2Rus 6 - Hdi

Skala guna həga Lazglafta

¹ Ka Salumuŋ tama mantsa: « Mna mna Yawe kazlay dzaʼa nzata ma grum tɗika yu kəʼa.

² Ama iʼi, ka baghaftá yu ta həga ta ɗinuta, vli ya ŋa nzakwa gha ŋa kɗekedzeŋ! » kaʼa.

³ Ka mbəɗavatá mgham Salumuŋ ka tfanaghatá wi ta guyatá ghəŋa la Israʼila demdem ta sladu hada.

⁴ Kaʼa mantsa: « Rfu da Yawe, Lazglafta la Israʼila ta mnanata nda wa ni ta da ɗa Dawuda, ka hɗamtá tsi nda mbrakwa ni ta skwi mna tsi, kaʼa mnuta na:

⁵ “Daga baɗ hlagapta ɗa ma haɗika Masar ta mnduha ɗa, haɗ luwa ya zbap yu mataba inda mndəra la Israʼila ŋa baftá həga ŋa nzakwa hga ɗa wu. Haɗ mndu zbap yu ŋa nzakway ka mgham ta ghəŋa mnduha ɗa la Israʼila wu,

⁶ ama zbap zba yu ta Ursalima ŋa nzakwa hga ɗa, zbap zba yu ta Dawuda ŋa gay ni ta mgham ta ghəŋa mnduha ɗa, la Israʼila,” kaʼa.

⁷ Si ɗvaŋ ɗva da ɗa Dawuda ta baftá həga ŋa vlaŋtá sgit ta Yawe, Lazglafta la Israʼila,

⁸ ama ka Yawe nda da ɗa Dawuda mantsa: “Kum kuma ka ma ŋuɗufa gha ta baftá həga ŋa hga ɗa, ɗina tsa kumafta gha ya.

⁹ Nziya nza tsi ná, kagha a dzaʼa bafta wu, ama zwaŋa gha, ya yaga ka ma huɗa gha ya, tsatsi dzaʼa baftá tsa həga ŋa vlaŋtá sgit ta hga ɗa ya,” kaʼa.

¹⁰ Hɗam hɗa Yawe ta gwaɗa ni ya mna tsi nda wa ni. Iʼi ta lami da vla da ɗa Dawuda, ka nzaftá yu ta dughurukwa ga mghama la Israʼila, manda va ya mna Yawe, ka baftá yu ta na həga na ŋa vlaŋtá sgit ta Yawe, Lazglafta la Israʼila.

¹¹ Ka famtá yu ta akwata dzratá wa Yawe ma tsa həga ya, mida vindatá gwaɗa dzratá wi ya dzraf Yawe nda la Israʼila, » kaʼa.

Ndəɓa dzva Salumuŋ

¹² Ka sladatá Salumuŋ ta kəma gwira Yawe, mbəŋ nda guyatá ghəŋa la Israʼila demdem, ka kapaftá tsi ta dzvuha ni.

¹³ Si magaf maga Salumuŋ ta sana vla sladu ka ghuva tili, ka fata ma daɓa həga. Mitər his nda rita slrakwa ni nda bughwata ni, mitər nda rita lafa ni ta luwa. Ka laf tsi tida, ka tsəlɓata ta kəma guyatá ghəŋa la Israʼila demdem, ka kapaftá tsi ta dzvuha ni nda ta luwa,

¹⁴ kaʼa mantsa: « Ari Yawe, Lazglafta la Israʼila! Haɗ lazglafta ta gwagwaya vgha nda kagha, dər ta luwa, dər ta haɗik wa. Ta ŋana ŋa ka ta dzratá wa gha, nda zɗakwa gha nda kwalvaha gha, gwal ta mbaɗa ta kəma gha nda hya hya ŋuɗufa taŋ.

¹⁵ Ka ŋanata ka ta tatá imi ta sləməŋ tanaf ka ta kwalva gha da ɗa, Dawuda. Skwi ya mna ka nda wa gha ta hɗamta ka gita nda mbrakwa gha.

¹⁶ Ndanana, Yawe, Lazglafta la Israʼila, hɗam hɗa ta tatá imi ya tanaf ka ta sləməŋ ta kwalva gha, da ɗa Dawuda. Ka kagha nda tsi na: “Pɗata a ka ɗekɗek ta mndu turtuk ma zivira gha ta nzaku ta kəma ɗa ta dughurukwa ga mghama la Israʼila wa. Kweŋkweŋa ni ná, ka nghapta zivira gha ka nzakwa taŋ, ka ksay taŋ ta zlaha ɗa manda ya maga vərɗa kagha,” ka ka.

¹⁷ Ndanana, kdəkkdək hɗam hɗa vərɗa kagha Yawe, Lazglafta la Israʼila ta tsa tatá imi tanaf ka ta sləməŋ ta kwalva gha, Dawuda ya!

¹⁸ Ama kahwathwata ná, dzaʼa nzay Lazglafta nda mnda səla ta haɗik ra? Dər luwa ta luwa ta ghəŋa luwa ná, laviŋ a ta ŋaftá kagha wu! Nana həga baf yu na yeya rki!

¹⁹ Kulam nda tsa, Yawe, Lazglafta ɗa, fa fa ta sləməŋ ka sna duʼa, nda taw, mantsa nzakwa ni, fa fa ta sləməŋ ka sna ka ta haga kagha ta hag yu.

²⁰ Ka fafta ka ta ira gha nda fitik tani nda rviɗik tani ta na həga na, ta vli ya mna ka ŋa nzakwa hga gha! Sna ta duʼa kwalva gha ta magay nda təv na vli na.

²¹ Fa fa ta sləməŋ ka sna tawa kwalva gha, nda ŋa mnduha gha la Israʼila, ta mag həŋ ta duʼa nda təv na vli na! Daga ma vli ta nzakw ka ta nzakwa gha, daga ta luwa, tsuʼaŋnaf tsuʼa ta duʼa ŋni, plaŋnaha ka ta dmakwa ŋni!

²² Ka lagha mndu ka ganatá dmaku ta sana mndu, ka mblafta lu ŋa waɗatá waɗu, ka sagha sa tsi da waɗu ta kəma gwira gha, ma na həga na,

²³ ka snagata ka daga ta luwa Yawe, ka maga ka ta slna gha, ka tsanaghata ka ta guma ta kwalvaha gha. Ka tsanaghata ka ta guma ta mnda dmaku, vranaf vra ta dmakwa ni ta ghəŋa ni. Mndu tɗukwa ya guli ná, ka maraŋta lu ta tsatsi ka mndu kul haɗ dmakwa ni, ka vranamta lu ta skwi taɓta nzakwa ni tɗukwa.

²⁴ Ka lagha ghuma ka zatá ghwa ta ghəŋa mnduha gha la Israʼila, kabga vəl gaghata taŋ ta dmaku katsi, ka vragagha vra həŋ tama da kagha, ka zləzləva hga gha, ka ndəɓa dzvu da kagha, ka taw da kagha ma na həga na katsi,

²⁵ snaga sna ta luwa nda gaftək, plana pla ta dmakwa mnduha gha, la Israʼila, ka vraganaghata ka ta həŋ ta haɗik ya vlaŋ ka ta həŋ nda dzidzíha taŋ.

²⁶ Ka lagha luwa ka ghwaluta, haɗ imi wu, kabga vəl gaghata taŋ ta dmaku, ka mag həŋ ta duʼa nda təv na vli na, ka zləzləva hga gha, ka mbəɗana mbəɗa həŋ ta hul ta dmakuha taŋ, kabga tsanaghata gha ta guma ta həŋ katsi,

²⁷ snaga sna daga ta luwa nda gaftək, plana pla ta dmakwa kwalvaha gha, nda mnduha gha, la Israʼila. Mantsa nzakwa ni, taghanaf tagha tama ta həŋ ta tvi ɗina, ya ŋa mbaɗay taŋ ta mbaɗa tida, nzaga nza ta imi ta haɗik ya vlaŋ ka ka skwa za həga ta mnduha gha!

²⁸ Ka lagha maya ka slata, ka ketsepi a tsi, ka madzaɓdzaɓ a tsi, ka maghweftegeɗ a tsi, ka hiʼa maya a tsi, ka manzufi a tsi, ka ghumaha a tsi ta tsamtá mnduha gha ma haɗika taŋ ma luwaha taŋ, ka rwaku a tsi ta slata, ka sanlaha ma ɗaŋwa a tsi,

²⁹ ka magata dər wati ma mndu, ka inda mnduha gha, la Israʼila a tsi ta duʼa, dər mndərga wati ma duʼa tsi, ka taw, kabga tsatsafta taŋ ta skwi ta kuzlaŋtá həŋ ta ŋuɗufa taŋ, ka kapaftá dzvuha nda təv na həga na,

³⁰ snaga sna daga ta luwa nda gaftək, daga ma vla nzakwa gha, ka planata ka ta dmakuha taŋ. Maga, ka vlaŋta ka ta dər wati ma mndu taɓta mbaɗa ni, ya nda sna kagha ta ŋuɗufa inda mndu ya. Mantsa nzakwa ni, kagha turtukwa gha nda sna ta ŋuɗufa mnda səla,

³¹ kada zləŋa həŋ ta kagha, ka ksay taŋ ta tva gha ma inda nzakwa taŋ ta haɗik ya vlaŋ ka ta dzidzíha ŋni.

³² Dər mayəm, mndu ya kul sabi ma mnduha gha, la Israʼila, dzaʼa sagha sa ta sana haɗik diʼiŋ dabga glakwa hga gha, nda mbrakwa gha, nda slna dzva gha kəʼa saghər mayəm da maga duʼa nda təv na həga na,

³³ snaga sna daga ta luwa, ma vla nzakwa gha, ka tsuʼanafta ka ta inda skwi ya dzaʼa ɗawaghata tsi! Mantsa ya, dzaʼa snaŋta inda mndəra mnduha ta ghəŋa haɗik ta hga gha, ŋa zləŋay taŋ ta kagha manda ya ta mag mnduha gha, la Israʼila, dzaʼa snaŋ sna həŋ kazlay na ŋa vlaŋtá glaku ta hga gha bafta yu ta na həga na kəʼa.

³⁴ Ka lagha mnduha gha ka sliʼagapta ŋa dzaʼa da vulu nda ghuma taŋ, nda ta tviha ya mnanaf ka ta həŋ, ka ndəɓ həŋ ta dzvu da kagha, ka mbəɗavata ka ngha vli nda təv na luwa ya zbap ka na, nda ya nda təv na həga baf yu ŋa vlaŋtá sgit ta hga gha na katsi,

³⁵ snaga sna daga ta luwa nda gaftək ka duʼa taŋ, nda tawa taŋ, ka maganata ka ta skwi tɗukwa ta həŋ.

³⁶ Ka lagha taŋ ka gaghatá dmaku, kabga haɗ mndu kul ga dmaku wu, ka gufaftá ŋuɗufa gha ta ghəŋa taŋ, ka vlatá ka ta həŋ ma dzva ghuma dzaʼa hlaghatá həŋ ta haɗika ghuma diʼiŋ, ka ndusa a tsi,

³⁷ ka vraganagha vra həŋ ta ghəŋa taŋ ma tsa haɗik dzaʼa hlaghata lu ta həŋ da ga vuʼa ya, ka vrak vra həŋ da kagha, ka taw həŋ ta taw da kagha ma tsa haɗika gwal ta hlaghatá həŋ ya, ka ka həŋ mantsa: “Gaga ŋni ta dmaku, gaga ŋni ta krughuvi, maga maga ŋni ta ghwaɗaka skwi,” ka həŋ,

³⁸ ka vrak vra həŋ da kagha nda hya hya ŋuɗufa taŋ, nda inda kɗavakta hafa taŋ ma tsa haɗika ghumaha taŋ ta hlaghatá həŋ ya, ka ndəɓ həŋ ta dzvu da kagha, ka mbəɗavata nda təv haɗika taŋ ya vlaŋ ka ta dzidzíha taŋ, nda ya təv luwa ya zbap ka, nda ya təv həga ya baf yu ŋa vlaŋtá sgit ta hga gha katsi,

³⁹ snaga sna daga ta luwa nda gaftək, daga ma vli ya ta nzakw ka, ka ndəɓa dzva taŋ, nda tawa taŋ, ka maganata ka ta skwi tɗukwa ta həŋ. Plana pla ta dmakwa mnduha gha.

⁴⁰ Ndanana, Lazglafta ɗa, kdəkkdək, guna guna ta iri, ka fata ka ta sləməŋ, ka sna ka ta ndəɓa dzvu ma na vli na!

⁴¹ Ndanana, Yawe, Lazglafta, sliʼaf sliʼa, sawi da vla mbiʼa vgha gha, kagha nda akwata glakwa gha! Má ka mutsaf mutsa gwal dra skwi ŋa gha Yawe, Lazglafta ta mbaku. Má ka rfa ŋərma mnduha gha ta rfu dabga zɗakwa gha!

⁴² Yawe, Lazglafta, ma sliŋwiŋ ka ta mndu ya zbap ka nda ma pghanaghatá rɗi. Havap hava ka zɗaku ya maga kwalva gha Dawuda! » kaʼa.