2Rus 7 - Hdi

Skwiha ŋa pla ghəŋ vlaŋ lu ta Yawe

¹ Kɗiŋta Salumuŋ ta ndəɓa dzvu, ka saha vu daga ta luwa, ka driŋtá skwa pla ghəŋ ŋa dray tsuh tsuh, nda skwa pla ghəŋha, ka ndəghanaftá glakwa Yawe ta tsa həga ya.

² Laviŋ a gwal dra skwi ŋa Lazglafta ta lami da həga Yawe wu, kabga ndəghanaf ndəgha glakwa Yawe ta tsa həga Yawe ya.

³ Ka nghə inda la Israʼila ta saha vu nda glakwa Yawe ta tsa həga Lazglafta ya. Ka tsəlɓatá həŋ ta daɓi, ka dzadzatá kuma ta haɗik, ka tsəlɓu həŋ ta tsəlɓu, ka zləzləva Yawe, ka həŋ mantsa: « Ŋərma ya, ta gɗava gɗa zɗakwa ni ŋa ɗekɗek! » ka həŋ.

⁴ Ka vlatá mgham nda inda mnduha ta skwiha ŋa pla ghəŋ ta kəma Yawe.

⁵ Ka vlatá mgham Salumuŋ ta slaha dəmbuʼ hisambsak his mida (22.000), nda rina fisik dəmbuʼ dərmək nda hisambsak (120.000) ka skwa pla ghəŋ. Mantsa ya, ka mgham nda mnduha demdem gunanaftá həga Lazglafta.

⁶ Ka sladatá gwal dra skwi ŋa Lazglafta ma vla maga slna taŋ, mantsa ya la Levi nda huzla skalu ŋa Yawe, ya si mamagaf mgham Dawuda ŋa zləzləva Yawe, ka həŋ mantsa: « Ta gɗava gɗa zɗakwa ni ŋa ɗekɗek, » ka həŋ. Taɓ ta laha ya vlaŋ Dawuda ta həŋ, ka viy gwal dra skwi ŋa Lazglafta ta talakwa ta kəma taŋ, ta sladu la Israʼila demdem hada.

⁷ Ka faghutá Salumuŋ ka ŋa Yawe ta takataka tsa daɓi ta kəma həga Yawe ya. Ka vlatá tsi ta skwiha ŋa pla ghəŋ ŋa dray tsuh tsuh, nda ghwaviɗha skwa pla ghəŋa zɗaku, kabga slaghu a tsa gwir ka ghuva tili magaf tsi ya ka ŋaftá tsa skwa pla ghəŋ ŋa dray tsuh tsuh, nda mbəhuha nimaya, nda ghwaviɗha ya wa.

⁸ Ma tsa fitik ya, ka fatá Salumuŋ ta skala rfu ka fitik ndəfáŋ, kawadaga la Israʼila demdem nda tsi. Ka sliʼadaghatá ndəghata guyatá ghəŋa mnduha nekwnekw, sliʼafta daga ma Levuʼhamat, dikw ta wa lika Masar.

⁹ Manda skalata taŋ ta skala guna gwir ka fitik ndəfáŋ, skalaha həŋ guli ta skala rfu ka fitik ndəfáŋ, baɗ matghasa fitik, ka tskaftá həŋ ta tska vgha dagala.

¹⁰ Tahula tsa tama, baɗ mahisambsak hkən mida ma tila mandəfáŋ, ka vríŋtá Salumuŋ ta mnduha dzagha taŋ wunahatá ŋuɗuf dabga inda skwi ya ɗina ɗina magana Yawe ta Dawuda, nda Salumuŋ nda ya ŋa mnduha la Israʼila.

Marglavata Yawe da Salumuŋ

¹¹ Ka kɗiŋtá Salumuŋ ta baftá həga Yawe nda həga mgham. Ka katsaftá tsi ta inda skwi ya si ndanaŋ tsi ta magata ta nghanatá həga Yawe, nda ŋa həga vərɗa tsatsi.

¹² Ka zlagaptá Yawe da Salumuŋ ga rviɗik, kaʼa nda tsi mantsa: « Tsuʼaf tsuʼa yu ta ndəɓa dzva gha, zbaf zba yu ŋa ɗa ta na vli na manda həga ya ŋa pla ghəŋha.

¹³ Ka ghwaliŋ ghwala yu ta luwa ŋa kwala imi kul haɗu, ka hiʼi a da mnanafta yu ta zaɗanatá vli ta haɗik, ka zləmnda a tsi da ghunafta yu dika mnduha ɗa,

¹⁴ ka lagha mnduha ɗa, ya ta hgə lu ta həŋ nda hga ɗa ta həŋ, ka hanaganatá ghəŋ, ka ndəɓa dzvu, ka zba iʼi, ka mbəɗanatá hul ta ghwaɗaka tva taŋ katsi, dzaʼa snaga sna yu daga ta luwa, dzaʼa plana pla yu ta dmakwa taŋ, dzaʼa mbanaf mba yu ta haɗika taŋ.

¹⁵ Ndanana tama, dzaʼa nda guna ira ɗa, nda fa sləməŋa ɗa ka sna ndəɓa dzvu ma na vli na.

¹⁶ Ndanana, zbap zba yu, faghu fa yu ta tsa həga ya ŋa nzakwa hga ɗa ŋa ɗekɗek. Dzaʼa faf fa yu ŋa ɗekɗek ta ira ɗa nda ŋuɗufa ɗa tida.

¹⁷ Kagha ya, ka ta mbaɗay ka ta kəma ɗa manda ya mbaɗ da gha Dawuda, nda ma hɗamtá inda skwi mnaghaf yu, ka ŋana ŋa ka ta zlahuha ɗa, nda tva skwiha ɗa ŋa magay katsi,

¹⁸ dzaʼa dihana diha yu ŋa ɗekɗek ta dughurukwa gá mghama gha, taɓta ya dzraf ŋni nda da gha Dawuda nda mnay kazlay na: “Haɗ ka dzaʼa pɗata ɗekɗek ta mndu ŋa za həga gha ŋa gá mgham ta ghəŋa la Israʼila,” kəʼa ya.

¹⁹ Ama ka mbəɗaghu mbəɗa kuni ta vgha ta vata iʼi, ka zlanava zla kuni ta tva skwiha ŋa magay, nda zlahuha ɗa, ya vlaghuna yu, ka laghu la kuni maganatá slna ta sanlaha ma lazglaftaha, ka tsəlɓu ta kəma taŋ katsi,

²⁰ dzaʼa tsahigiŋ tsaha yu ta kaghuni ma haɗika ɗa, ya vlaghuna yu. Dzaʼa vzidiŋ vza yu diʼiŋ nda iʼi ta na həga fa yu ŋa vlaŋtá sgit ta hga ɗa na, dzaʼa nanaf na yu ka skwa gagay nda ya ka skwa ghuɓasay mataba inda mndəra mnduha.

²¹ Ka dər nda nza má na həga na ka skwi rə ka nghay gita ná, dər wati ma mndu dzaʼa lab nda ta vata ni ná, dzaʼa nza nza ndrakawa ka mnay kazlay na: “Nya kəl Yawe ka maganatá skwi manda na ta na haɗik na nda na həga na manda na na?” kaʼa dzaʼazlay.

²² Ka lu dzaʼa zlgha wa ni na: “Vəl zlanavata taŋ ta Yawe, Lazglafta dzidzíha taŋ ta hlagaptá həŋ ma haɗika Masar ya, vəl laghwa taŋ da ndiʼaftá vgha nda sanlaha ma lazglaftaha, ka laghwa taŋ da tsəlɓu ta kəma taŋ, ka maganatá slna ta həŋ ya. Tsaya kəl tsi ka vzanaghatá həŋ ta inda na zləmndaha na,” ka lu dzaʼazlay, » kaʼa.