2Rus 32 - Hdi

Ganafta Saŋheriv ta zləŋ ta la Yuda

¹ Tahula tsa ŋərma skwiha maga Hizkiya ya, ka lagha Saŋheriv mghama la Asur liŋtá la Yuda nda vulu. Ka fatá tsi ta ghuɓa ni, ka wawanaftá luwaha ma matsaka huzlu. Dzaʼa zaza yu ta həŋ nda vulu ŋa mblaftá həŋ ŋa nzakwa taŋ ka ŋa ɗa kəʼa ndanata.

² Nghay Hizkiya ta lagha Saŋheriv, ka kuma liŋtá Ursalima nda vulu,

³ ka gi dzərkavatá tsi nda maliha, nda sludziha ni, ka mnanatá həŋ ta dzaʼa naʼuwaftá dzuɓayha ta hula luwa, ka tsuʼaftá həŋ ta ndana mgham.

⁴ Ka tskadaghatá mnduha ta vgha ŋərɓisl, ka naʼuwaftá həŋ ta inda dzuɓayha, nda ghwa ma haɗika taŋ, ka həŋ mantsa: « Kabgawu dzaʼa kəl mghamha la Asur ka sagha mutsaftá imi petsapetsa hadna na? » ka həŋ.

⁵ Ka draftá Hizkiya ta ŋuɗuf, ka bəglaftá tsi ta matsaka huzlu nda mebeŋha tida, ka babagatá tsi tida ta həgaha nda slara nda slara, ka baftá tsi ta sana matsak tahula tsaya guli nda mabli. Ka payanatá tsi ta ghərzla ta hgə lu ka Milu ma luwa Dawuda. Ka mamagaftá tsi ta huzla vulu nda ndəgha, nda zalamha.

⁶ Ka paghatá tsi ta maliha gwal vulu ta ghəŋa mnduha, ka tskanatá tsi ta həŋ ta vata ni ta daɓi ta wa tgha luwa, ka vlaŋtá tsi ta mbraku ta həŋ, kaʼa mantsa:

⁷ « Mbrawa mbra ta vgha, ka ŋavata kuni! Yaha kuni da zləŋ, yaha kuni da ghudzaku ta kəma mghama la Asur, nda dəmbuʼata mnduha kawadaga nda tsi. Mamu amu nda mndu ta mbruta ka malaghutá ya da tsatsi.

⁸ Mbrakwa sluʼuvgha kweŋkweŋ ŋa gwal kawadaga nda tsa mgham ya, ama kawadaga nda amu, mamu Yawe, Lazglafta mu, dzaʼa sagha da kata amu, dzaʼa vulamatá vulu, » kaʼa. Ka vlaŋtá tsa gwaɗa Hizkiya mghama la Yuda ya ta mbraku ta mnduha.

Tsəghatá lwa Saŋheriv ŋa la Ursalima

⁹ Tahula tsa, ka ghunaftá Saŋheriv mghama la Asur ta mnduha ni da Ursalima, ta wanaftá tsatsi nda inda sludziha ni ta luwa Lahis ŋa vulu nda tsi. Ka tsəghanaftá tsi ta lwi ta mgham Hizkiya mghama la Yuda, nda inda la Yuda, ŋa mnanatá həŋ kazlay na:

¹⁰ « Wya ka Saŋheriv, mghama la Asur: “Ta wu fafta kuni ta ghəŋ kəl kuni ka nzamta ma Ursalima, ya wana ŋam ŋa ŋni ta kaghuni na?

¹¹ Kaghuni ta nan Hizkiya ŋa vlatá kaghuni ŋa rwuta ghuni da maya nda ya da ndala imi ma mnay ni kazlay na: Yawe, Lazglafta mu dzaʼa kataptá amu ma dzva mghama la Asur, kəʼa ya.

¹² Tsa Hizkiya ya ta zaɗanatá vliha ni tskal tskala, nda gwirha ni, ka mnanatá la Yuda nda la Ursalima kazlay na: Ta kəma gwir turtuktuk dzaʼa tsəlɓa kuni ta tsəlɓu, tida dzaʼa dra kuni ta urdiha ŋa dray nda dra, kəʼa ya.

¹³ Sna a kuni ta skwi magana ŋni, iʼi nda dzidzíha ɗa ŋa inda mndəra mnduha ta sana haɗikha wu ra? Mamu dər wati ma lazglaftaha taŋ ta kəɗ klaptá həŋ ma dzva ɗa ra?

¹⁴ Mataba inda lazglaftaha tsa haɗik ya zaɗana dzidzíha ɗa nekwnekw ya, wati ya ma həŋ ta laviŋta zluʼaptá mnduha ni ma dzva ɗa, dzaʼa kəl Lazglafta ghuni ka zluʼaptá kaghuni ma dzva ɗa na?

¹⁵ Ndanana ná, nana kaghuni a ta nan Hizkiya wu ra! Ma ghuɓu tsi ta kaghuni manda tsa, ma zlghanaf kuni! Haɗ sana lazglafta, sana mndəra mndu, dər sana gá mgham ta laviŋta zluʼagaptá mnduha ni ma dzva ɗa, dər ma dzva dzidzíha ɗa wa. Ɓalavakata lazglaftaha ghuni yeya dzaʼa zluʼagaptá kaghuni ma dzva ɗa rki?” kaʼa, » kaʼa.

¹⁶ Ka kəɗaŋtá gwal ghunaya Saŋheriv ta raraza Yawe, Lazglafta, nda kwalva ni Hizkiya.

¹⁷ Ka vindaftá Saŋheriv ta ɗelewera razu ŋa Yawe, Lazglafta la Israʼila, nda mnay manda ya ŋa ni: « Manda va tsa lazglaftaha mndəra mnduha sana haɗikha ta traptá zluʼagaptá mnduha taŋ ma dzva ɗa ya, manda va tsaya Lazglafta Hizkiya, zluʼagapta a ta mnduha ni ma dzva ɗa wu, » kaʼa.

¹⁸ Ka hlaftá tsa gwal ghunaya ni ya ta wi nda mbraku nda gwaɗa la Yuda ŋa ganaftá zləŋ ka ghudzanaftá la Ursalima ta nghagata ta matsak, nda ya ŋa laviŋta zluʼaghutá tsa luwa ya.

¹⁹ Ka gwaɗ həŋ ta gwaɗa ta ghəŋa Lazglafta la Ursalima, manda skwi ta ghəŋa lazglaftaha mndəra sana mnduha ta ghəŋa haɗik, tsatá skwata dzva mnduha ya.

Zluʼagapta Yawe ta Hizkiya ma dzva Saŋheriv

²⁰ Ka ndəɓu i mgham Hizkiya nda anabi Isaya zwaŋa Amuts ta dzvu ta ghəŋa ni, ka wahu həŋ ta wahu da Lazglafta ta luwa.

²¹ Mantsa tama, ka ghunagatá Yawe ta duhwala ni. Ka zaɗanatá tsi ta inda gwal viɗviɗ ma vulu ma ghuɓa mghama la Asur, gwal dagaladagala, nda maliha ta ghəŋa gwal vula taŋ. Tahula tsa, ka vraghutá mgham ta haɗika ni nda hbatá hula ta ghəŋ. Ka lam tsi da həga lazglafta ni, ka dzatá vərɗa zwana ni nda kafay.

²² Mantsa ya ká Yawe kataptá Hizkiya nda gwal nzakw ma Ursalima ma dzva Saŋheriv mghama la Asur, nda ya ma dzva inda ghumaha taŋ. Ka vlaŋtá tsi ta nzakw nda zɗaku nda gwal ta wanaftá həŋ.

²³ Ka hladaghatá ndəghata mnduha ma Ursalima ta mbəhuha ŋa Yawe, mantsa ya mbəhuha nda sgit ta həŋ ŋa Hizkiya, mghama la Yuda. Daga ma tsa fitik ya, ka mutsaftá tsi ta glaku ta wa ira inda mndəra mnduha ta ghəŋa haɗik.

Ɗaŋwa Hizkiya nda gla ghəŋa ni

²⁴ Ma tsa fitikha ya, ka ksaftá ɗaŋwa drəsl ta Hizkiya ŋa dzaʼa da haɗik. Ka ndəɓu tsi ta dzvu da Yawe, ka zlghanaftá Yawe ta wi, ka vlaŋtá ŋizla mbakwa ni.

²⁵ Ama dabga laghu la gla ghəŋ suh da ŋuɗufa Hizkiya, rfanagha a ta Yawe ta ghəŋa tsa zɗaku magana tsi ya wu. Ka dɗanaghata gufatá ŋuɗufa Yawe, nda ya ta ghəŋa la Yuda, nda la Ursalima.

²⁶ Mantsa tama, ka hanaganatá Hizkiya ta ghəŋ ma tsa gla ghəŋa ni ya, nda la Ursalima tani, ka kwal gufatá ŋuɗufa Yawe dɗanaghatá həŋ ta fitika nzakwa Hizkiya.

²⁷ Ka mutsaftá Hizkiya ta gadghəl nda glaku katakata. Ka babaftá tsi ta dzuguviha ɗifa skwa gadghəl ŋa pgha kfura tsedi, nda dasu, nda palaha nda bla nda bla dzva ni, nda urdiha, nda zalamha, nda ya nda inda huzlaha mamu sgita taŋ.

²⁸ Ka babaftá tsi ta dzuguviha ŋa pagha nimaya, nda ima inabi ka nunu, nda rɗi. Ka magaftá tsi ta glakam ŋa pgha slaha kavghakavgha, nda kalakala bra rina fisik.

²⁹ Ka babaftá tsi ta luwaha, mamu ndəghata bra rina fisik, nda slaha ni guli, kabga vlaŋta Lazglafta ta skwi ta malaghutá mbraku.

³⁰ Tsa Hizkiya ya ta nuʼuwaftá dzuɓay ta saha ma Gihuŋ, ka mbaɗadanata nda təv dɗakwa fitik ma luwa Dawuda. Ta katsay Hizkiya ta inda skwi ya ta mag tsi.

³¹ Ama ma fitika ghunadaghata maliha ma Babila ta gwal ghunay, ŋa snanatá tsa mandərmimi ta maguta ma haɗika ni ya, ka zlanavatá Lazglafta ŋa dzəghay, ŋa snaŋtá inda skwi ma ŋuɗufa ni.

³² Pɗakwa slnaha Hizkiya, nda zɗakuha ya maga tsi ná, vivindam vivinda lu ɗelewera suna anabi Isaya, zwaŋa Amuts, nda ya ma ɗelewera vivinda slnaha mghamha la Yuda nda la Israʼila.

³³ Ka laghu Hizkiya da dzidzíha ni, ka paɗamtá lu ta tva ŋladafta ta daɓa kuluha zwana Dawuda. Ka vlaŋtá inda la Yuda, nda la Ursalima ta glaku ma mtata ni. Ka lam zwaŋa ni Mənase da gá mgham ma vla ni.