2Sam 13 - Hdi

Hanata Amnuŋ nda makwa da ni Tamar

¹ Lab la fitik tahula tsa, wya skwi ta magaku. Mamu makuma ni ma Avsalum, zwaŋa Dawuda ta ɗinuta katakata, Tamar hga ni. Ka ɗvutá Amnuŋ, zwaŋa Dawuda.

² Ka dzə tsi ta Amnuŋ ma vgha, ha ka ksuta ka ɗaŋwa dabga makwa da ni Tamar. Ta sna a tsa makwa ya ta zgun wu, ta nghə Amnuŋ ná, nda bla ka gavanavata ni.

³ Mamu sana gra Amnuŋ, Yunadav hga ni, zwaŋa Simgha, zwaŋama ni ma Dawuda. Kaka nda kuslemberakwa ni.

⁴ Ka ɗawaŋtá tsi da tsi, kaʼa mantsa: « Kabgawu ta kəl kagha ka nzata sgwama inda sərɗək, ta kagha ta nzakway ka zwaŋa mgham katək na? Va a ka ta mnay ŋa ɗa ra? » kaʼa. Ka Amnuŋ mantsa: « Tamar, makuma ni ma zwaŋa da ɗa Avsalum, ta tɗaghatá ŋuɗufa ɗa, » kaʼa.

⁵ Ka Yunadav nda tsi mantsa: « Hana hana ta ghəzləŋa gha manda mndu kul ɗughwanaku. Sagha da gha da ngha kagha ya, ka ka dazlay nda tsi na: “Wya dzvu, mnana mna ta makwa da ɗa Tamar ya, ka sagha tsi da magihatá skwa zay. Ka data tsi ta nghay ira ɗa, ka balaɗusta vərɗa tsatsi ta skwa zay,” » ka ka dazlay.

⁶ Ka hanatá Amnuŋ manda mndu kul ɗughwanaku. Ka lagha mgham da nghay. Ka Amnuŋ nda tsi mantsa: « Wya dzvu, mnana mna ta makwa da ɗa Tamar ya ka sagha tsi da dihata nghay ira ɗa ta gatu his, ka balaɗusta vərɗa tsatsi, » kaʼa.

⁷ Ka tsghaftá Dawuda ta lwi ŋa Tamar ma həga ga taŋ, kaʼa mantsa: « Wya dzvu, la da zwaŋa da gha Amnuŋ ya, ka maganata ka ta skwa zay, » kaʼa.

⁸ Ka lagha Tamar da zwaŋa da ni Amnuŋ ta hani ya kay. Ka tsəɗaʼatá tsi ta hpu, ka hwaɗamta, ka mbasafta, ka datá gatuha ta wa ira ni.

⁹ Ka klaftá Tamar ta tasaʼu ka pghanamta mida, ama ka kwalaghutá Amnuŋ ta zay, kaʼa mantsa: « Ka sliʼadap sliʼa inda mnduha hadna, » kaʼa. Ka sliʼagaghutá inda gwal si ta vata ni.

¹⁰ Ka Amnuŋ nda Tamar mantsa: « Klagam tsa skwa zay ya da dzuguvi, ka balaɗusta ka, » kaʼa. Ka klaftá Tamar ta tsa gatuha maga tsi ya, ka klədanamta zwaŋa da ni Amnuŋ ma dzuguvi.

¹¹ Ta gavadaghatá tsi ta vata ni ŋa vlaŋtá tsa skwa zay ya, ka ŋanatá Amnuŋ drus, kaʼa mantsa: « Sawi hanata nda iʼi, makwa da! » kaʼa.

¹² Ka Tamar mantsa: « Tsa a tsa zwaŋa da wa! Ma mag ka ta mbraku mbraku ŋa ɗa, kabga haɗ lu ta magay manda tsaya ma Israʼila wa! Ma mag ka ta mndəra tsaya ma mghama dmaku! » kaʼa.

¹³ « Ga dzaʼa ɗifaghuta yu da hula! Kagha guli, dzaʼa nzakway kagha ka tekw mataba la təkda ma Israʼila! Ta ndəɓa dzvu yu da kagha ndanana, mnana mna ta mgham, pyafta a ta nzakwa ɗa ka ŋa gha wu, » kaʼa.

¹⁴ Ama ka kwalaghutá Amnuŋ ta snanata, kabga mal ŋa ni mbraku, ka mbranaghatá tsi, ka kwihaptá tsi.

¹⁵ Tahula tsa, ka husaŋtá tsi ta Amnuŋ ka ghwaɗak ghwaɗak ka malglaghutá tsa ɗvuta ya si ɗvu tsi ya, kaʼa mantsa: « Sliʼaf sliʼa, laghu la gha! » kaʼa nda tsi.

¹⁶ Ka Tamar zlghanaftá wi mantsa: « Magava a tsaya wu, yaha na ghəzlay gha ta iʼi na malaghutá skwi ya ghada ka ta magata, » kaʼa. Ama ka kwalaghutá Amnuŋ ta snanata.

¹⁷ Ka hgadamtá tsi ta duhwal ta maganatá slna, kaʼa mantsa: « Ksidiŋ ksa ta vata iʼi ta na makwa na dzibil, ka haghuta ka ta tgha! » kaʼa.

¹⁸ Ka ksigiŋtá tsa duhwala Amnuŋ ya ka haghutá tgha. Sana sɗakw nda wirtsa ta vgha Tamar. Mndərga tsaya lgut ta suɗ kwagha mgham ma nzakwa taŋ ta ka daghali.

¹⁹ Ka dzamtá Tamar ta hutiɗif ma ghəŋ, ka kwahiŋtá tsa sɗakwa ni nda wirtsa ya. Ka pghamtá tsi ta dzvu ma ghəŋ ka laghwi nda wahu.

²⁰ Ka zwaŋama ni Avsalum nda tsi mantsa: « Hana hana zwaŋa da gha Amnuŋ nda kagha ra? Ndanana makuma ɗa, ma taw ka, zwaŋa da gha ya. Ma ndan ka katakata, » kaʼa. Ka nzatá Tamar ga zwaŋama ni Avsalum manda marakw vziŋ lu.

²¹ Ka snaŋtá mgham Dawuda ta inda tsa skwiha ta maguta ya, ka ɓasaftá tsi ta ŋuɗuf katakata.

²² Gwaɗgla a Avsalum ta gwaɗa nda Amnuŋ dər ma zɗaku dər ma ŋaslu wu, ama ta husaŋ husa ma ŋuɗufa ni, kabga badziŋta ni ta makuma ni Tamar.

Dzata Avsalum ta Amnuŋ ka hwayaghuta

²³ Tahula vaku his, ka pghatá Avsalum ta gwal gatsa swida tuwakha ni ma Baghalʼhatsur, ndusa nda luwa Ifrayim. Ka hagadaghatá tsi ta inda zwana mgham.

²⁴ Ka lagha Avsalum da slanaghatá mgham, kaʼa mantsa: « Wya dzvu rvera ɗa, mamu gwal gatsa swida tuwak ga kwalva gha. Ka sawi mgham nda kwalvaha ni da kwalva ni, » kaʼa.

²⁵ Ka mgham nda Avsalum mantsa: « Mantsa a zwaŋa ɗa wa! La a ŋni demdem da ghuni wu, da nzakw tsi ka dzata kagha ta htsiŋ, » kaʼa. Ka mbrəh Avsalum ka ŋɗaŋɗa, va a mgham ta dzaʼa wu, ama ka tfanaghata tsi ta wi.

²⁶ Ka Avsalum mantsa: « Ka si va a kagha ta dzaʼa wu, vlaŋ vla ta tvi ta zwaŋa da ɗa Amnuŋ, ka dzaʼa tsi mista ŋni, » kaʼa. Ka mgham nda tsi mantsa: « Kabgawu dzaʼa kəl tsi ka dzaʼa mista gha na? » kaʼa.

²⁷ Ama ka gəval Avsalum ka ŋɗaŋɗa. Ka zliŋtá mgham ta Amnuŋ nda inda sanlaha ma zwana ni ŋa dzaʼa mista ni.

²⁸ Wya ká Avsalum mnanaftá duhwalha ni: « Ka fata kuni ta iri ɗina! Ka ngha kuni ta fitika zɗafta ŋuɗufa Amnuŋ dabga ima inabi ya, dzaʼa mnaghuna mna yu ŋa dzata ghuni! Yaha kuni da zləŋa dzata. Iʼi a ta mnaghunafta wu ra? Ka drafta kuni ta ŋuɗuf nda tatá us tiri, » kaʼa.

²⁹ Ka dzatá duhwalha Avsalum ta Amnuŋ manda ya mnanaf Avsalum ta həŋ. Ka sliʼaftá pɗakwa zwana mgham tama ka ŋlaftá dər wati ma həŋ ta plisa ghwandala ni ka hwahwayaghuta.

³⁰ Tata tvi həŋ, ka snanaghatá tsi ta Dawuda kazlay: « Rwana rwa Avsalum ta zwana mgham demdem, haɗ ya ta pɗata dər turtuk nda hafu wu, » kəʼa.

³¹ Ka sliʼaftá mgham, ka kwahiŋtá lguta ni, ka hanata ta haɗik. Ka kwahiŋtá inda kwalvaha ni ta sladu hada ta lgut ta vgha taŋ guli.

³² Ka Yunadav, zwaŋa Simgha, zwaŋama ni ma Dawuda mantsa: « Yaha mghama ɗa da ndanay kazlay inda zwana mgham rwana lu kəʼa. Nziya nza tsi ná, Amnuŋ yeya nda mta. Kura kura Avsalum ta plamta daga baɗ tsa ɓadziŋta Amnuŋ ta makuma ni Tamar ya kay.

³³ Ndanana, yaha mgham, rvera ɗa klafta ma ndana ni kazlay inda zwana mgham nda rwa kəʼa! Mantsa ya a wu, Amnuŋ turtukwa ni ya ta mtuta, » kaʼa.

³⁴ Ka hwayaghutá Avsalum. Tsaw mamu sana duhwal fa lu ŋa nghapta ta wa lilwa, ka klaŋtá tsi ta ghəŋ. Ka nghaŋtá tsi ta bakwa mnduha nda ndəgha ta lagha nda ta sana tvi nda ga mahulhula ni, nda ta vata ghwá.

³⁵ Ka Yunadav nda mgham mantsa: « Wa a zwana mgham ta sliʼagaghata! Magu maga skwi manda va tsa mnə kwalva gha ya kay! » kaʼa.

³⁶ Tata kɗay kɗay ta gwaɗa, ta sliʼadaghatá zwana mgham, ka wahu həŋ ta wahu nda lwi dagala dagala. Ka wahu mgham nda kwalvaha ni demdem guli ta wahu katakata.

³⁷ Ka hwayaghatá Avsalum ka laghwi da Talmay, zwaŋa Ghamihut, mghama la Gesur. Ka gɗatá Dawuda ta tawa zwaŋa ni Amnuŋ inda fitik.

³⁸ Hwayaghata Avsalum ka laghwi da Gesur ná, ka zatá tsi ta vaku hkən hada.

³⁹ Lɓatá ŋuɗufa mgham Dawuda ta ghəŋa mtatá Amnuŋ, ka ksaŋtá mamaya Avsalum.