2Rus 36 - Hdi

Yuʼahaz, mghama la Yuda

¹ Ka klaftá mnduha ma tsa haɗik ya ta Yuʼahaz zwaŋa Yusiya, ka famta ka mgham ma vla da ni ma Ursalima.

² Hisambsak hkən mida ima Yuʼahaz ta nzatá tsi ka mgham. Ka zatá tsi ta tili hkən kweŋkweŋ ta gá mgham ma Ursalima.

³ Ka kliŋtá Nəhu mghama Masar ma gá mgham ma Ursalima. Ka mblaftá tsi ta haɗika la Yuda ŋa pla dzumna ka kiluʼa tsedi dəmbuʼ hkən nda fwaɗ dərmək (3.400), nda kiluʼa dasu hkən mbsak fwaɗ mida.

⁴ Ka famtá tsi ta Ilyakim zwaŋa ma ni ma Yuʼahaz ka mgham ta ghəŋa la Yuda nda la Ursalima. Ka mbəɗanaftá tsi ta hga ni ka Yəhuyakim. Ka klaghatá tsi ta zwaŋa ma ni Yuʼahaz da Masar.

Gá mghama Yəhuyakim ma Yuda

⁵ Hisambsak hutaf mida ima Yəhuyakim ta nzatá tsi ka mgham. Ka zatá tsi ta vaku ghwaŋpəɗ ndeŋ ta gá mgham ma Ursalima. Ka mag tsi ta ghwaɗaka skwi ta wa ira Yawe, Lazglafta ni.

⁶ Ka laf Nevuhadnetsar, mghama Babila da liŋta guk nda vulu, ka habaftá tsi nda ziɗa ka ghuva tili ŋa klaghata da Babila.

⁷ Ka hlaghatá Nevuhadnetsar ta sanlaha ma huzla ma həga Yawe da Babila, ka pghamta ma həga gá mghama ni ma Babila.

⁸ Pɗakwa slnaha Yəhuyakim, nda manzakɗawayha maga tsi, nda skwi ta slanaghata ná, vivindam vivinda lu ma ɗelewera vinda slnaha mghamha la Israʼila, nda la Yuda. Ka lam zwaŋa ni Yəhuyakiŋ da gá mgham ma vla ni.

Gá mghama Yəhuyakiŋ ma Yuda

⁹ Tghas ima Yəhuyakiŋ ta nzatá tsi ka mgham. Ka zatá tsi ta tili hkən nda fitik ghwaŋ ta gá mgham ma Ursalima. Ka mag tsi ta ghwaɗaka skwi ta wa ira Yawe.

¹⁰ Sagha sana vaku, ka klaghatá mgham Nevuhadnetsar da Babila, nda huzla ɗina ɗina ma həga Yawe. Ka famtá tsi ta Tsidkiya dasliʼiŋa Yəhuyakiŋ ka mgham ta ghəŋa la Yuda nda la Ursalima.

Gá mghama Tsidkiya ma Yuda

¹¹ Hisambsak ndeŋ mida ima Tsidkiya ta nzatá tsi ka mgham. Ka zatá tsi ta vaku ghwaŋpəɗ ndeŋ ta gá mgham ma Ursalima.

¹² Ka mag tsi ta ghwaɗaka skwi ta wa ira Yawe, Lazglafta ni. Hanagana a ta ghəŋa ni ta kəma anabi Yirməya ta mna gwaɗa mna Yawe ŋa ni wa.

¹³ Ka ganavatá tsi guli ta sidi ta mgham Nevuhadnetsar ta famta da waɗanatá waɗu nda hga Lazglafta. Ka ghwalaftá tsi ta ghəŋ ka təŋanafta, ka zlanatá vrakta da Yawe, Lazglafta la Israʼila.

¹⁴ Inda maliha gwal dra skwi ŋa Lazglafta, nda mnduha tani, ka sganaghatá həŋ ta ga dmaku, nda ma tagha skala sana mndəra mnduha ta maga manzakɗawaya skwiha. Ka niŋtá həŋ ka skwi kul tsaɗaku ta həga Yawe faghu tsi ma Ursalima ya.

Zləmbakwa Ursalima

¹⁵ Ka va ghwanadaghatá Yawe, Lazglafta dzidzíha taŋ, ta gwal ghunay ni ta ghəŋ ta ghəŋ, kabga si ta kumay ta kataŋtá mnduha ni, nda vla nzakwa ni.

¹⁶ Ama ka va gag həŋ ta ghunatá mnduha Lazglafta, ka hərtət həŋ ta gwaɗa ni, ka niŋtá həŋ ta anabiha ka ghwana ghuɓasu, ha ka gufaftá ŋuɗufa Yawe ya kul haɗ ghwana ni ta ghəŋa mnduha ni.

¹⁷ Ka ghunadaftá Yawe ta mghama Babila nda vulu guk slanaghatá həŋ, ka pslatá tsi ta duhwalha taŋ nda kafay ma vli nda ghuɓa. Zlana a ta dər duhwal, dər makwa, dər glata mndu, dər halata mndu wa. Ka vlatá tsi ta həŋ demdem ma dzva ni.

¹⁸ Ka hlaghatá tsa mghama Babila ya ta inda huzla ma həga Lazglafta, nda ya dagala tani, nda ya kwitikw tani, nda skwa gadghəl tani ma həga Yawe, nda ya ga mgham, nda ya ga maliha ta maganatá slna.

¹⁹ Ka driŋtá həŋ ta həga Lazglafta, ka zlazliŋtá həŋ ta matsakha Ursalima, ka fiŋta nda vu ta inda həga gá mgham ni, ka dzaɓiŋtá inda huzla ɗina ɗina ma luwa.

²⁰ Ka hlaghatá tsi da Babila ta gwal ta ndapta da kafay, ka pghatá tsi ta həŋ ka kwalvaha ni, nda zwana ni, ha ka sagha fitika fata la Persiya ta gá mgham taŋ.

²¹ Mantsa ya ka gwaɗa Yawe hɗamta nda ma wa Yirməya kazlay: « Dzaʼa zlanava zla lu ta tsa haɗika ya ka vaku ndəfáŋ mbsak, ha ka kɗuta vakuha mbiʼa vgha ni, ŋa plamtá tsa sabatha kul snatá lu ya, » kaʼa ya.

Vlata Sirus ta tvi ŋa bəglaftá həga Lazglafta

²² Ta taŋtaŋa vakwa gay Sirus mghama Persiya ta mgham ta ghəŋa Babila, ka sliʼanaftá Yawe ta ŋuɗufa Sirus mghama Persiya, ŋa mnaŋta baŋluwa, nda ya nda vindi, ma inda vli ta gə tsi ta mgham, kada hɗamta gwaɗa Yawe ta mnigiŋta nda ma wa anabi Yirməya. Kaʼa mnata mantsa:

²³ « Wya skwi mna Sirus mghama Persiya: Inda vli ta gə lu ta mgham ta haɗik ná, vliha vla Yawe, Lazglafta ta luwa ma dzva ɗa. Vərɗa tsatsi ta zbaptá iʼi kazlay: “Biɗifba ta həga ma Ursalima ta haɗika Yuda” kaʼa. Dər wa tsi mataba ghuni ta nzakway ka mnda ni, ka nza Yawe, Lazglafta ni kawadaga nda tsi, ka ŋla tsi da Ursalima, » kaʼa.