, » kaʼa.

¹⁰ Ka mgham mantsa: « Ka gwaɗgagha gwaɗa mndu, ka klagaghata ka da iʼi, haɗ dzaʼa gwaɗglaghafta wu, » kaʼa.

¹¹ Ka tsa marakw ya mantsa: « Ta mblam ka hafa gha mghama ɗa. Kdəkkdək, má ka havak hava mgham ka Yawe, Lazglafta ni, kada kwala mnda plamtá us sgəglanaghatá zaɗaku, dá kɗiŋtá lu ta tsa zwaŋa ɗa ya, » kaʼa. Ka Dawuda mantsa: « Ta waɗa waɗa yu nda hga Yawe nda hafu mida! Haɗ ya dər turtuk ma swida ghəŋa zwaŋa gha dzaʼa dɗagata ta haɗik wu, » kaʼa.

¹² Ka tsa marakw ya mantsa: « Kdəkkdək, vlaŋ vla ta tvi ta kurɗa gha ka mnəglanata tsi ta gwaɗa turtuk ta mghama ni, » kaʼa. « Mna! » kaʼa nda tsi.

¹³ Ka tsa marakw ya mantsa: « Kabgawu kəl kagha ka maganatá mndərga tsa skwi magiha lu ya ta mnduha Lazglafta na? Manda va ya mna mgham nda wa ni ná, gaga mgham ta dmaku nda ma kwalaghuta ni ta vranaktá mndu ya ghəzliŋ tsi.

¹⁴ Dzaʼa rwaku inda amu, ŋa nzakwa mu ka guram nda imi pgha lu ta haɗik kul haɗ ta tskəglavata. Ama va a Lazglafta ta zaɗiŋtá hafu wu, tsaya kəl tsi ka payaftá tvi ŋa vrakta inda gwal ghəzliŋ lu ta kəma ni.

¹⁵ Ndanana, ka sagha sa yu mananatá na skwiha na ŋa mghama ɗa katsi, vəl gaɗifta mnduha ta zləŋ ya. Ka iʼi kurɗa gha ma ghəŋa ɗa mantsa: “Ta kumay yu ta mnanatá mgham, kawayaka skwi dzaʼa magay kasiʼi mgham ta skwi dzaʼa mnata kurɗa ni.

¹⁶ Manda va tsa nzakwa ni, dzaʼa fana fa mgham ta sləməŋ ta kurɗa ni ŋa katapta ma dzva gwal ta zba zaɗaŋnata, zwaŋa ɗa nda iʼi tani ma skwa za həga mataba mnduha Lazglafta,” ka yu.

¹⁷ Kdəkkdək mghama ɗa! Ka kurɗa gha ma ghəŋa ni na: “Ka lɓiha lɓa gwaɗa mghama ɗa ta ŋuɗuf, kabga nda nza rveri, mgham ɗa manda duhwala Lazglafta, ŋa dganatá skwi ɗina nda ya kul ɗinaku,” ka yu. Ka nza Yawe, Lazglafta gha kawadaga nda kagha! » kaʼa.

¹⁸ Ka mgham zlghanaftá wi ta tsa marakw ya mantsa: « Ma ɗifiha ka ta sana skwi dər kiʼa ma skwi dzaʼa ɗawaghata yu, » kaʼa. « Ka mna mghama ɗa ta gwaɗa ni! » ka tsa marakw ya.

¹⁹ Ka mgham tama mantsa: « Yuʼav a ta tiŋwaftá kagha ŋa mna na gwaɗa na guli wu ri? » kaʼa. Ka tsa marakw ya mantsa: « Ta waɗa waɗa yu nda hafa gha, mgham, rvera ɗa, haɗ mndu dzaʼa laviŋtá mnay kazlay na: “Mantsa a wu” kəʼa nda ɗaway gha wa. Yuʼav kwalva gha ta mnaɗifta ŋa magay manda tsaya, tsatsi guli ta mnaɗiftá inda ni ŋa mnay.

²⁰ Nda nza ŋa maraŋtá skwiha nda təv sana tvi, kəl kwalva gha Yuʼav ka magata manda tsaya. Ama nda ɗifil ma ghəŋa rvera ɗa guli manda ŋa duhwala Lazglafta, ŋa snaŋtá inda skwi ta magaku ta haɗika ni, » kaʼa.

²¹ Tahula tsa, ka mgham laghwi mnanatá Yuʼav mantsa: « Ɗina tsa, dzaʼa magay yu manda ya mna ka. La tama vranaktá tsa duhwal Avsalum ya, » kaʼa.

²² Ka zləmbatá Yuʼav zlumbruh ta haɗik, ka tsəlɓatá tsi. Ka tfanagha tfa Lazglafta ta wi ta mgham, kaʼa. Kaʼa guli mantsa: « Iʼi kwalva gha, nda sna yu gita kazlay na mutsaf mutsa yu ta zɗakatahuɗi ta wa ira gha, mgham, rvera ɗa, ka si maga maga tsi manda tsa mna yu ya, » kaʼa.

²³ Ka sliʼaftá Yuʼav ka laghwi da Gesur, ka vraganaghatá tsi ta Avsalum da Ursalima.

²⁴ Ama ka mgham mantsa: « Ka la tsi dzagha ni, ma sagha tsi da kəma ɗa, » kaʼa. Ka laghu Avsalum dzagha ni, walaŋ a ta lagha da kəma mgham wa.

Tsuʼafta Dawuda ta Avsalum

²⁵ Ma inda Israʼila ná, haɗ mndu ta ghubu lu ta ɗinakwa ni taɓta Avsalum wa. Daga ta papaha səla dikw ta bɗəm, haɗ sana maslivinza tida wa.

²⁶ Ma kɗavakta vaku ta htsa tsi ta ghəŋ tazlay ndəgaŋər swidi. Ma htsanata swidi, ta graf gra ta ndəgakwa ni ta malay ta kiluʼ his taɓta gra ndəgakwa skwi ga mgham.

²⁷ Ka yayanatá lu ta Avsalum ta zwana zgwana hkən, nda makwa turtuk, Tamar hga ni. Kaka nda ɗinakwa tsa makwa ya.

²⁸ Ka zatá Avsalum ta vaku rəŋ rəŋ his ma Ursalima kul lagha da kəma mgham.

²⁹ Ka ghunaftá Avsalum ta mndu ŋa hganaktá Yuʼav ŋa ghunafta ni da mgham, ama ka kwalaghutá Yuʼav ta lagha da taŋ. Ka ghunəglaftá tsi ta sana mnda ghunay, ama kuma a ta lagha wa.

³⁰ Ka Avsalum tama nda kwalvaha ni mantsa: « Nda ngha kuni ta vwaha Yuʼav ta vata ŋa ɗa, mamu urz mida ya. Lawa la fiŋta nda vu, » kaʼa. Ka lab kwalvaha Avsalum fiŋtá tsa vwah ya nda vu.

³¹ Ka gi sliʼaftá Yuʼav ka lagha slanaghatá Avsalum ga taŋ, kaʼa nda tsi mantsa: « Kabgawu kəl kwalvaha gha ka fiŋtá vwaha ɗa na? » kaʼa.

³² Ka Avsalum zlghanaftá wi ta Yuʼav mantsa: « Ghunadap ghuna yu ta mndu ŋa hgaghakta da hadna. Ta kumay yu ta ghunaftá kagha da mgham, ŋa mnanatá mgham kazlay na: “Kabgawu kəl yu ka vragaghuta ma Gesur na? Ta draŋ ya má ta hada yu.” Ta kumay yu ndanana ta lagha da kəma mgham. Ala ka mamu krughuvi maga yu ta ksaftá iʼi ya, ka dzata tsi ta iʼi, ka yu, » kaʼa.

³³ Ka laghu Yuʼav da mnanatá mgham ta gwaɗa Avsalum. Ka hgadaghatá mgham ta Avsalum. Ka lagha tsi da mgham ka zləmbata zlumbruh ta kəma ni. Ka brusatá mgham ta Avsalum.