2Rus 28 - Hdi

Ahaz, mghama la Yuda

¹ Hisambsak ima Ahaz ta nzatá tsi ka mgham. Ka zatá tsi ta vaku ghwaŋpəɗ mkuʼ ta gá mgham ma Ursalima. Maga a tsatsi ta skwi tɗukwa ta wa ira Yawe manda ya maga dzidza ni Dawuda ya wa.

² Ama tva mghamha la Israʼila ksaf tsatsi. Kulam nda skwa wuyayha ka kfur nwap lu nda nwa ŋa Baghalha kəʼa tsatsafta.

³ Ka drə tsi ta urdiha ma didiŋa Benʼhinum, ka draftá tsi ta zwana ni ka skwa pla ghəŋ, taɓta manzakɗawayha maga mndəra mnduha ya ghazliŋ Yawe ta kəma la Israʼila.

⁴ Ka vlə tsi ta skwa pla ghəŋ nda urdi ŋa dray nda dra ta vliha tskal tskala, ta kuɗuŋurha, nda ya mista inda fuha lbuk lbukwa.

⁵ Ka vlatá Yawe, Lazglafta ni ma dzva mghama la Aram. Ka zatá la Aram ta ghwa, ka hlaghatá ndəghata sanlaha ma mnduha ni da gá vuʼa, ka hlaghata da Damas. Ka vlatá lu guli ta tsatsi ma dzva Peka mghama la Israʼila, ka rwanatá tsi ta sludziha ni katakata.

⁶ Psla psla Peka zwaŋa Rəmalya ya ma Yuda baɗ turtuk ta mnduha dəmbuʼ dərmək nda hisambsak (120.000), kabga zlanavata taŋ ta Yawe, Lazglafta dzidzíha taŋ. Inda taŋ ka gwal viɗviɗ ma vulu həŋ.

⁷ Ka dzatá Zihri, sana mndu viɗviɗ ma vulu da la Ifrayim ta Maghaseya zwaŋa mgham, nda Ghazrikam, mali ta ghəŋa həga gá mgham, nda Ilkana slufa mgham.

⁸ Ka hlaghatá la Israʼila ta zwana ma taŋ dəmbuʼ his dərmək (200.000) miʼaha, nda zgwana, nda kuʼaha. Ka zləɗatá həŋ ta həŋ katakata, ka hlaghatá tsa skwa zləɗu ya da Samari.

⁹ Mamu sana anaba Yawe hada, Ghudet hga ni. Ka lab tsi da gmaku nda gwal vula la Israʼila ta vragapta ma Samari, kaʼa nda həŋ mantsa: « Nghawa ɓa ta gufatá ŋuɗufa Yawe, Lazglafta dzidzíha ghuni ta ghəŋa la Yuda, ka vlaghunatá tsi ta həŋ ma dzva ghuni. Ka pslatá kuni ta həŋ nda gatá sidi ta ɓhaghata ha ta luwa.

¹⁰ Ndanana wana kuni ta kuma pghatá mnduha la Yuda nda la Ursalima, zgwana nda miʼaha tani ka vuʼa ghuni! Gana a kaghuni guli ta dmaku ta Yawe, Lazglafta ghuni ra?

¹¹ Ndanana, fihawa fa ta sləməŋ, zlazliŋwa tsa zwana ma ghuni hlagagha kuni ka vuʼa ya, kabga nda gufa ŋuɗufa Yawe katakata ta ghəŋa kaghuni, » kaʼa.

¹² Ka sliʼavaftá sanlaha ma maliha la Ifrayim, i Ghazaryahu zwaŋa Yəhuhanaŋ, nda Berekyahu zwaŋa Məsilemut, nda Yəhizkiya zwaŋa Salum, nda Ghamasa zwaŋa Hadlay ta ghəŋa bakwa gwal vulu ta vrakta ta vulu.

¹³ Ka həŋ nda həŋ mantsa: « Haɗ kuni dzaʼa hlagamtá na vuʼaha na da hadna wu, kabga dzaʼa nzakway ka sgəglamaghatá dmaku ta kəma Yawe. Dmaku ta kum kuni ta sganaghata ta ghəŋa krughuviha mu! Nziya nza tsi, nda ghada ksuta dmaku ta amu, nda gufa ŋuɗufa ni katakata ta ghəŋa la Israʼila, » kaʼa.

¹⁴ Ka zlanavatá gwal vulu ta vuʼaha nda skwiha zləɗa həŋ ta kəma maliha nda ya ta kəma guyatá ghəŋ demdem.

¹⁵ Ka hlaftá gwal hagaf lu ta həŋ nda hga taŋ ta tsa vuʼaha ya, ka hlaftá həŋ ta lgutha nda ɓaɓahha zləɗa həŋ, ka susuɗanavatá gwal ka fərdiʼu. Ka zunustá həŋ ta skwa zay nda skwa say ta həŋ, ka valaŋtá həŋ ta ghwani ta həŋ. Ka hlaftá həŋ ta kəɗihha ta gwal ta hərfuta, ka hlaghatá həŋ da Yeriku, luwa zlizlamha mataba zwana ma taŋ. Tahula tsa, ka vraghatá həŋ da Samari.

Zbay Ahaz ta katu da mghama la Asur

¹⁶ Ma tsa fitik ya, ka ghunaftá mgham Ahaz ta mndu da mghama la Asur, ŋa lagha ni da kataŋta.

¹⁷ Ka vrəgladaghatá la Idum dɗanaghatá la Yuda, ka zatá həŋ ta ghwa ta ghəŋa taŋ, ka hlaghatá ndəghatá həŋ ka vuʼa.

¹⁸ Ka liŋtá la Filisti nda vulu ta luwaha ta kuɗuŋurha nda ya nda ga Negeva Yuda. Ka hlaghutá həŋ ta Betʼsemes, nda Ayaluŋ, nda Gəderut, nda Suhu nda luwaha mista ni, nda Timna nda luwaha mista ni, nda Gimzu nda luwaha mista ni, ka nzamtá həŋ ma həŋ.

¹⁹ Ka raghwaganatá Yawe ta la Yuda dabga Ahaz, mghama la Yuda ta tiŋwamtá mnduha ni da maga ghwaɗaka skwi, ka maganatá tsi ta dmaku ta Yawe ya.

²⁰ Ka lagha Tiglatʼpilʼeser mghama la Asur da liŋta Ahaz nda vulu, ka klaftá tsi ka ghuma ni, ka zlanatá kataŋta.

²¹ Ka halaʼatá Ahaz ta skwiha ɗina ɗina ma həga Yawe, nda ya ma həga mgham, nda ya ma həga maliha, ka vlaŋtá mghama la Asur, ama katanaf a tsaya wa.

²² Kulam nda tsa nzakwa ni ma ghuya ɗaŋwa ya, ka gɗatá tsa mgham Ahaz ya ta ɓlanaptá zlahuha Yawe.

²³ Ka vlaŋtá tsi ta pla ghəŋ ta lazglaftaha la Damas si za tsi nda vulu ya, kaʼa mantsa: « Ya ta kataŋ kata lazglaftaha mghamha la Aram ta həŋ ya, dzaʼa vlaŋ vla yu ta pla ghəŋha ta həŋ ŋa katihata taŋ, » kaʼa. Ama ka klanaktá həŋ ta zaɗaku ta ghəŋa ni, nda la Israʼila tani demdem.

²⁴ Ka hlaftá Ahaz ta huzla həga Lazglafta, ka paslanapta. Ka hahaftá tsi ta wa tghaha həga Yawe, ka babaftá tsi ka ŋa ghəŋa ni ta gwirha ma inda ləwa vliha ma Ursalima.

²⁵ Ka mamagaftá tsi ta vliha tskal tskala ma inda luwaha Yuda, ŋa dra urdiha ŋa sanlaha ma lazglaftaha. Ka ŋranaftá tsi ta ŋuɗuf ta Yawe, Lazglafta dzidzíha ni.

²⁶ Pɗakwa slnaha ni, zlrafta ni nda kɗavakta inda skwi maga tsi ná, vivindam vivinda lu ma ɗelewera vinda slnaha mghamha la Yuda nda la Israʼila.

²⁷ Ka laghu Ahaz da dzidzíha ni, ka paɗamtá lu ma luwa Ursalima, ama fam a lu ma kuluha mghamha la Israʼila wa. Ka lam zwaŋa ni Hizkiya da gá mgham ma vla ni.