2Rus 31 - Hdi

Payay Hizkiya ta vrəglanaftá inda slnaha həga Yawe

¹ Manda kɗiŋta lu ta tsa skalu ya, ka sliʼaftá la Israʼila si hada demdem, ka laghwi da luwaha la Yuda, ka dzaɓiŋtá həŋ ta dzagwatá palaha, ɓaliŋha həŋ ta skwa wuyayha Asera, ka zlazliŋta tesneʼ ta vliha skwa wuyay tskal tskala, nda gwirha ma inda luwaha la Yuda, nda la Biŋyamiŋ, mantsa ya da la Ifrayim, nda la Mənase. Tahula dzaɓiŋta inda la Israʼila nekwnekw, ka vraghutá həŋ da luwaha taŋ, dər wa ta haɗika za həga ni.

² Ka vrəglanaftá mgham Hizkiya ta bakuha gwal dra skwi ŋa Lazglafta nda la Levi, taɓta bakwa taŋ ta bakwa taŋ, dər wa ma gwal dra skwi ŋa Lazglafta nda la Levi ma slna ni: Pla ghəŋ ŋa dray tsuh tsuh, nda pla ghəŋa zɗaku, slna pgha mndu, nda fa laha, nda zləzləvu ta wa tghaha daɓiha həga Yawe.

³ Ka vlatá mgham ta faway turtuk mataba skwiha ni ŋa pla ghəŋ ŋa dray tsuh tsuh: Pla ghəŋ ŋa dray tsuh tsuh ga sərɗək nda ya ga hawu, nda pla ghəŋ ŋa dray tsuh tsuh ŋa sabatha, nda ya ma inda ngha tili, nda skaluha, manda ya nda vinda ma zlaha Yawe.

⁴ Tahula tsa, kaʼa nda gwal ta nzakw ma Ursalima mantsa: « Vlaŋwa vla ta mayaka gwal dra skwi ŋa Lazglafta nda la Levi, kada ndiʼafta həŋ ta vgha ta zlaha Yawe, » kaʼa.

⁵ Manda snanamta lu ta tsa gwaɗa ya ta mnduha, ka valatá la Israʼila katakata ta taŋtaŋa tskatá skwi ta vwah, nda ima inabi ta ka nunu, nda rɗi, nda zuɗum, nda inda mndərga skwiha ta hvata lu ta vwah. Ka hladaghatá həŋ dərzih ta zaka skwiha demdem.

⁶ Manda va tsaya guli, ka valatá la Israʼila nda la Yuda ta nzakw ma luwaha Yuda ta zaka slaha nda rina fisik, nda zaka mbəhuha ya faghu lu ŋa Yawe, Lazglafta taŋ. Ka paghatá həŋ ka bgu ka bgu.

⁷ Ka zlraftá lu ta tsaka tsa bguha ya ma mahkəna tili, ka kɗiŋtá lu ma mandəfáŋa tili.

⁸ Ka lagha i Hizkiya nda maliha da naghanatá tsa bguha ya, ka rfu həŋ ta Yawe nda mnduha ni, la Israʼila.

⁹ Ka ɗawaŋtá Hizkiya da gwal dra skwi ŋa Lazglafta, nda la Levi ta ghəŋa tsa bguha ya.

¹⁰ Mantsa tama, ka Ghazaryahu mali ta ghəŋa gwal dra skwi ŋa Lazglafta ma zivira Tsaduk mantsa: « Daga ka yawu zlrafta hlaktá mbəhuha da həga Yawe ná, mamu skwa zay ka baghaku, nda ya ka haslay katakata, kabga tfanagha tfa Yawe ta wi ta mnduha ni. Tsa haslata ni ya nana, » kaʼa.

¹¹ Ka Hizkiya mnafta mantsa: « Papayanawa papaya ta dzuguviha ŋa pgha skwiha ma həga Yawe, » kaʼa. Ka papayanatá lu.

¹² Ka hladaghatá lu nda fatá ghəŋ ta mbəhuha, nda zaka, nda skwiha pghaghu lu ŋa Lazglafta. Kananyahu mnda la Levi mali ŋa nghapta ka tsa skwiha ya, kawadaga nda zwaŋa ma ni Simghi ka slufa ni.

¹³ Ka mag i Yəhiʼel, nda Ghazazyahu, nda Nahat, nda Ghasaʼel, nda Yəremut, nda Yuzavat, nda Iliʼel, nda Yismahyahu, nda Mahat, nda Benaya, ta slna nghapta mista i Kananyahu nda Simghi, pgham mgham Hizkiya nda Ghazaryahu, mali ta ghəŋa həga Lazglafta ta həŋ ya.

¹⁴ Kureʼ, zwaŋa Yimna mnda la Levi, ta ngha wa tgha nda ta tva safa fitik, ka famtá lu ŋa tsaʼuwa mbəhuha ta vlata lu nda ɗvay ŋuɗuf ŋa Lazglafta, ŋa dagaptá ta skwiha ta hlapta lu ka ŋa Yawe, nda skwiha ta ghuɓuta.

¹⁵ Ma luwaha gwal dra skwi ŋa Lazglafta ná, mamu i Ghedeŋ, nda Minyamiŋ, nda Yəhusuwa, nda Səmaghyahu, nda Amarya, nda Səkaŋyahu ta fatá ghəŋ ŋa kataŋta ma dgay nda tva ni ŋa zwana ma taŋ, taɓta bakwa taŋ ta bakwa taŋ, kul haɗ galay nda gala kazlay glata mndu yeya, zwani yeya kəʼa wa.

¹⁶ Zlanaha lu ta tsa zgwana vivindaf lu daga ta imi hkən ka laghu ta kəma ya. Ka dgə həŋ ta tsa skwiha ya ŋa inda gwal ta lami da həga Yawe da maga slna taŋ, taɓta dagatá slna taŋ ma bakwa taŋ.

¹⁷ Ka dgə həŋ ŋa tsa gwal dra skwi ŋa Lazglafta vivindaftá lu ta həga ta həga, nda tsa la Levi sliʼafta ni ta imi hisambsak ka laghwi ta kəma taɓta dagatá slna taŋ ma bakwa taŋ ya.

¹⁸ Ka vivindaftá lu ta həŋ nda zwana taŋ miɗiɗa, nda miʼa taŋ, nda zwana zgwana taŋ, nda kwagha taŋ, mantsa ya ŋa guyatá ghəŋ demdem, kabga fa fa həŋ ta ghəŋa taŋ inda fitik ŋa nzakway nda ghuɓa.

¹⁹ Gwal dra skwi ŋa Lazglafta, ma zivira Haruna ma zwana luwaha ta wawanaftá tsa luwaha taŋ ya, zabap zaba lu ta sanlaha mataba taŋ nda hga taŋ nda hga taŋ ma inda vli ŋa daga mayaka inda zgwana mataba gwal dra skwi ŋa Lazglafta, nda ya nda inda la Levi vivindaf lu ta həŋ.

²⁰ Tsaya skwi maga Hizkiya ta inda kwakwara la Yuda. Ka magatá tsi ta skwi ɗina, tɗukwa, nda kahwathwata ta kəma Yawe, Lazglafta ni.

²¹ Ma inda skwi maga tsi ta nghanaghatá slna həga Lazglafta, nda tagha skwa ni, nda zlahu ni, nda zbay ni ta Lazglafta ni, nda hya hya ŋuɗufa ni kəʼa ta magay, ta katsay guli.