2Rus 8 - Hdi

Sanlaha ma slnaha Salumuŋ

¹ Ma kɗavakta tsa vaku hisambsak kəl Salumuŋ ka babaftá həga Yawe, nda həga vərɗa tsatsi ya,

² ka babəglaftá Salumuŋ ta luwaha ya valaŋ Hiram, ka paghamtá tsi ta la Israʼila ma həŋ.

³ Tahula tsa, ka liŋtá Salumuŋ ta haɗika Hamatʼtsuva nda vulu, ka zluʼaghutá tsi.

⁴ Ka bəglaftá tsi ta Tadmur ma mtak, nda inda luwaha pagha huzla ma kwakwara Hamat.

⁵ Ka babəglaftá tsi ta Betʼhuruŋ nda ta ghəŋ, nda Betʼhuruŋ ma didiŋa, ka ŋaŋamtá tsi ka luwaha ma matsaka huzlu, nda parawalha taŋ, nda kra wa tghaha taŋ.

⁶ Ka baftá Salumuŋ ta Baghalat nda inda luwaha ta kəl lu ka pgha huzla ta nzakway ka ŋa ni, nda ya ta kəl tsi ka nzula mwataha plisha, nda ŋa plisha ni. Ka babaftá Salumuŋ guli ta inda ya má ndanaŋ tsi ta babafta ma Ursalima, ma Ləvanuŋ nda ya ma inda haɗikha ta skwa htsiŋ da tsi.

⁷ Inda mndəra mnduha ta pɗata ma la Het, nda la Amuru, nda la Periz, nda la Hiv, nda la Yəbus, kul nzakway ka la Israʼila ná,

⁸ gwal pɗa zivira taŋ ma tsa haɗik ya kul zaɗanatá la Israʼila ta həŋ ɗekɗek ná, ka waftá Salumuŋ ta həŋ ka vuʼa ŋa maga slna mbraku mbraku. Ka nzakw tsi ta həŋ manda tsaya ha gita.

⁹ Ama hlaf a Salumuŋ ta dər wati ma la Israʼila ka vuʼa wa. Ka pghatá tsi ta həŋ ka gwal vulu, nda maliha, nda maliha ta ghəŋa mwata plisha, nda gwal ŋla plis tani.

¹⁰ Tsa maliha pagha mgham Salumuŋ ŋa nghapta ka mnduha ta maganatá slna ya ná, his dərmək nda hutaf mbsak (250).

¹¹ Ka kladaftá Salumuŋ ta makwa Firʼawna ma luwa Dawuda da tsa həga banaf tsi ya, kabga kaʼa mnata na: « Haɗ markwa ini dzaʼa nzata ma həga Dawuda, mghama la Israʼila wu, kabga tsa vli kladam lu ta akwata Yawe ya ná, nda ghuɓa, » kaʼa.

¹² Ka vlə Salumuŋ ta skwa pla ghəŋ ŋa dray tsuh tsuh ŋa Yawe ta gwira Yawe, tsa baf tsi ta kəma rmaka həga Lazglafta ya.

¹³ Ka vlə tsi ta skwa pla ghəŋ taɓta ya mna zlaha Musa inda fitik ka ŋa sabatha, nda ŋa ngha tili, nda ŋa skaluha rfu, hkən səla ma vaku, tsaya skala buradi kul haɗ is mida, nda skala rfa nekwatá nimaya ta vwah, nda skala dumbiha.

¹⁴ Manda tva skwi ŋa magay ya mna da ni Dawuda, ka paghamtá tsi ta bakuha gwal dra skwi ŋa Lazglafta ma slna taŋ, nda la Levi ma slna taŋ ŋa fa laha zləzləvu ta kataŋtá gwal dra skwi ŋa Lazglafta taɓta ya mnaf lu ŋa magay nda fitika ni nda fitik ni, mantsa ya gwal ngha wa tgha dagap lu ta həŋ ta wa tgha nda bakwa taŋ nda bakwa taŋ, kabga mantsa ya mnafta Dawuda, mnda Lazglafta.

¹⁵ Haɗ sana skwi mbəɗanaf həŋ ma skwi ya mnaf zlaha mgham Dawuda ŋa gwal dra skwi ŋa Lazglafta, nda la Levi, dər skwiha ta nghanatá dzuguva ɗifa skwa gadghəl wa.

¹⁶ Mantsa ya ká kɗiŋta ksatá inda slna ya mnaf Salumuŋ, daga ta fitika tha tughwa həga Yawe ha ka kɗiŋta. Mantsa ya kɗiŋta lu ta baftá həga Yawe.

¹⁷ Ka sliʼaftá Salumuŋ ka laghwi da Ghetsiyuŋʼgever nda Ilut ta wa drəfa Zaŋwafi ma haɗika Idum.

¹⁸ Ka tsəghanaftá Hiram ta kwalvaha ta Salumuŋ nda ma dzva kwambaluha ni, ghunafha mista taŋ ta kwalvaha nda sana ta ksa slna ma drəf dagala. Ka lab həŋ kawadaga nda kwalvaha Salumuŋ da Ufir, daga hada ka hlaftá həŋ ta dasu ta malaghutá kiluʼ dəmbuʼ ghwaŋpəɗ hutaf (15.000), ka hlanaktá mgham Salumuŋ.