2Rus 3 - Hdi

Bafta Salumuŋ ta həga Lazglafta

¹ Ka zlraftá Salumuŋ ta ba həga Yawe ma Ursalima, ta kuɗuŋura Muriya, ma vli ya marava Yawe da da ni Dawuda, ma vli si payaftá Dawuda ta blikwa Urnaŋ mnda la Yəbus ya.

² Ta mafwaɗa vakwa ni ta gá mgham zlraftá tsi ta bay, baɗ mahisa fitik ma mahisa tili.

³ Wya nzakwa tughwa tsa həga Lazglafta baf Salumuŋ ya: Mitər hkən mbsak slrakwa ni, mitər ghwaŋ bughwata ni.

⁴ Tsa rmak nda ta kəma ya ná, mitər ghwaŋ slrakwa ni, ka guram nda bughwata tsa həga ya, mitər mkuʼ mbsak lafa ni ta luwa. Ka zlərɓatá tsi nda dasu ghenen nda ma huɗi.

⁵ Ka zləɓanavatá tsi nda katakwa bərus ta vata həga tsa huɗi dagala ya, ka zlərɓata nda dasu ghenen. Ka rkanaftá tsi ta rka nda tsatsatá zlizlam nda ya nda tsatsatá ziɗaha.

⁶ Ka rkanaftá tsi ta rka ta tsa həga ya nda palaha ɗina ɗina. Ta haɗika Parvayim hlagaghata lu ta dasu kəl lu ka magay.

⁷ Ka zlərɓatá tsi ta tsa həga ya nda dasu: Nda matala pliɗa ni, nda tva lami dida, nda vata həga ni, nda wa tghaha ni. Ka tsatsaftá tsi ta kerubaha ta vata həga.

⁸ Tsa dzuguvi nda ma huɗi ta hgə lu ka vli ta ghuɓuta ya, mitər ghwaŋ slrakwa ni, ka guram nda slrakwa bughwata tsa həga ya, mitər ghwaŋ bughwata ni. Nda kiluʼa dasu ghenen dəmbuʼ hisambsak (20.000) zlərɓata tsi ta tsa həga ya.

⁹ Ndəgakwa dasu ŋa maga kusaha ná, ta magay ta gram mkuʼ dərmək (600). Ka zlərɓatá tsi guli nda dasu ta dzuguviha nda ta ghəŋa tsa həga ya.

¹⁰ Ka tsatsaftá tsi ta kerubaha his ma tsa vli ta ghuɓuta ya, ka zlərɓata nda dasu.

¹¹ Mitər ghwaŋ slrakwa zlambakha tsa kerubaha ya. Sana zlambaka tsa taŋtaŋ ya ná, mitər his nda rita slrakwa ni, ka labi da ksaŋtá vata həga, sana zlambaka ni, mitər his nda rita ta labi ksaŋtá zlambaka tsa sana keruba ya.

¹² Sana zlambaka tsa sana keruba ya guli, mitər his nda rita slrakwa ni, ka labi ksaŋtá sana vata həga. Tsa sana zlambaka ni ya guli, mitər his nda rita slrakwa ni, ka labi guyaftá vgha nda zlambaka tsa taŋtaŋa keruba ya.

¹³ Slrakwa gwata zlambakha tsa kerubaha ya ná, mitər ghwaŋ ya. Slaslada nda slaslada həŋ, ka mbaɗatá kuma nda təv tsa dzuguvi dagala ya.

¹⁴ Ka magaftá tsi ta zlala ka kubwalkubwal, nda dva ghuz, nda ya dvaŋdvaŋa ka liŋ kulefeɗfeɗa, ka gamtá tsa kerubaha ya mida.

Guguɗiha həga Lazglafta

¹⁵ Ka magaftá tsi ta kəma tsa həga ya ta guguɗiha his ka mitər ghwaŋpəɗ ndəfáŋ nda rita lafa ni ta luwa, nda dzugwa ka mitər his nda rita nda rita ta ghəŋa taŋ.

¹⁶ Ka mamaganaftá tsi ta tsa guguɗiha ya ta madagalgala ziɗa ka wawanamta ta ghəŋa tsa guguɗiha ya, ka mamagaftá tsi ta tsatsatá rimuŋha dərmək (100), ka hahuŋta ta wa tsa ziɗaha ya.

¹⁷ Ka dzagwatá tsi ta tsa guguɗiha ya ta kəma tsa həga Lazglafta ya, nda ga zeghwi sani, nda ga zlaɓa sani. Yahiŋ kəʼa ta hga tsa nda ga zeghwi ya, Bughaz kəʼa ta hga tsa nda ga zlaɓa ya.