2Sam 1 - Hdi

Snaŋta Dawuda ta mtatá Sawulu

¹ Mtu mta Sawulu. Tahula zata Dawuda ta ghwa ta ghəŋa la Ghamalek, ka vradaghatá tsi nzata ma Tsiklag ka fitik his.

² Ta mahkəna fitik, ka lagha sana mndu si ma ghuɓa Sawulu nda kwahatá lgut ta vgha, klubuŋ ghəŋa ni ka haɗik ka ŋizla nzakwa ni ta taw. Ɓhadaghata ni ta kəma Dawuda, ka zləmbatá tsi zlumbruh ta haɗik ka tsəlɓata.

³ Ka Dawuda ɗawaŋta da tsi mantsa: « Si ga ka na? » kaʼa. Kaʼa nda tsi mantsa: « Hwayap ma ghuɓa la Israʼila yu, » kaʼa.

⁴ Ka Dawuda mantsa: « Nya ta magaku na? Mniha mna! » kaʼa. Ka tsa mndu ya mantsa: « Hwayaf hwaya la Israʼila ma ghwata vulu, nda ndəgha mnduha ta rwuta. Nda rwa dər i Sawulu nda zwaŋa ni Yunataŋ, » kaʼa.

⁵ Ka Dawuda nda tsa duhwal ta rusay ŋa ni ta tsa gwaɗa ya mantsa: « Kinawu grafta kagha kazlay nda rwa i Sawulu nda zwaŋa ni Yunataŋ kəʼa na? » kaʼa.

⁶ Ka tsa duhwal ya nda tsi mantsa: « Ta ghwá Gilbuwa yu ta slaftá yu ta Sawulu ta dihaftá vgha ta gupa ni, ta dzaʼa mwata plisha nda gwal ŋla plis ratsafta ɗekɗek.

⁷ Ka mbəɗavatá tsi, ka nghaŋtá tsi ta iʼi, ka hgihatá tsi. “Away wana yu!” ka yu zlghanaftá wi.

⁸ Kaʼa nda iʼi mantsa: “Wa kagha na?” kaʼa. “Iʼi mnda la Ghamalek ya,” ka yu.

⁹ Kaʼa nda iʼi mantsa: “Gavak gava ta vata iʼi, kabga ma ghuya ɗaŋwa yu katakata dər má ta ndiri yu. Wya dzvu, sawi dzatá iʼi,” kaʼa.

¹⁰ Ka gavanavatá yu kɗiŋtá dzata, nda sna yu kazlay nzəglata a nda hafu wu kəʼa, kabga nda bala katakata. Ka klaptá yu ta zewazewa si ma ghəŋa ni, nda bidir si ta dzva ni, ka hlaghaktá yu a rvera ɗa, » kaʼa.

¹¹ Ka ksaftá Dawuda ta lguta ni ka kwahiŋta ka ŋizla taw. Mantsa ya inda gwal kawadaga nda tsi guli.

¹² Ka nzatá həŋ sasgwama, ka taw həŋ ta taw, ka suma ha ga hawu dabga Sawulu, nda zwaŋa ni Yunataŋ, nda mnduha Yawe, nda ya ta ghəŋa guyatá ghəŋa la Israʼila, kabga rwanatá həŋ nda kafay.

¹³ Ka Dawuda nda tsa duhwal ta klədanaghatá tsa gwaɗa ya mantsa: « La wa ka na? » kaʼa. Kaʼa mantsa: « Zwaŋa sana mayəm yu, mnda la Ghamalek, » kaʼa.

¹⁴ Ka Dawuda nda tsi mantsa: « Waká zləŋ kwal ksaftá kagha ka kapaftá dzvu ka dzatá mndu ya nda fa ka ŋa Yawe nda ma pghanaghatá rɗi na? » kaʼa.

¹⁵ Ka hgadaghatá Dawuda ta sani mataba duhwalha ni, kaʼa nda tsi mantsa: « Gavadagha gava ka dzata ka! » kaʼa. Ka dzuŋtá tsi ta tsa mnda la Ghamalek ya ka dzata.

¹⁶ Ka Dawuda ta ghəŋa tsa mnda la Ghamalek ya mantsa: « Ta ghəŋa gha ka usa gha, kabga kagha ta mnaŋta nda wa gha, graf gra ka guli kazlay na: Kagha ta dzatá mndu ya nda fa ka ŋa Yawe nda ma pghanaghatá rɗi! kəʼa, » kaʼa.

Laha ta taw ta ghəŋa i Sawulu nda Yunataŋ

¹⁷ Ka faftá Dawuda ta ya laha ta tawtá ghəŋ ya ta ghəŋa i Sawulu nda zwaŋa ni Yunataŋ.

¹⁸ Ka mnaftá tsi ta taghanaftá la Yuda. Laha Lgheɗ ya, nda vinda ma ɗelewera Tɗukwa Mndu:

¹⁹ « La Israʼila, slra slra lu ta mala ghuni ta kuɗuŋurha ghuni! Aʼ iy, nda rwa bikwirha vulu!

²⁰ Ma mnə kuni ta tsa gwaɗa ya ma Gat, ma tíŋ kuni ta pazlalaha ma Askəluŋ, dá rfu kwagha la Filisti ta rfu, dá vavalaku kwagha gwal kul tsaku fafaɗa taŋ ta vavalaku ka rfu.

²¹ Ghwáha Gilbuwa, ma nzəglaf wuninik dər imi ta kaghuni, ma sləglanagha lu ta vwahha ka gənək da kaghuni, kabga hada pghanaghata lu ta hula ta zalamha gwal bikwira vulu, zalama Sawulu dzaʼa kwal lu masglaftá rɗi tida.

²² Haɗ lgheɗa Yunataŋ ta dɗu ta haɗik wu, haɗ kafaya Sawulu ta vru ka dakwal, kul pghatá usa gwal ta pslə həŋ wu, kul taganaptá ghwaviɗa bikwirha vulu wa.

²³ Ma inda nzakwa taŋ, ɗvu ɗva i Sawulu nda Yunataŋ ta vgha taŋ, ma mtakwa taŋ guli, dga a həŋ ta vgha wa. Mal tsəratá hahəŋ ka dzalaha, mal mbaratá hahəŋ ka rveri.

²⁴ Kwagha la Israʼila, tawawa ta Sawulu, tsatsi si ta suɗavaghunatá lguta dva nda bla dzva ni, ka rkanaftá rka ta lgutha ghuni nda huzla rka ka dasu ya kay ya.

²⁵ Aʼ iy, ma takataka vulu zləmbata tsa bikwirha vulu ya! Aʼ iy, ta kuɗuŋurha ghuni mutsafta Yunataŋ ta balaku!

²⁶ Nda gurɗa ŋuɗufa ɗa dabga kagha a Yunataŋ, zwaŋama ɗa! Ɗvu ɗva yu ta kagha. Malaghu mala ɗvuta gha ta iʼi katakata, ka malaghuta ɗvutá miʼaha.

²⁷ Aʼ iy! Rwu rwa bikwirha vulu! Zwaɗu zwaɗa tsa huzlaha vulu ya! » kaʼa.