2Rus 5 - Hdi

¹ Mantsa ya ka Salumuŋ kɗiŋta magatá inda tsa slnaha ba həga Yawe. Ka hlaktá tsi ta skwiha ya si pghaghu da ni Dawuda ŋa Yawe: Kfura tsedi, nda dasu, nda inda huzlaha kavghakavgha. Ka pghatá tsi demdem ma dzuguva ɗifa skwa gadghəl ma həga Lazglafta.

Kladaghatá akwata dzratá wi da həga Lazglafta

² Ka tskanatá Salumuŋ ma Ursalima ta galata mnduha la Israʼila, nda inda maliha ma mndəra mnduha, nda la zəʼala həgaha ma Israʼila, ŋa klaftá akwata dzratá wa Yawe daga ma luwa Dawuda, ta nzakway ka Tsiyuŋ.

³ Ka tskavatá inda la Israʼila ta vata mgham ŋa skala dumbi ma tila mandəfáŋ ya.

⁴ Ɓhadaghata inda galata mnduha la Israʼila, ka klaftá la Levi ta tsa akwata dzratá wi ya.

⁵ Ka klaftá həŋ ta akwata dzratá wi, nda tumpula guyaku, nda inda huzla nda ghuɓa si ma tsa tumpul ya. Gwal dra skwi ŋa Lazglafta nda la Levi ta hladafta,

⁶ ta sladatá i mgham Salumuŋ nda guyatá ghəŋa la Israʼila demdem kawadaga nda tsi ta kəma akwata dzratá wi ta vlatá həŋ ka skwa pla ghəŋ, ta ndəghata rina fisik nda slaha kul laviŋtá lu ta mbəɗafta, dər uwalaŋta.

⁷ Ka kladaghatá gwal dra skwi ŋa Lazglafta ta akwata dzratá wa Yawe da vla ni, da tsa huɗi nda ma huɗa həga Lazglafta ya, da vli ta ghuɓuta, dista zlambakha kerubaha.

⁸ Nda zlatatá zlambak tsa kerubaha ya ma tsa vli fa lu ta tsa akwati ya, ka bukwamtá həŋ ta tsa akwati ya nda sandlaŋha ni tani.

⁹ Nda slara tsa sandlaŋha ya, ta nghaku wa taŋ daga ma tsa huɗi dagala makəɗ lu lami da tsa huɗi nda akwati ya, ama nghava a ma bla ni wa. Hada həŋ ma tsa vli ya ha gita.

¹⁰ Tsa klamha his pgham Musa ma Hwarev yeya ma tsa akwati ya, manda dzrafta Yawe ta wi nda la Israʼila ta sab həŋ ma haɗika Masar.

¹¹ Ka sliʼagaptá gwal dra skwi ŋa Lazglafta ma vli nda ghuɓa. Inda gwal dra skwi ŋa Lazglafta hada ná, tsaɗiŋ tsaɗa həŋ ta ghəŋa taŋ, kul haɗ dganatá bakwa taŋ.

¹² Inda la Levi ka gwal fa laha, i Asaf, nda Hemaŋ, nda Yədutuŋ, nda zwana taŋ nda zwana ma taŋ nda susuɗatá lguta sləvdza liŋ kulefeɗfeɗa həŋ, ka sladata nda ga silwa gwir, ka dza ndeŋndeŋ, nda htimbil, nda kəzliŋkəzliŋ həŋ. Dərmək nda hisambsak (120) gwal dra skwi ŋa Lazglafta ta vata həŋ ta vya talakwa.

¹³ Hɗəmtsək guyata wa tsa gwal fa laha ta gwaftá vgha, ka skalu, ka zləzləva Yawe nda vya talakwa, nda dza ndeŋndeŋ, nda htimbil nda sanlaha ma huzlaha ya. « Ŋərma ya, ta gɗava gɗa zɗakwa ni ŋa ɗekɗek! » ka həŋ. Ma tsa fitik ya, ta ndəghanaf ndəgha kusay ta həga Yawe.

¹⁴ Ka traptá gwal dra skwi ŋa Lazglafta ta kəɗaŋtá maga slna taŋ dabga tsa kusay ya, kabga ndəghanaf ndəgha glakwa Yawe ta tsa həga Lazglafta ya.