2Rus 29 - Hdi

Tsaɗiŋta Hizkiya ta həga Yawe

¹ Hisambsak hutaf mida ima Hizkiya ta nzatá tsi ka mgham, ka zatá tsi ta vaku hisambsak təmbay mida ta gá mgham ma Ursalima. Aviya hga ma ni, makwa Zakari.

² Ka mag tsi ta skwi tɗukwa ta wa ira Yawe, manda va ŋa dzidza ni Dawuda.

³ Tsatsi, ta taŋtaŋa vakwa ni ta gá mgham, ma tila mataŋtaŋ, ka gwaniŋtá tsi ta wa tghaha həga Yawe, ka papayafta.

⁴ Ka hagadaghatá tsi ta gwal dra skwi ŋa Lazglafta, nda la Levi, ka tskanatá tsi ta daɓi nda təv safa fitik.

⁵ Kaʼa nda həŋ mantsa: « Fihawa fa ta sləməŋ la Levi! Ndanana, ghwaɓiŋwa ghwaɓa ta nzakwa ghuni. Tahula tsa, ka ghwaɓiŋta kuni ta həga Yawe, Lazglafta dzidzíha ghuni. Hligiŋwa hla ta skwiha kul tsaɗaku ma vli nda ghuɓa.

⁶ Guv ga dadaha mu ta krughuvi, ghwaɗaka skwi maga həŋ ta wa ira Yawe, Lazglafta mu. Zlanava zla həŋ, ka klaghutá ghəŋ ta vata həga Yawe, ka mbəɗanatá hul.

⁷ Ka hahaftá həŋ guli ta wa tghaha həga Yawe, ka matanatá həŋ ta pitirlaha. Zlana zla həŋ ta vlay ŋa Lazglafta la Israʼila, ta dər urdi ŋa dray nda dra, dər skwi ŋa pla ghəŋ ŋa dray tsuh tsuh ma vli nda ghuɓa.

⁸ Tsaya kəl ŋuɗufa Yawe ka gufafta ta ghəŋa la Yuda nda la Ursalima, ka niŋtá tsi ta həŋ ka skwi ta gá zləŋ, nda skwa ndərmimi, nda ya ka skwa ghuɓasay, manda na ta nghə kuni nda ira ghuni na.

⁹ Ka pslatá lu ta dzidzíha mu nda kafay, ka hlaghatá zwana mu nda kwagha mu, nda miʼa mu da gá vuʼa.

¹⁰ Ama ndanana, kura kura yu ma ŋuɗufa ɗa ta dzraftá wi nda Yawe, Lazglafta la Israʼila, kada mbəɗaghuta tsa gufatá ŋuɗufa ni katakata ya ta vata amu.

¹¹ Ndanana, zwana ɗa, yaha kuni da gagəltá tsuwa nda tsa gwaɗa ya, kabga kaghuni zabapta Yawe, ŋa sladata ghuni ta kəma ni, ka maganatá slna, ka dra urdi ŋa dray nda dra ŋa ni, » kaʼa.

¹² Mantsa tama, wya la Levi ta zlraftá maga slna: Mahat zwaŋa Ghamasay, nda Yuʼel zwaŋa Ghazaryahu ta uʼa la Kehat. Kis zwaŋa Ghavdi, nda Ghazaryahu zwaŋa Yəhalelʼel ta uʼa la Mərari. Yuʼah zwaŋa Zima, nda Ghedeŋ zwaŋa Yuʼah ta uʼa la Gersuŋ.

¹³ I Simri nda Yəghiʼel ta uʼa la Ilitsafaŋ. I Zakari nda Mataniya ta uʼa la Asaf.

¹⁴ I Yəhiʼel nda Simghi ta uʼa la Hemaŋ. I Səmaghya nda Ghuziʼel ta uʼa la Yədutuŋ.

¹⁵ Ka tskanatá həŋ ta zwana ma taŋ, ka ghwaɓiŋtá həŋ ta ghəŋa taŋ, ka lagha həŋ da tsaɗiŋtá həga Yawe, taɓta gwaɗa mnaf mgham, manda va mna Yawe.

¹⁶ Ka lam gwal dra skwi ŋa Lazglafta da huɗa həga Yawe da tsaɗigiŋta. Ka hligiŋtá həŋ ta inda skwiha kul tsaɗaku slanagha həŋ ma həga Yawe, ka pghata ma daɓa həga Yawe. Ka hlaftá la Levi hada, ka hlaghata diʼiŋ da lika Kidruŋ.

¹⁷ Baɗ taŋtaŋa fitik ma tila mataŋtaŋ zlraftá həŋ ta ghuɓa həga Yawe. Baɗ matghasa fitik ma tsa tili ya, ka ɓhadaghatá həŋ da rmaka tsa həga ya. Ka magatá həŋ ta fitik tghas ta ghuɓa həga Yawe. Ka kɗiŋtá həŋ baɗ maghwaŋpəɗ mkuʼa fitik ma tila mataŋtaŋ.

¹⁸ Ka lam həŋ da mgham Hizkiya, ka həŋ mantsa: « Tsaɗiŋ tsaɗa ŋni ta inda həga Yawe, nda gwira pla ghəŋ ŋa dray tsuh tsuh tida nda inda huzla ni, mantsa ya tabəla buradi ŋa Lazglafta nda inda huzla ni.

¹⁹ Inda tsa huzlaha ya dmanaf mgham Ahaz ma fitika gá mghama ni, nda ma ghwaɗaka skwi maga tsi ya ná, vranaf vra ŋni manda va vla ni, ghuɓiŋ ghuɓa ŋni. Waʼa həŋ ta kəma gwira Yawe, » ka həŋ.

Lfiɗglanaftá həga Yawe

²⁰ Ka tsavaftá mgham Hizkiya wrək tgha, ka tskanatá maliha ma luwa, ka laf tsi kawadaga nda həŋ da həga Yawe.

²¹ Ka hladaghatá həŋ ŋa pla ghəŋ ŋa ɗawa pla dmaku ta lghəŋ ndəfáŋ, nda maŋazak ndəfáŋ, nda slaɓalakwa tuwak ndəfáŋ, nda dugzum ndəfáŋ, ŋa gwal ga mgham, nda tsa vli nda ghuɓa ya, nda ŋa la Yuda. Ka mgham nda zivira Haruna, gwal ta dra skwi ŋa Lazglafta ya mantsa: « Darafwa dara ta gwira Yawe, » kaʼa.

²² Ka ghwaghwanaftá gwal dra skwi ŋa Lazglafta ta tsa slaha ya, ka tataʼatá us taŋ, ka wutsikafta ta gwir. Ka ghwaghwanaftá həŋ ta maŋazakha guli, ka wutsikaftá usa taŋ ta gwir. Ka ghwaghwanaftá həŋ ta tsa slaɓalakwa tuwakha ya, ka wutsikaftá usa taŋ ta gwir.

²³ Tahula tsa, ka hladaghatá həŋ ta dugzumha ŋa ɗawa pla dmaku ŋa slərɓa zughu ta kəma mgham nda guyatá ghəŋ, ka pghaftá həŋ ta dzvuha taŋ ta həŋ.

²⁴ Ka ghwaghwanaftá gwal dra skwi ŋa Lazglafta, ka paghaftá usa taŋ ta gwir ŋa pla ghəŋ ŋa slərɓanaptá zughu ta inda la Israʼila, kabga mna mna mgham kazlay na, skwa pla ghəŋ ŋa dray tsuh tsuh nda skwa pla ghəŋ ŋa ɗawa pla dmaku ná, dzaʼa nzakway tsaha ya ka ŋa inda la Israʼila, kəʼa.

²⁵ Ka pghatá tsi ta la Levi ma həga Yawe nda ndeŋndeŋ nda ndeŋndeŋ, nda htimbil nda htimbil, nda kəzliŋkəzliŋ nda kəzliŋkəzliŋ taɓta zlaha Dawuda, nda Gat slayaŋa mgham, nda anabi Nataŋ. Tsa zlahu ná, Yawe ya ta mnata nda ma wa anabiha ni.

²⁶ Ka klaftá la Levi ta vli nda huzla skalu mamagaf Dawuda, ta nzanzatá gwal dra skwi ŋa Lazglafta nda talakwaha.

²⁷ Ka mnaftá Hizkiya ta vlatá skwa pla ghəŋ ŋa dray tsuh tsuh ta gwir. Ma fitika zlrafta lu ta tsa pla ghəŋ ya, zlrafta lu ta fa laha ŋa Yawe, nda vya tsa talakwaha ya nda dza huzla mamagaf Dawuda, mghama la Israʼila.

²⁸ Ka dzadzatá inda guyatá ghəŋ ta ghəŋ ta haɗik, ka fə gwal fa laha ta laha, ka vyu lu ta talakwaha, inda ni ha ka kɗatá tsa pla ghəŋ ŋa dray tsuh tsuh ya.

²⁹ Manda kɗiŋta lu ta vlatá skwa pla ghəŋ ŋa dray tsuh tsuh, ka tsəlɓatá mgham nda inda gwal hada, ka dzadzatá həŋ ta ghəŋ ta haɗik.

³⁰ Tahula tsa, ka i mgham Hizkiya nda maliha mnanatá la Levi mantsa: « Zləzləvawa zləzləva ta Yawe nda lahaha Dawuda, nda ŋa Asaf, slayaŋ ya, » ka həŋ. Ka zləzləvu həŋ nda rfu nda rfu, ka dzadzatá həŋ ta ghəŋ, ka tsətsəlɓata.

³¹ Ka Hizkiya tama mantsa: « Ndanana, ya wana pgham pgha lu ta kaghuni ŋa maganatá slna ta Yawe ya, gavagaghawa gava, hlagaghawa hla ta skwiha ŋa pla ghəŋ, nda mbəhuha da həga Yawe ŋa maraŋtá rfu, » kaʼa. Ka hladaghatá guyatá ghəŋ ta skwiha ŋa pla ghəŋ, nda mbəhuha ŋa maraŋtá rfu. Ka vlatá inda gwal ta muvla ta skwiha ŋa pla ghəŋ ŋa dray tsuh tsuh.

³² Mbsaka tsa skwiha ŋa pla ghəŋ ŋa dray tsuh tsuh hladagha guyatá ghəŋ ya ná, lghəŋ ndəfáŋ mbsak, nda maŋazak dərmək (100), nda slaɓalakwa maŋazak his dərmək (200) həŋ. Inda tsa rini ya, ka vlatá lu ka skwa pla ghəŋ ŋa dray tsuh tsuh ŋa Yawe.

³³ Ka pghaghutá lu guli ŋa dray ta sla mkuʼ dərmək (600), nda rina fisik dəmbuʼ hkən (3.000).

³⁴ Ama slaghu a gwal dra skwi ŋa Lazglafta ŋa hanay wu, ka tranaghata hlatá huta ta inda tsa skwa pla ghəŋ ŋa dray tsuh tsuh ya ta həŋ. Ka kataŋtá sanlaha ma zwana ma taŋ la Levi ta həŋ, ha ka kɗiŋtá tsa slna ya, ma kɗaku sanlaha ma gwal dra skwi ŋa Lazglafta ta ghuɓiŋtá nzakwa taŋ, kabga mal la Levi mala fatá ŋuɗuf taŋ, ka ŋa gwal dra skwi ŋa Lazglafta.

³⁵ Ndəghu ndəgha skwa pla ghəŋ ŋa dray tsuh tsuh, nda ghwaviɗa skwa pla ghəŋa zɗaku, nda mbəhuha ŋa slranata nda slra kawadaga nda pla ghəŋ ŋa dray tsuh tsuh. Mantsa ya ka slna ma həga Yawe vrəglafta.

³⁶ Ka rfu i Hizkiya nda mnduha demdem ta rfu ta ghəŋa skwi ya payaf Lazglafta ŋa mnduha, kabga kwatskwats magatá tsa skwi.