2Sam 11 - Hdi

I Dawuda nda Batʼseva

¹ Sagha sana vaku, ta fitika saba mghamha da vulu, ka ghunaftá Dawuda ta Yuʼav, nda kwalvaha ni, nda inda sludziha la Israʼila. Ka zaɗanatá həŋ ta la Ghamuŋ, ka fatá həŋ ta ghuɓa taŋ ta hula luwa Raba ka ŋamta nda vulu. Ama ta nzaghutá Dawuda ma Ursalima.

² Ma sana fitik ga hawu, ka sliʼaftá Dawuda ta ghəzləŋa ni, ka wawaku ta dədmata ghəŋa həga ga mghama ni. Daga hada, ka nghagatá tsi ka sana marakw ta mbazuta mbaza ni, kaka nda ɗinakwa ni.

³ Ka ghunaftá Dawuda ta mndu ŋa ɗawaŋta ka wa tsa marakw ya. « Batʼseva, makwa Iligham, markwa Uriya, mnda la Het a ra? » ka lu nda tsi.

⁴ Ka ghunaftá Dawuda ta gwal ghunay klanakta. Ka sagha tsi da tsi, ka hanatá tsi nda tsi. Tsaw ghuɓata ni yeya ta skwi ta tsaɗ lu tida. Tahula tsa, ka vraghatá tsi dzagha.

⁵ Ka zlghaftá tsa marakw ya ta huɗi, ka ghunaftá tsi ta mndu snanamtá Dawuda kazlay na: « Nda huɗi yu, » kaʼa.

⁶ Ka tsəghadaptá Dawuda ta lwi ŋa Yuʼav, kaʼa mantsa: « Ghunaɗik ghuna ta Uriya mnda la Het ya, » kaʼa. Ka ghunanaktá Yuʼav ta Uriya tama ta Dawuda.

⁷ Ka sagha Uriya da tsi. « Ta ɗughwana i Yuʼav nda sludziha rki? Kinawu ka tsa vulu ya? » ka Dawuda ɗawaŋta da tsi.

⁸ Ka Dawuda guli mantsa: « La tɗaptá vgha mintgha gha, » kaʼa. Ka saghu Uriya ga mgham, ka zbiŋtá lu nda mbəhu si da mgham.

⁹ Ama ka hanaghutá Uriya ta wa tgha ga mgham kawadaga nda inda sludziha mghama ni, laghu a dzagha ni wa.

¹⁰ Ka lagha lu mnanatá mgham kazlay na: « Laghu a Uriya dzagha ni wu, » kəʼa. Ka Dawuda nda Uriya mantsa: « Sagha ma vli diʼiŋ ka, kabgawu kwal ka laghu dzagha na? » kaʼa.

¹¹ Ka Uriya nda Dawuda mantsa: « Nda akwata dzratá wi tani, nda la Israʼila tani, nda la Yuda tani, ma dumbi nzanzata həŋ. I mala ɗa Yuʼav nda sludziha mghama ɗa ná, waʼa həŋ ma ghuɓu ma mtak ta wa vulu. Waká iʼi dzaʼa laghwi dzagha da zazaku, da sasaku, da han nda markwa ini! Ta waɗa waɗa yu nda hafa mgham, haɗ yu dzaʼa maga tsaya wu, » kaʼa.

¹² Ka Dawuda nda Uriya mantsa: « Nzəgla nza hadna gita, ŋa zlighista ɗa mahtsim, » kaʼa. Ka nzatá Uriya ma Ursalima baɗ tsaya, nda ya ga mahtsima ni.

¹³ Ka hgadaghatá Dawuda da za skwa zay nda sa skwa say, ka ghuyaftá tsi. Ka sab Uriya ka laghwi ta ghəzləŋa ni kawadaga nda kwalvaha mgham, ama laghu a dzagha ni wa.

¹⁴ Tsaɗakwa vli, ka vindanaftá Dawuda ta ɗelewer ta Yuʼav, ka tsghafta nda ma dzva Uriya.

¹⁵ Wya kəʼa vindafta: « Ka fata ka ta Uriya ta wa nzəvatá vulu. Ka gavaghuta kaghuni nda ga mahulhula ni ŋa slafta skwi tida, ka mtuta tsi, » kaʼa.

Dzata Dawuda ta Uriya, zəʼala Batʼseva

¹⁶ Ta fitika nghay Yuʼav ta luwa, ka fatá tsi ta Uriya ma vli ya graf tsi kazlay ka bikwira vulu na mnduha na kəʼa.

¹⁷ Ka sliʼagaptá gwal ma luwa da gəmata nda Yuʼav. Nda rwa sanlaha mataba sludziha Dawuda, nda mta Uriya, mnda la Het guli.

¹⁸ Ka ghunaftá Yuʼav ta mndu da Dawuda, ka rusanaftá inda skwi ta magaku ma vla vulu.

¹⁹ Kaʼa mnanaftá tsa mndu ghunaf tsi ya na: « Manda kɗakwa gha ta rusanaftá mgham ta inda skwi ta magaku ma vla vulu,

²⁰ kawayaka skwi dzaʼa gufaf gufa ŋuɗufa ni, ŋa mnay ni ŋa gha kazlay na: “Kabgawu kəl kuni ka gavadaghata ndusa nda luwa da vulay na? Sna a kuni kazlay ta haga ha lu ta hava nda ta matsak kəʼa ra?

²¹ Wa ta dzatá Avimelek, zwaŋa Yerubeset na? Marakw a ta vzəganaghatá dughura buna dagala nda ta matsak wu ra? Manda tsaya a mtuta tsi ma Tevets wu ra? Kabgawu kəl kaghuni ka gavadaghata ndusa nda matsak na?” ka kəʼa ya, mantsa tama ka ka dzaʼazlay nda tsi na: “Nda mta kwalva gha Uriya, mnda la Het ya guli,” ka ka dzaʼazlay, » kaʼa.

²² Ka sliʼaftá tsa mndu ya ka laghwi rusanaftá Dawuda ta inda skwi ghunaf Yuʼav dá mnay ya.

²³ Ka tsa mnda ghunay ya nda Dawuda mantsa: « Malaghu mala tsa mnduha ya ta mbrakwa ŋni, ka sliʼagaptá həŋ dɗaŋnaghata ma mtak, ama ka ghəzladaghatá ŋni ta həŋ ha ta wa tgha tsa luwa ya.

²⁴ Ka pghagatá gwal vulu ta hava ta aŋni nda ta wa matsak, nda rwa sanlaha ma sludziha mgham, nda mta kwalva gha Uriya, mnda la Het ya guli, » kaʼa.

²⁵ Ka Dawuda nda tsa mnda ghunay ya mantsa: « Wya ka ka da mnanatá Yuʼav: “Yaha ka ghuya ghəŋa gha nda skwi ta maguta, kabga ma vulu ná, ta balay kafay ta sani ka sani a tsi da haɗik. Lagha la nda kuzla nda kuzla liŋtá tsa luwa ya ka zaɗanata ka.” Mantsa ya ka ka da vlaŋtá mbraku, » kaʼa.

²⁶ Ka snaŋtá Batʼseva, markwa Uriya ta mtata zəʼala taŋ, ka tawamtá tsi.

²⁷ Manda hlatá taw, ka ghunaftá Dawuda ta mndu da tsi ŋa klagaghuta da taŋ. Ka nzakw tsi ka markwa taŋ, ka yanatá tsi ta zwaŋa zgun. Ama zɗəgana a tsa skwi maga Dawuda ya ta Yawe wa.