2Sam 12 - Hdi

Mnanaŋta Nataŋ ta krughuva Dawuda

¹ Ka ghunaftá Yawe ta anabi Nataŋ da Dawuda. Ka lagha tsi slanaghata, kaʼa nda tsi mantsa: « Mamu sana mnduha his ma luwa turtuk, ka pɗu sani, ka gadghəl sani.

² Nda ndəgha rina fisik nda slaha tsa gadghəl ya.

³ Haɗ skwa tsa pɗu ya ɗekɗek wu, ta ghəŋa zwaŋa daɓala tuwak kiʼa yeya si skwa tsi. Ka nuʼu tsi. Ka glaku tsi ga taŋ kawadaga nda zwana ni. Ɓlesata skwa zay ni ta zə tsi ŋa ni, ta leghwa ta kəl tsi ka sa imi, ta sa tsi ta imi ŋa ni, kawadaga ta hana tsi nda tsi. Ka nzatá tsi manda makwa ni.

⁴ Ma sana fitik, ka lagha mayəm da tsa gadghəl ya, ama kumaf a tsa gadghəl ya ta ksaŋtá rina fisika ni ka slaha ni a tsi, ŋa hnanatá tsa mayəm ta lagha da taŋ ya wa. Ka lagha tsi ksagaghutá tsa zwaŋa daɓala tuwak tsa pɗu ya kay, ka hnanatá tsa mndu ta lagha da taŋ ya, » kaʼa.

⁵ Ka gufaftá ŋuɗufa Dawuda katakata ta ghəŋa tsa mndu ya, kaʼa nda Nataŋ mantsa: « Ta waɗa waɗa yu nda hga Yawe nda hafu mida. Tsa mndu ta magatá tsaya ná, raŋra dzata!

⁶ Tsa zwaŋa daɓala tuwak ya ná, ka skwi fwaɗ dzaʼa planamta tsi, dabga vəl magata ni ta skwi manda tsaya kul tawaŋtá hiɗahiɗa dər ka kiʼa ya, » kaʼa.

⁷ Ka mnanaŋtá Nataŋ ta Dawuda, kaʼa mantsa: « Kagha tsa mndu ya! Wya ka Yawe, Lazglafta la Israʼila: “Iʼi ta zbaptá kagha nda ma pghaghaghatá rɗi ŋa nzakwa gha ka mghama la Israʼila, ka kataptá yu ta kagha ma dzva Sawulu.

⁸ Vlagha vla yu ta la ma həga ga daŋahəga gha, ka pghamtá yu ta miʼa ni ma ghuva gha. Vlagha vla yu ta ga mgham ta ghəŋa la Israʼila nda la Yuda. Ka si nda hta tsaya, má dzaʼa sgaghagha sga yu ka malaghutá tsaya.

⁹ Kabgawu kəl ka ka hərtətatá gwaɗa Yawe, nda ma magatá ghwaɗaka skwi ta wa ira ni na? Dza dza ka nda kafay ta Uriya, mnda la Het, dza dza ka nda kafaya la Ghamuŋ, ka klutá ka ta markwa taŋ ka markwa ghuni.

¹⁰ Ndanana tama, ya hərtəta hərtəta ka ta iʼi, ka klutá ka ta markwa Uriya, mnda la Het ka markwa ghuni ya, haɗ lu dzaʼa pɗatá ma həga ga ghuni ɗekɗek ta mataray wu,” kaʼa.

¹¹ Ka Yawe guli na: “Dzaʼa klaghak kla yu ta badzaku, ma vərɗa həga ga ghuni dzaʼa saba tsa badzaku ya. Dzaʼa hlaf hla yu ta wa ira gha ta miʼa vərɗa kagha ka vlaŋtá sana mndu. Dzaʼa hanay tsa mndu ya ta hani nda tsa miʼa gha ya ga fitik ta daɓi dɗay.

¹² Kɗekkɗek magata kagha ta ŋa gha, ama iʼi, ta kəma la Israʼila demdem, nda fitik dɗay dzaʼa magata yu,” » kaʼa.

¹³ Ka Dawuda nda Nataŋ mantsa: « Gana ga yu ta dmaku ta Yawe! » kaʼa. Ka Nataŋ nda tsi mantsa: « Plagha pla Yawe ta dmakwa gha, mtuta a ka wa.

¹⁴ Nziya nza tsi, fitika hərtətata gha katakata ta Yawe nda ma magata gha ta tsa skwi ya, dzaʼa mtu mta tsa zwaŋ yagha lu ya, » kaʼa.

¹⁵ Ka vraghutá Nataŋ dzagha ni. Ka dzuŋtá Yawe ta tsa zwaŋ yana markwa Uriya ta Dawuda ya, ka ksaftá ɗaŋwa ka kuzla.

Mtuta zwaŋa Batʼseva

¹⁶ Ka ndəɓu Dawuda ta dzvu da Lazglafta ta ghəŋa tsa zwaŋ ya, ka sum tsi ta suma. Laghwa ni dzagha, ka hanatá tsi ɓərgədaʼ ta haɗik patsuweɗ vli.

¹⁷ Ka sliʼadaghatá la galata mndu ga taŋ da mbərhay ŋa sliʼafta ni, ama ka kwalaghutá tsi, zaŋ a ta skwa zay kawadaga nda həŋ wa.

¹⁸ Baɗ mandəfáŋa fitik, ka mtuta tsa zwaŋ ya. Si ka zləŋaftá kwalvaha Dawuda ta mnanaŋta kazlay na nda mta tsa zwaŋ ya kəʼa, kabga ka həŋ ma ghəŋa taŋ na: « Ma fitika nzakwa tsa zwaŋ ya ta ndiri, ka gwaɗ mu ta gwaɗa nda tsi ná, va a ta snay wa. Waká mu dzaʼa walaŋta mnay ŋa ni kazlay nda mta tsa zwaŋ ya kay kəʼa? Dzaʼa baluv bala ta vgha, » ka həŋ.

¹⁹ Kəʼa ka Dawuda ná, ka nghaŋtá tsi ta kwalvaha ni ta dzədzərkaku mataba taŋ, ka graftá tsi kazlay nda mta tsa zwaŋ ya kəʼa. Ka ɗawaŋtá tsi da həŋ: « Nda mta tsa zwaŋ ya ra? » kaʼa. « Aŋi, nda mta, » ka həŋ.

²⁰ Ka sliʼaftá Dawuda ta haɗik, ka mbazaghutá tsi ta mbaza, masavaha ta rɗi, mbəɗapha ta lgut. Ka lam tsi ta həga Yawe ka tsəlɓata. Vradaghata ni dzagha, vlihawa vla ta skwa zay ya kəʼa, ka zutá tsi.

²¹ Ka kwalvaha ni nda tsi mantsa: « Nahgani kəl ka ka magay manda na katək na? Ma fitika nzakwa tsa zwaŋ ya ta ndiri ná, si ta suma ka, ka taw dabga ni. Ndanana manda mtata ni ná, ka sliʼaftá ka, ka za skwa zay! » ka həŋ.

²² Kaʼa zlghanaftá wi ta həŋ mantsa: « Ta ma nzakwa tsa zwaŋ ya ta ndiri ná, si ta suma yu, si ta taw yu, kabga ka yu sizlay na: “Wa nda sna, kawayaka skwi dzaʼa tawa tawa Yawe ta hiɗahiɗa ta iʼi ŋa zlaŋta ni ta tsa zwaŋ ya nda hafu,” ka yu sizlay.

²³ Ama ndanana, nda mta. Kabgawu dza sumugəlta yu ta suma na? Ta dzaʼa laviŋ lava yu ta vraganapta ra? Iʼi katək ta dzaʼa da slanaghata, ama tsatsi vrəglagafta a nda da iʼi wu, » kaʼa.

Yatá Salumuŋ

²⁴ Ka gatanatá Dawuda ta markwa taŋ Batʼseva. Ka lam tsi da tsi, ka hanata nda tsi. Ka yanatá tsi ta zwaŋa zgun, ka tsanaftá tsi ta hga ni ka Salumuŋ. Ka ɗvutá Yawe,

²⁵ ka tsəghaftá tsi ta lwi nda ma wa anabi Nataŋ ŋa tsanaftá hga ni ka Yədidəya, dabga ɗvuta Yawe.

Zata Dawuda ta luwa Raba

²⁶ Ma tsa fitik ya, ka liŋtá Yuʼav ta Raba, wudəma la Ghamuŋ nda vulu, ka zluʼatá tsi ta vla ga mgham.

²⁷ Ka ghunaftá Yuʼav ta gwal ghunay da Dawuda, kaʼa mantsa: « Liŋ la yu ta luwa Raba, klaghu kla yu ta vli ta mutsə həŋ ta imi.

²⁸ Ndanana tama, tskana tska ta pɗakwa sludziha, ka sagha ka fatá ghuɓa gha ta hula luwa ka wanafta, ka zata ka. Ka vərɗa iʼi katsi klaghuta ná, dzaʼa nuna glaku ka ŋa ɗa, » kaʼa.

²⁹ Ka tskanatá Dawuda ta sludziha demdem, ka laghu həŋ liŋtá luwa Raba, ka dɗanaghatá tsi, ka klaghutá tsi.

³⁰ Ka klaptá Dawuda ta salawara ga mgham ma ghəŋa mghama taŋ, ka fanamtá lu ma ghəŋ. Tsa salawar ya ná, magaf nda dasu ta maga kiluʼ hkən mbsak lu, ka tsərslaptá gata ni nda palaha ɗina ɗina. Ka hlaghatá tsi guli ta skwa zləɗu dagala si ma tsa luwa ya.

³¹ Ka kasaghatá tsi ta mnduha ma tsa luwa ya, ka pghamtá həŋ tkweʼ da maga slna nda zarta, nda kalək, nda ya nda slpaɗa, ka pghamtá həŋ ka gwal tsatsa brik a tsi. Ka mag tsi manda tsaya ŋa inda luwaha la Ghamuŋ. Tahula tsa, ka vraghatá Dawuda da Ursalima kawadaga nda inda sludziha ni.