2Rus 30 - Hdi

Paya skala Pak

¹ Ka ghwanaftá Hizkiya ta gwal ghunay da la Israʼila nda la Yuda demdem, ka vivindanaftá tsi ta ɗelewerha guli ta la Ifrayim nda la Mənase ŋa sagha taŋ da həga Yawe ma Ursalima da skala Pak ŋa vlaŋtá sgit ta Yawe, Lazglafta la Israʼila.

² Nziya nza tsi, si tskava tska i mgham nda maliha ta maganatá slna, nda guyatá ghəŋ demdem ma Ursalima, ka dzraftá həŋ ta skala Pak ma mahisa tili.

³ Mutsaf a lu ta magaftá tsa Pak ya ma fitika ni manda ya snu lu wu, kabga slaghu a gwal dra skwi ŋa Lazglafta ta ghwaɓiŋtá nzakwa taŋ wu, ta tskava a mnduha ma Ursalima guli wa.

⁴ Ka zɗəganatá tsa gwaɗa ya ta mgham nda guyatá ghəŋ demdem.

⁵ Ka kuratá həŋ ta hagaŋtá la Israʼila demdem, daga ma Bəʼerseva kətsuk da Daŋ, ŋa sliʼakta lu da Ursalima skala Pak ŋa vlaŋtá sgit ta Yawe, Lazglafta la Israʼila, kabga sira a gwal ta skalay manda ya nda vinda wa.

⁶ Ka sliʼaghutá gwal ghunay ta inda kwakwara la Israʼila nda la Yuda, nda ɗelewerha thaf i mgham nda maliha ta dzva taŋ tida. Manda zlahu ya mna mgham, ka həŋ mantsa: « La Israʼila, vragaghawa vra da Yawe, Lazglafta Abraham, nda Izak, nda Israʼila, kada vrakta tsi da kaghuni ta pɗaku, kaghuni gwal ta ndapta ma dzva mghama la Asur ya.

⁷ Ma nza kuni manda dadaha ghuni nda zwana ma ghuni! Magana maga həŋ ta ghwaɗaka skwi ta Yawe, Lazglafta dzidzíha taŋ, ka niŋtá tsi ta həŋ ka skwi ta gá zləŋ, manda na ta nghə kuni ndanana ya.

⁸ Ma təŋanaf kuni ta ghəŋ manda ŋa dadaha ghuni! Vlaŋwa vla ta ghəŋa ghuni ta Yawe, vragaghawa vra da vla ni nda ghuɓa, vli ya faghu tsi ŋa ɗekɗek. Maganawa maga ta slna ta Yawe, Lazglafta ghuni, ŋa mbəɗaghuta gufatá ŋuɗufa ni katakata ta vgha nda kaghuni.

⁹ Ka vragagha vra kuni da Yawe, dzaʼa nzakway zwana ma ghuni nda zwana ghuni ka skwa hiɗahiɗa da gwal si ta hlaghatá həŋ, ŋa vrakta taŋ ta na haɗik na. Yawe, Lazglafta ghuni ná, dagala zɗakatahuɗi nda hiɗahiɗa da tsi. Ka vrak vra kuni da tsi, haɗ dzaʼa klaghutá ghəŋ wu, » ka həŋ.

¹⁰ Ka sliʼaghatá gwal ghunay da ra luwaha ta haɗika la Ifrayim nda la Mənase kətsuk da la Zəvuluŋ, ama ka ghuɓasu lu ta həŋ, ka gag lu ta həŋ.

¹¹ Ama ka hanaganatá sanlaha ma mndəra la Aser, nda la Mənase, nda la Zəvuluŋ ta ghəŋ, ka lagha həŋ da Ursalima.

¹² Ma Yuda guli, ka vlaŋtá Lazglafta ta ŋuɗuf ka skwa turtuk ta həŋ ŋa nzata taŋ nda dzratá ghəŋ, ka snatá gwaɗa mgham, nda ŋa maliha, manda ya mna gwaɗa Yawe.

Skala Pak

¹³ Ka sliʼadaghatá ndəghatá mnduha da Ursalima ŋa skala buradi kul haɗ is mida ma mahisa tili. Tska vgha dagala ya.

¹⁴ Ka sliʼaftá həŋ dzadzaɓiŋtá gwirha ya si ta vlə lu ta pla ghəŋ ta həŋ ma Ursalima, ka dzaɓiŋtá həŋ ta inda gwirha si ta drə lu ta urdiha ŋa dray nda dra ta həŋ, ka pghidiŋta da lika Kidruŋ.

¹⁵ Ka hanatá həŋ ta Pak baɗ maghwaŋpəɗ fwaɗa fitik ma mahisa tili. Nda hbatá hula ta ghəŋ, ka ghwaɓiŋta gwal dra skwi ŋa Lazglafta, nda la Levi ta nzakwa taŋ, ka hlaktá həŋ ta skwa pla ghəŋ ŋa dray tsuh tsuh da həga Yawe.

¹⁶ Ka nzanzatá həŋ ma vla slna ya snu həŋ, valaŋ lu ta həŋ taɓta zlaha Musa, mnda Lazglafta. Ka wutsik gwal dra skwi ŋa Lazglafta ta us ta zlghafta həŋ da la Levi.

¹⁷ Nda ndəgha mnduha mataba guyatá ghəŋ kul fatá ghəŋ, tkweʼ ta la Levi ka hnata taŋ ta Pak ŋa inda gwal kul tsaɗaku, kada nzakwa tsa pla ghəŋ ya nda fa ka ŋa Yawe,

¹⁸ kabga ta dagala mnduha la Ifrayim, nda la Mənase, nda la Yisakar, nda la Zəvuluŋ, kul tsaɗaku. Ka zutá həŋ ta Pak kul magata manda ya nda vinda. Tsaya kəl Hizkiya ka ndəɓatá dzvu ta ghəŋa taŋ, kaʼa mantsa: « Yawe mnda zɗaku, slərɓanap slərɓa ta zughu ta həŋ,

¹⁹ ta inda gwal ta fatá ŋuɗufa taŋ, ka zba Lazglafta, Yawe, Lazglafta dzidzíha taŋ, dər má tsaɗa a həŋ manda ya ta raku ka ŋa skwi nda fa ka ŋa Yawe! » kaʼa.

²⁰ Ka tsuʼanaftá Yawe ta Hizkiya, ka huzlinistá tsi ta həŋ.

²¹ Mantsa tama, ka skal la Israʼila ma Ursalima ta skala buradi kul haɗ is mida ka fitik ndəfáŋ nda rfu katakata. Inda fitik la Levi nda gwal dra skwi ŋa Lazglafta ta zləzləva Yawe nda inda ghudzaga huzla skalu katakata ŋa vlaŋtá sgit ta Yawe.

²² Ka vlaŋtá Hizkiya ta mbraku ta inda la Levi ta ŋavata ka maga slna nda mahizl ŋa Yawe. Ma tsa fitik ndəfáŋ ya, ka zə mnduha ta skwa zaya tsa skalu ya, ka vlə həŋ ta pla ghəŋa zɗaku, ka rfa Yawe, Lazglafta dzidzíha taŋ.

²³ Ka kuratá guyatá ghəŋ demdem ta zəglatá fitik ndəfáŋ. Ma tsa fitikha ta sgavaghata ya, ka skalu həŋ ta tsa skala ya nda rfu nda rfu,

²⁴ kabga pghana pgha Hizkiya mghama la Yuda ta guyatá ghəŋ ta lghəŋ dəmbuʼ (1.000), nda rina fisik dəmbuʼ ndəfáŋ (7.000). Ka vlatá maliha guli ta lghəŋ dəmbuʼ (1.000), nda rina fisik dəmbuʼ ghwaŋ (10.000). Nda ndəgha gwal dra skwi ŋa Lazglafta ta fatá ghəŋa taŋ.

²⁵ Ka rfu guyatá ghəŋa la Yuda demdem, nda gwal dra skwi ŋa Lazglafta, nda la Levi, nda inda tembera mndu ta sagha ma Israʼila, nda mayəmha ta saha ma haɗika la Israʼila, nda ya ma Yuda ta rfu.

²⁶ Ka rfu lu ta rfu katakata ma Ursalima, kabga daga ma fitika gay Salumuŋ, zwaŋa Dawuda ta mgham ta ghəŋa la Israʼila ná, ta ngha a lu ta skwi manda va tsaya ma Ursalima wa.

²⁷ Ka sliʼaftá gwal dra skwi ŋa Lazglafta ka la Levi, ka tfanaghatá wi ta mnduha. Ka snagatá Lazglafta ka həŋ, ka ɓhatá ndəɓa dzva taŋ trezekw da vla nzakwa ni nda ghuɓa ta luwa.