2Rus 24 - Hdi

Payafta Yuʼas ta həga Yawe

¹ Ndəfáŋ ima Yuʼas ta nzatá tsi ka mgham. Fwaɗ mbsak vakwa ni ta gá mgham ma Ursalima. Tsivya hga ma ni, makwa la Bəʼerseva.

² Ka mag Yuʼas ta skwi tɗukwa ta wa ira Yawe ma fitika nzakwa Yəhuyada, mnda dra skwi ŋa Lazglafta nda hafu.

³ Ka hlanaftá Yəhuyada ta miʼi his ta Yuʼas. Ka yayatá tsi ta zgwana nda kuʼaha.

⁴ Tahula tsa, ka kuratá Yuʼas ma ŋuɗufa ni ta payaftá həga Yawe.

⁵ Ka tskanatá tsi ta gwal dra skwi ŋa Lazglafta nda la Levi, kaʼa nda həŋ mantsa: « Lawa ra luwaha la Yuda, ka tska kuni inda vaku da inda la Israʼila ta tsedi ŋa paya həga Lazglafta ghuni. Ka viŋta kuni ta vu mista ni misimmisim! » kaʼa. Ama ka laghu la Levi da ɓəzdəhay nda ɓəzdəha.

⁶ Ka hgaftá mgham ta Yəhuyada, mali ta ghəŋa gwal dra skwi ŋa Lazglafta, kaʼa nda tsi mantsa: « Nya kwal ka havanaghatá la Levi ŋa hlagaghatá da inda mndu ma Yuda nda Ursalima ta dzumna ya tsaf Musa, kwalva Yawe nda guyatá ghəŋa la Israʼila, ŋa paya tumpula akwata dzratá wi na? » kaʼa,

⁷ kabga ɓadziŋ ɓadza tsa ghwaɗaka marakw, Ghataliya ya nda mnduha ni ya ta wa tgha həga Lazglafta. Ka hlaftá həŋ ta inda huzla pghaghu lu ma həga Yawe, ŋa ksa slna Baghal.

⁸ Ka mnatá mgham tama kazlay na, ka tsafta lu ta akwati, ka fatá lu mabli ta wa tgha həga Yawe kəʼa.

⁹ Ka gugɗatá lu ma Yuda nda ya ma Ursalima kazlay na: Ka klagaghata dər wati ma mndu ŋa Yawe ta dzumna ya tsanaf Musa, kwalva Lazglafta ma mtak ta la Israʼila.

¹⁰ Ka rfu inda maliha nda inda mnduha ta rfu, ka hladaghatá həŋ, ka pghadatá ŋa taŋ ta vlata da tsa akwati ya, ha ka ndəghanafta.

¹¹ Inda fitika kladaghata la Levi tsa akwati ya, da mnda tska tsedi ga mgham ya, ka kəʼa ka həŋ dagala tsa tsedi ya, ta hgaŋ hga ta mndu ta vindanatá vindi ta mgham, nda slufa mali ta ghəŋa gwal dra skwi ŋa Lazglafta, ŋa klafta taŋ ta tsa akwati ya, ka mbəɗapta, ka vradanaghata da vla ni. Mbaɗa həŋ ka magay mantsa ya inda fitik, ka tskaftá həŋ ta tsedi dagala.

¹² Mbaɗa i mgham nda Yəhuyada ka vlay ŋa maliha ta ghəŋa slna həga Yawe. Mbaɗa tsaha ya ka play ŋa gwal ta fiɗa pala, nda gwal ta ɗatsa udzuha, nduk nda gwal ta laviŋtá ksa slna nda kfur, nda ghuva tili ŋa payay ŋa vranaftá həga Yawe.

¹³ Ka lam maliha ta ghəŋa slna dá slna taŋ. Ta hwaya tsa maga slna vranaftá tsa həga ya ma dzva taŋ, kabga nda sna həŋ ta maga slna. Ka vranaftá həŋ ta tsa həga Lazglafta ya manda va vla ni, ka sganaghatá həŋ ta mbrakwa ni.

¹⁴ Manda kɗiŋta taŋ, ka hlaktá həŋ ta pɗakwa tsa tsedi ya ta kəma i mgham nda Yəhuyada. Ka magaftá lu ta huzla ŋa da həga Yawe nda tsi: Tsaha ya huzla ŋa maga slna pla ghəŋ ŋa dray tsuh tsuh, nda leghwaha, nda sanlaha ma huzla ka dasu nda ya ka kfura tsedi. Ma inda fitika nzakwa Yəhuyada, ka va vlə lu ta skwa pla ghəŋ ŋa dray tsuh tsuh ma həga Yawe.

Maganata Yuʼas ta ghwaɗaka skwi ta Lazglafta

¹⁵ Lula ima Yəhuyada katakata, dərmək nda hkən mbsak (130) ima ni ta mtutá tsi.

¹⁶ Ka paɗamtá lu ma luwa Dawuda ta vata mghamha, kabga maga maga ta skwi zɗaku ma Israʼila, ŋa vlaŋtá sgit ta Lazglafta nda ya ŋa həga ni.

¹⁷ Tahula mtuta Yəhuyada, ka lagha maliha la Yuda da tsəlɓu da mgham. Ka fanatá mgham ta sləməŋ ta həŋ.

¹⁸ Ka zlanavatá həŋ ta həga Yawe, Lazglafta dzidzíha taŋ, ka laghwi da maganatá slna ta skwa wuyay Asera nda skwa wuyayha. Ka gufaftá ŋuɗufa Yawe ta ghəŋa la Yuda nda la Ursalima, dabga tsa dmaku ga həŋ ya.

¹⁹ Ka ghunaftá Yawe ta anabiha ŋa vranaktá həŋ da tsi, ama ka kwalaghutá həŋ ta snay.

²⁰ Mantsa tama, ka saha Sulkuma Lazglafta suw ta ghəŋa Zakari, zwaŋa Yəhuyada, mnda dra skwi ŋa Lazglafta. Ka lagha tsi da sladata ta kəma mnduha, kaʼa nda həŋ mantsa: « Wya ka Lazglafta: “Kabgawu kəl kuni ka kwalaghutá sna zlahuha Yawe na? Haɗ kuni dzaʼa walaŋtá dzaʼa ta kəma ta kəma wu, kabga zlanavata ghuni ta Yawe, dzaʼa zlavaghuna zla tsatsi guli,” » kaʼa.

²¹ Ama ka gwaftá həŋ ta wi tida, ka zlambata ta gwaɗa mgham ta mnanaftá həŋ, ma daɓa həga Yawe.

²² Havap a mgham Yuʼas ka zɗaku magana Yəhuyada, da ni ma Zakari wu, ka dzatá tsi ta zwaŋa ni. Ka Zakari ta klə tsi ta hafu mantsa: « Ka ngha Yawe ta na skwi na, ka tsatá tsi ta guma ni, » kaʼa.

Kɗavakta gá mghama Yuʼas

²³ Ma kɗakwa vaku, ka laf gwal vula la Aram da liŋtá Yuʼas nda vulu. Ka lam həŋ da Yuda nda Ursalima, ka pslatá həŋ ta inda maliha ta ghəŋa mnduha, ka hlaghatá həŋ ta inda skwa zləɗu tsəghanaftá mghama taŋ ma Damas.

²⁴ Ka lagha gwal vula la Aram nda mnduha hutsekw, ama ka vlatá Yawe ma dzva taŋ ta ndəghata gwal vula la Yuda katakata, dabga vəl zlanavata taŋ ta Yawe, Lazglafta dzidzíha taŋ. Mantsa ya tsanaghatá lu ta guma ta Yuʼas.

²⁵ Ka vraghutá la Aram, ka zlanata ma ghuya ɗaŋwa katakata. Ka gwaftá mnduha ni ta wi tida, dabga vəl dzata ni ta zwaŋa Yəhuyada, mnda dra skwi ŋa Lazglafta. Ka dzatá həŋ ta ghəzləŋa ni. Ka mtutá tsi, ka paɗamtá lu ma luwa Dawuda, ama ma kuluha mghamha a wa.

²⁶ Wya tsa gwal ta gwaftá wi tida ya: I Zavat zwaŋa Simghat, makwa la Ghamuŋ, nda Yəhuzavat zwaŋa Simrit, makwa la Muwav.

²⁷ Skwi ta nghanaghatá zwana Yuʼas, nda ndəghata gwaɗaha ya klak anabiha ta ghəŋa ni, nda slna paya həga Lazglafta ya maga tsi, vivindam vivinda lu ta tsaha ya ma ɗelewera slnaha mghamha. Ka lam zwaŋa ni Amatsiya da gá mgham ma vla ni.