2Rus 4 - Hdi

Gwir nda glifiŋha

¹ Ka magaftá Salumuŋ ta gwir ka ghuva tili ka mitər ghwaŋ slrakwa ni, mitər ghwaŋ bughwata ni, mitər hutaf lafa ni ta luwa.

² Ka tsaftá tsi ta glifiŋ dagala hdəwər nda kfur nwap lu. Mitər hutaf gunatá wa ni nda təv sani, hdəwər nzakwa ni. Ka mitər his nda rita slada ni, laviŋ lava lu ta graftá wa ni dendesl nda təɓaŋ ka mitər ghwaŋpəɗ hutaf.

³ Mista ɓlatá wa tsa glifiŋ ya, ka magiŋtá lu ta tsatsatá fwata lghəŋha hisambsak ta mitər turtuk ka ndər his ka wanafta dendesl. Tsa lghəŋha ya ná, nwap ka skwa turtuk lu nda tsa glifiŋ ya.

⁴ Ka faftá lu ta tsa glifiŋ ya ta tsatsatá fwata lghəŋha ghwaŋpəɗ his mbaɗana lu hkən nda təv mazlay, hkən nda təv dɗakwa fitik, hkən nda təv maghura, hkən nda təv safa fitik, ka mbaɗanatá mndəra taŋ nda ma huɗi. Ta həŋ nzafta tsa glifiŋ ya.

⁵ Taɓta bughwata dzvu na dəkata ni. Wa ni guli, manda ɓlatá wa kwap ka vzlizla kayək a tsi nzakwa ni, laviŋ lava ta zutá imi ka litər dəmbuʼ mkuʼ mbsak (60.000).

⁶ Ka magaftá tsi ta zwana glifiŋha ghwaŋ, ka pghata hutaf nda ga zeghwi, hutaf nda ga zlaɓa, ŋa maga tsaɗa. Ma həŋ ta ghwaɓa lu ta huzla skwiha ŋa dray tsuh tsuh. Glifiŋ dagala ya, nda nza ŋa mbaza gwal ta dra skwi ŋa Lazglafta.

Huzlaha həga Lazglafta

⁷ Ka tsatsaftá tsi ta gaŋaŋa pitirlaha ghwaŋ ka dasu taɓta tva skwi ya mna lu, ka fata ma həga Lazglafta, hutaf nda ga zeghwi, hutaf nda ga zlaɓa.

⁸ Ka tsatsaftá tsi ta tabəlha ghwaŋ, ka pghata ma həga Lazglafta, hutaf nda ga zeghwi, hutaf nda ga zlaɓa. Ka tsatsaftá tsi ta nzəganzəgaha dərmək (100) ka dasu.

⁹ Ka tasatá tsi ta daɓa gwal dra skwi ŋa Lazglafta, nda daɓi dagala, nda wa tghaha ni, ka zlərɓatá parawalha ni nda ghuva tili.

¹⁰ Ka fatá tsi ta tsa glifiŋ dagala ya nda ga zeghwa həga Lazglafta, nda ga maghura təva safa fitik.

¹¹ Ka tsatsaftá Huramʼabi ta hutayha ŋa pgha hutiɗif, nda pelha, nda nzəganzəgaha. Mantsa ya ka Hiram kɗiŋta magatá slna mnana mgham Salumuŋ ŋa magata ma həga Lazglafta ya:

¹² Wya skwiha magaf tsi: Guguɗiha his, nda dzugwaha his dzuluh dzuluh ŋa fay ta ghəŋa tsa guguɗiha ya, nda gatá ziɗaha his ŋa bukwa tsa dzugwaha dzuluh dzuluh ta ghəŋa tsa guguɗiha ya,

¹³ nda rimuŋha fwaɗ dərmək (400) ŋa tsa gatá ziɗaha his ya, ndər ndər his rimuŋ ma inda tsa gatá ziɗa ta bukwamtá tsa dzugwaha dzuluh dzuluh ta tsa guguɗiha ya.

¹⁴ Ka magaftá tsi ta ameleŋkiha, magafha ta glifiŋha tida,

¹⁵ nda glifiŋ dagala, nda tsa tsatsatá fwata lghəŋha ghwaŋpəɗ his mista ni ya,

¹⁶ nda zwana glifiŋha, nda pelha, nda gayaha. Inda tsa huzlaha maganaf Huramʼabi ta mgham Salumuŋ, ŋa həga Yawe ya ná, mamagaf nda ghuva tili, ka kakərzlafta.

¹⁷ Ta daɓa Yardeŋ, ma takataka Sukut nda Tsereda nawapta mgham Salumuŋ ma rɓisl ta həŋ.

¹⁸ Ka magaftá Salumuŋ ta inda tsa huzlaha ya ka fərtuta katakata, laviŋ a lu ta graftá ndəgakwa tsa ghuva tili kəl lu ka magaftá həŋ ya wa.

¹⁹ Ka magaftá Salumuŋ guli ta inda huzlaha ŋa da həga Lazglafta: Gwira dra urdi ka dasu, nda tabəlha ka dasu ŋa faftá buradi ta kəma Yawe,

²⁰ Gaŋaŋha pitirlaha nda pitirlaha taŋ ka dasu ghenen, tsatsaf lu ta vu tida ŋa tsuwaɗaka vli ta kəma vli ta ghuɓuta taɓta ya mnaf lu ŋa magay,

²¹ nda vzlizlaha, nda pitirlaha, nda lmislha ka dasu, dasu ghenen,

²² nda maŋaha, nda nzəganzəga ŋa wutsikanatá skwi, nda leghwaha, nda gədzehha ka dasu ghenen, nda parawala tghaha ka dasu ma vli ta ghuɓuta, nda ŋa wa tghaha huɗi dagala ma həga Lazglafta.