2Rus 33 - Hdi

Mənase, mghama la Yuda

¹ Ghwaŋpəɗ his ima Mənase ta nzatá tsi ka mgham. Hutaf mbsak hutaf mida vakwa ni ta gá mgham ma Ursalima.

² Ka mag Mənase ta ghwaɗaka skwi ta wa ira Yawe, ka klaftá tsi ta saɗa manzakɗawayha mndəra mnduha ghazliŋ Yawe ta kəma la Israʼila ya.

³ Ka dzidzihuglaftá tsi ta vliha tskal tskala ya si dzadzaɓiŋ da ni Hizkiya ya. Dzidzihuglafha ta gwirha ŋa vla sgit ŋa Baghalha, dzagwaha ta skwiha wuyay Asera. Ka tsəlɓu tsi ta tsəlɓu ta kəma inda skwiha ta luwa, ka maga slna ŋa taŋ.

⁴ Dzidzihwafha ta gwirha ma həga Yawe, ma vli mna Yawe kazlay na: « Ma Ursalima zbapta yu ta vli ŋa nzakwa hga ɗa ŋa ɗekɗek, » kəʼa ya.

⁵ Ka dzidzihwaftá tsi ta gwirha ma daɓiha his his ma həga Yawe, ŋa vla sgit ŋa inda skwiha ta luwa.

⁶ Ka daraftá tsi ta zwana ni ka skwa pla ghəŋ ta vu ma didiŋa Benʼhinum. Ka dzugu tsi ta zlazlra, nda vza mandaŋ, ka gwaɗ tsi ta gwaɗa ghwaɗaka sulkum, ka laghu tsi da gwal ta gwaɗa nda sulkuma gwal nda rwa, nda gwal ga ɗəgha. Ka dzaʼa tsi ta kəma ta kəma nda maga ghwaɗaka skwi ta kəma Yawe, ka gufanaftá ŋuɗuf.

⁷ Ka famtá tsi ta fwata skwa wuyay ya tsaf tsi ma həga Lazglafta. Tsaw ka Lazglafta si mnanatá Dawuda nda ya nda zwaŋa ni Salumuŋ na: « Ma na həga na nda ya ma Ursalima, ya zbap yu mataba inda mndəra la Israʼila, ŋa fata hga ɗa ŋa ɗekɗek ya.

⁸ Ka ŋava ŋa la Israʼila ɗina ka snatá inda zlahuha ɗa, nda inda skwi ya taghanaf kwalva ɗa Musa ta həŋ katsi, haɗ yu dzaʼa kakraŋgəltá həŋ diʼiŋ nda haɗik ya vlaŋ yu ta dzidzíha taŋ wu, » kaʼa.

⁹ Ama ka mbəɗiŋtá Mənase ta la Yuda nda la Ursalima ta ghwaɗaka tvi, ka magatá həŋ ta ghwaɗaka skwiha ka malaghutá ŋa mndəra sanlaha ma mnduha la mayəm, ya zaɗana Yawe ta kəma la Israʼila ya.

¹⁰ Ka gwaɗganatá Yawe ta Mənase nda mnduha ni, ama ka kwalaghutá həŋ ta fanatá sləməŋ.

¹¹ Mantsa tama, ka ghunanaktá Yawe ta həŋ ta maliha gwal vula mghama la Asur ŋa guyata nda həŋ. Ka ksaghatá həŋ ta Mənase nda hatá tsuhwal ma htsiŋ, ka habafta nda ziɗa ka ghuva tili, ka klaghata da Babila.

¹² Ma tsa nzakwa ni ma ghuya ɗaŋwa ya, ka zbə tsi ta lɓanatá ŋuɗuf ta Yawe, Lazglafta ni, ka hanaganatá tsi ta ghəŋ katakata ta kəma Lazglafta dzidzíha ni.

¹³ Ka ndəɓu tsi ta dzvu da Yawe, ka tsuʼanaftá tsi, ka snaŋtá tsi ta tawa ni, ka vranaktá tsi da Ursalima da vla gá mghama ni. Mantsa tama, ka graftá Mənase kazlay na: Yawe ná, Lazglafta ya kahwathwata kəʼa.

¹⁴ Tahula tsa, ka baftá tsi ta matsak ta hula luwa Dawuda, nda təv dɗakwa fitik, təv Gihuŋ ma didiŋa ka lab dikw ta wa tgha Klipi. Ka wanaftá tsi ta ghərzla Ghufel, ka slriŋtá tsi. Ka pghatá tsi ta maliha gwal vulu ma inda luwaha la Yuda nda matsaka huzlu.

¹⁵ Ka hliŋtá tsi ta tsa lazglaftaha mayəmha nda fwata skwa wuyay ya si dzugwa tsi ma həga Yawe ya, mantsa ya inda gwirha si babaf tsi ta ghwá həga Yawe, nda ya ma Ursalima, ka waɗidiŋta ta hula luwa.

¹⁶ Ka vrəglanaftá tsi ta gwira Yawe, ka vlatá tsi tida ta skwiha ŋa pla ghəŋa zɗaku, nda ŋa rfu, mnanafha guli ta la Yuda ta ksanata taŋ ta slna ta Yawe, Lazglafta la Israʼila.

¹⁷ Ka kɗaŋtá mnduha ta pla ghəŋ ta vliha tskal tskala, ama ŋa Yawe, Lazglafta taŋ kweŋkweŋ.

¹⁸ Pɗakwa slnaha Mənase, nda ndəɓa dzvu mag tsi da Lazglafta ni, nda gwaɗa slayaŋha ta mananata ma hga Yawe, Lazglafta la Israʼila ná, ta slanagha sla lu ma ɗelewera vinda slnaha mghamha la Israʼila.

¹⁹ Ndəɓa dzva ni, nda ya ká Lazglafta tsuʼanaftá tawa ni, inda dmakuha ni nda ghwaɗaka skwiha maga tsi, nda vliha ya babaf tsi ta vliha tskal tskala, nda dzagwatá skwa wuyayha Asera, nda tsatsatá skwa wuyayha makəɗ tsi ka hanaganatá ghəŋ ná, nda vivinda ma ɗelewera Huzay.

²⁰ Ka laghu Mənase da dzidzíha ni, ka paɗamtá lu ma həga ni. Ka lam zwaŋa ni Amuŋ da gá mgham ma vla ni.

Amuŋ, mghama la Yuda

²¹ Hisambsak his mida ima Amuŋ ta nzatá tsi ka mgham. Ka zatá tsi ta vaku his ta gá mgham ma Ursalima.

²² Ka mag tsi ta ghwaɗaka skwi ta wa ira Yawe manda ŋa da ni Mənase. Ka vlə tsi ta skwa pla ghəŋ ŋa tsatsatá skwa wuyayha da ni, ka maga slna ŋa taŋ.

²³ Hanagana a ta ghəŋa ni ta kəma Yawe, manda ŋa da ni wa. Ama sgə nda sga tsatsi katək ta gá dmaku.

²⁴ Ka dzraftá kwalvaha ni ta wi ta ghəŋa ni, ka dzatá həŋ ma həga ni.

²⁵ Ama ka pslatá mnduha tsa haɗik ya ta inda tsa gwal ta dzraftá wi ta ghəŋa mgham Amuŋ ya, ka famtá həŋ ta zwaŋa ni Yusiya ka mgham ma vla ni.