2Rus 26 - Hdi

Gá mghama Ghuziya, mghama la Yuda

¹ Ka klaftá la Yuda demdem ta Ghuziya, ghwaŋpəɗ mkuʼ ima ni, ka famta ka mgham ma vla da ni Amatsiya.

² Tahula laghwa mgham Amatsiya da dzidzíha ni, Ghuziya ta zluʼuglanaktá Ilut ta la Yuda, ka bəglafta.

³ Ghwaŋpəɗ mkuʼ ima ni ta nzatá tsi ka mgham. Ka zatá tsi ta vaku hutaf mbsak his mida ta gá mgham ma Ursalima. Yəhulyahu hga ma ni, makwa la Ursalima.

⁴ Ka mag tsi ta skwi tɗukwa ta wa ira Yawe manda va ya si maga da ni, Amatsiya.

⁵ Ka fatá tsi ta ghəŋa ni ka zba Lazglafta ta fitika Zakari ta taghanaftá zləŋa Lazglafta ya. Ma tsa zbay ni ta Yawe ya, ka vlaŋtá Lazglafta ta dzaʼa ni ta kəma ta kəma.

⁶ Ka lam tsi da vulu nda la Filisti, ka zlazliŋtá tsi ta matsakha luwa Gat, nda ŋa Yavne, nda ŋa Asdut. Ka babaftá tsi ta matsakha huzla luwaha ta wanaftá Asdut nda pɗakwa kwakwara la Filisti.

⁷ Ka kataŋtá Lazglafta ma vula ni nda la Filisti, nda ya nda la Arap ma Gurʼbaghal nda ya nda la Məghuŋ.

⁸ Ka plə la Ghamuŋ ta dzumna ŋa Ghuziya, ka laghu hga ni da zərwa ha ta mukuma nda Masar, kabga mbrumbra katakata.

⁹ Ka babaftá Ghuziya ta sana həgaha nda slara nda slara, nda vəvərɗa ma Ursalima ta wa tgha Tuldi, nda wa tgha Didiŋa, nda Tinzir.

¹⁰ Ka babaftá tsi ta həgaha nda slara nda slara guli ma mtak, ka lalaptá tsi ta vavrəm, kabga nda ndəgha bra rina ni ma kuɗuŋurha nda ya ma dandar, mantsa ya gwal hva, nda gwal hva inabi ta kuɗuŋurha, nda ya ma vwahha, kabga zɗəgana zɗa hva.

¹¹ Mamu bakuha gwal vula Ghuziya prək ka kla huzla vulu. Pagha pagha lu ta həŋ ka baku ka baku manda ya mbəɗaf i Yəghiʼel mnda vindi, nda Maghaseya mali ta ghəŋa sludziha ta həŋ, mista Hananiya mala sludziha mgham.

¹² Gwagwata mala gá həgaha gwal viɗviɗ ka vulu ná, dəmbuʼ his nda mkuʼ dərmək (2.600) həŋ.

¹³ Mista taŋ ná, mamu gwal vulu dəmbuʼ hkən dərmək nda ndəfáŋ nda hutaf dərmək (307.500), gwal vulu nda mbara nda mbara ta kataŋtá mgham da ghumaha ni həŋ.

¹⁴ Ka papayanaftá Ghuziya ta tsa gwal vulu ya ta zalamha, nda gupaha, nda dzugwaha, nda lgut ka ghuva tili ka ŋulaŋ, nda lgheɗha, nda palaha ŋa da tsivuʼha.

¹⁵ Ka magaftá tsi ma Ursalima ta sana skwa wuɗa skwi zlaganap sana mnda midala, ŋa fafagata ta ghəŋa həgaha nda slara nda slara, nda ya ta tinzirha, ŋa ha hava, nda wuɗa palaha ɓərzləzla. Ka zaghutá hga ni da zərwa, kabga mutsaf mutsa ta katu katakata, ha ka mbruta tsi.

Gla ghəŋ nda krughuva Ghuziya

¹⁶ Ama manda mutsafta Ghuziya ta mbraku, ka zlraftá tsi ta gla ghəŋ, ka zlrugwaftá tsi ta skwi ŋa zaɗiŋtá htsiŋa ni. Ka maganatá tsi ta ghwaɗaka skwi ta Yawe, Lazglafta ni, nda ma lami da həga Yawe da dra urdi ŋa dray nda dra ta gwira dra urdi.

¹⁷ Ka lam Ghazaryahu, mali ta ghəŋa gwal dra skwi ŋa Lazglafta kawadaga nda gwal dra skwi ŋa Yawe tghas mbsak, gwal ta dra ŋuɗuf həŋ nda hula ni,

¹⁸ da dvanaghatá mgham Ghuziya, ka həŋ nda tsi mantsa: « Kagha Ghuziya a ta raku ka dra urdi ŋa dray nda dra ŋa Yawe wa! Raŋta gwal dra skwi ŋa Lazglafta, zivira Haruna, pghanagha lu ta rɗi ta həŋ ŋa vlay. Sab sa ma na vli nda ghuɓa na, ghwaɗaka skwi ta mag ka, vlaghata a ta glaku ta kəma Yawe, Lazglafta wu, » ka həŋ.

¹⁹ Ka ɓasaftá Ghuziya ta ŋuɗuf, nda ŋatá gədzeh ŋa dra urdi ma dzvu. Na tsa gi ɓasafta ni ta ŋuɗuf nda gwal dra skwi ŋa Lazglafta ya, ka zlagaptá ghwaɗaka lku ma kuma ni ta wa ira gwal dra skwi ŋa Lazglafta ma həga Yawe, ndusa nda gwira dra urdi ŋa dray nda dra.

²⁰ Ka nzatá i Ghazaryahu mali ta ghəŋa gwal dra skwi ŋa Lazglafta, nda inda gwal dra skwi ŋa Lazglafta, ka nghay. Kəʼa ka həŋ ná, mamu ghwaɗaka lku ma kuma ni, ka sliŋwigiŋtá həŋ dzibil, ka gi ndagaptá vərɗa tsatsi, kabga dzuŋ dza Yawe.

Kɗavakta gá mghama Ghuziya

²¹ Ka nzatá mgham Ghuziya nda ghwaɗaka lku ha ka mtata ni. Ka nzatá tsi nda ghəŋa ni ma sana həga kətsaʼu, dabga tsa ghwaɗaka lku tida ya, ka ghəzliŋtá lu ma həga Yawe. Zwaŋa ni Yutam mali ta ghəŋa həga gá mgham, tsatsi ta ŋa mnduha ta tsa haɗik ya.

²² Pɗakwa slnaha Ghuziya daga zlrafta ni nda kɗavakta ni ná, vivindaf vivinda anabi Isaya, zwaŋa Amuts.

²³ Ka laghu Ghuziya da dzidzíha ni, ka paɗamtá lu ta vata dzidzíha ni ta daɓa kula mghamha, kabga ka lu na: « Nda ghwaɗaka lku tida, » ka lu. Ka lam zwaŋa ni Yutam da gá mgham ma vla ni.