2Rus 20 - Hdi

Vulu nda la Yuda, nda ndəɓa dzva Yəhusafat

¹ Tahula tsa, ka sliʼaktá la Muwav, nda la Ghamuŋ, nda la Məghuŋ, da vulu nda Yəhusafat.

² Ka lagha lu da mnay ŋa Yəhusafat: « Waʼa ndəghata dəmga daga ma Idum ta sana ɓla drəf, ta sagha da vulu nda kagha, nda ghada sagha taŋ da Hatsuŋʼtamar ta nzakway ka Gheŋgedi ya, » ka lu.

³ Ka ksutá zləŋ ta Yəhusafat, ka zbə tsi ta ɗawaŋtá ndana Yawe. « Sumawa suma ta suma, » kaʼa nda inda kwakwara la Yuda.

⁴ Ka tskavatá la Yuda ŋa zba katu da Yawe. Ma inda luwaha la Yuda sliʼadaghata lu ŋa zba katu da Yawe.

⁵ Ka sladatá Yəhusafat mataba guyatá ghəŋa la Yuda nda la Ursalima, ma həga Yawe ta kəma lfiɗa daɓi,

⁶ kaʼa mantsa: « Yawe, Lazglafta dzidzíha ŋni, kagha a Lazglafta ta luwa wu ra? Kagha a ta nzanaghatá inda gá mghama mndəra mnduha wu ra? Ma dzva gha prəsl nda mbraku, haɗ mndu ta laviŋtá ŋaŋta da kagha wa.

⁷ Kagha a Lazglafta ŋni ta zluʼuwaghuta da mnduha si ta na haɗik na, ta na haɗik na, ta wa ira mnduha gha la Israʼila, ka vlaŋta ŋa ɗekɗek ta zivira Abraham gra gha wu ra?

⁸ Ka nzatá həŋ mida, ka baghaftá həŋ hada ta vli nda ghuɓa ŋa vlaŋtá sgit ta hga gha, ka həŋ mantsa:

⁹ “Ka slaŋnagha sla zləmnda, dər má vulu tsi, dər guma tsi, dər ketsepi tsi, dər maya a tsi, dzaʼa sagha sa ŋni ta da na həga na, nda ya ta kəma gha, kabga ma na həga na ta vla lu ta glaku ŋa hga gha. Dzaʼa wahay ŋni ta wahu da kagha ta ghəŋa ghuya ɗaŋwa ŋni, dzaʼa snaŋna sna ka, dzaʼa mbaŋnaf mba ka!” kaʼa.

¹⁰ Ndanana, wana la Ghamuŋ, nda la Muwav, nda mnduha ta kwakwar ta ghwá Seghir, ya kul vlaŋtá ka ta tvi ta la Israʼila ŋa labi nda mida ta sab həŋ ma haɗika Masar, ka mbəɗaghutá la Israʼila ta vgha təv sani, ka zlanatá həŋ ta zaɗanatá həŋ.

¹¹ Wana ká həŋ ta plaŋnamta, nda ma sagha da ghəzliŋnista ta haɗika za həga vlaŋna ka ŋa ŋa ŋni!

¹² Lazglafta ŋni, haɗ ka dzaʼa tsanaghatá guma ta həŋ wu ra? Haɗ mbrakwa aŋni ta kəma na tskata dəmga ta sagha da liŋnista na wa. Aŋni, sna a ŋni ta skwi ŋa magay wu, ama ta kagha fatá ira ŋni, » kaʼa.

¹³ Ta sladatá inda la Yuda nda slada ta kəma Yawe, nda zwani miɗiɗa tani, nda miʼa taŋ tani, nda zwana taŋ tani.

Vlaŋta Yawe ta zata ghwa ta la Yuda

¹⁴ Ka saha Sulkuma Yawe da taba guyatá ghəŋa la Yuda nzafta ta ghəŋa Yahaziʼel, zwaŋa Zakari, ma zigha Benaya zwaŋa Yəghiʼel, zigha Mataniya ta sab ma zivira la Asaf mnda la Levi.

¹⁵ Ka Yahaziʼel mantsa: « Fawa fa ta sləməŋ, inda kaghuni la Yuda, nda la Ursalima, nda kagha mgham Yəhusafat! Wya ka Yawe nda kaghuni: “Ma zləŋ kuni ta zləŋ, ma ghudzə kuni ta ghudzaku ta kəma tsa ndəghata dəmga sludziha ya, kabga kaghuni a dzaʼa vulay wu, Lazglafta dzaʼa vulay.

¹⁶ Mahtsim, ka laha kuni da guyata nda həŋ. Waʼa həŋ ta ŋladafta ta vata kuɗuŋura Tsits. Dzaʼa guyaku kuni nda həŋ ma kɗavakta lika mbəŋ nda mtaka Yəruʼel ya.

¹⁷ Kaghuni a dzaʼa vula tsa vulu ya wa. Payavata kaghuni ŋa ghuni, sladawa slada hada, dzaʼa nghay kuni ká Yawe dzaʼa katatá kaghuni. La Yuda nda la Ursalima, ma zləŋ kuni ta zləŋ, yaha kuni da ghudzafta. Mahtsim, ka sliʼagapta kuni da guyata nda həŋ, kawadaga Yawe nda kaghuni,” kaʼa, » kaʼa.

¹⁸ Ka dzadatá Yəhusafat ta kuma ta haɗik, ka zlambatá inda la Yuda, nda la Ursalima ta kəma Yawe ŋa vla glaku ŋa ni.

¹⁹ Ka sliʼaftá la Levi mataba la Kehat nda la Kurah ŋa zləzləva Yawe, Lazglafta la Israʼila nda lwi dagala dagala.

²⁰ Wrək tgha ga mahtsima ni, ka tsavaftá həŋ ka laghwi ta mtaka Tekuwa. Ta lab həŋ, ka sladatá Yəhusafat, kaʼa mantsa: « Fihawa fa ta sləməŋ la Yuda nda la Ursalima! Fafwa fa ta ghəŋ ta Yawe, Lazglafta ghuni, dzaʼa ŋay kuni. Fafwa fa ta ghəŋ ta anabiha ni, dzaʼa zay kuni ta ghwa! » kaʼa.

²¹ Tahula tsa, ka dzərkavatá tsi nda mnduha, ka zabaftá tsi ta gwal fa laha ŋa Yawe ŋa zləzləvay taŋ ta sgita ghuɓata ni. Ka lab həŋ ta kəma gwal vulu nda hbatá vgha nda huzla vulu, ka həŋ mantsa: « Zləzləvawa Yawe! Ta gɗava gɗa zɗakwa ni ŋa ɗekɗek! » ka həŋ.

²² Ma fitika zlrafta taŋ ta hayay nda laha zləzləvu, ka hwazlaɓanaftá Yawe ta la Ghamuŋ, nda la Muwav, nda mnduha ta kwakwar ta ghwá Seghir si ta laha da guyata nda la Yuda, ka dzaɓa vgha taŋ.

²³ Ka sliʼaftá la Ghamuŋ nda Muwav guyata nda mnduha ta kwakwar ta ghwá Seghir ka rwiŋtá həŋ, ka zaɗanata həŋ nekwnekw. Tahula kɗiŋta taŋ nda la Seghir, ka mbəɗavatá hahəŋ hahəŋ guli ka psluvtá vgha taŋ.

²⁴ Ɓhadaghata la Yuda ta kuɗuŋur, ma vli ŋa nghidiŋtá mtak ma tsa vli hada tsa ŋəɗdəmata gwal vulu ya, kəʼa ka həŋ ná, mbla mnduha yeya rafsaŋa ta haɗik. Haɗ mndu ya ta ndapta wa.

²⁵ Ka sliʼaftá Yəhusafat nda mnduha ni da zləɗatá ghumaha taŋ. Ka slaftá həŋ ta huzla ta fərtuta, lgutha, nda skwiha ta ɗinuta, ka hlaʼatá həŋ prək ka mbrakwa taŋ. Ka fatá həŋ ta fitik hkən ŋa hla skwa zləɗu, kabga fərtu fərta.

²⁶ Baɗ mafwaɗa fitik, ka tskavatá həŋ ma didiŋa Bəraha. Hada, ka zləzləvu həŋ ta Yawe. Tsaya kəl lu ka hga tsa vli ya ka didiŋa Bəraha ha gita.

²⁷ Inda mnduha la Yuda nda la Ursalima, nda Yəhusafat ta klanatá kəma ta həŋ, ka vraghatá həŋ nda rfu da Ursalima, kabga ndəghanaf ndəgha Yawe ta həŋ nda rfu nda ma zluʼaptá həŋ ma dzva ghumaha taŋ.

²⁸ Ka lam həŋ da Ursalima nda dza htimbil nda kəzliŋkəzliŋ, nda vya talakwa ha ka laghu həŋ təv həga Yawe.

²⁹ Na snaŋta inda pɗakwa gá mghamha ta wanaftá həŋ ta skwi magana Yawe ta ghumaha la Israʼila, ka hlutá zləŋa Lazglafta ta həŋ.

³⁰ Mantsa tama, ka nzatá gá mghama Yəhusafat lɓekw, ka vlaŋtá Lazglafta ni ta mbiʼa vgha dər ndiga ndiga.

Klatá ghəŋa gá mghama Yəhusafat

³¹ Ka gə Yəhusafat ta mgham ta ghəŋa la Yuda. Hkən mbsak hutaf mida ima ni ta lam tsi da gá mgham, hisambsak hutaf mida vakwa ni ta gá mgham ma Ursalima. Ghazuva hga ma ni, makwa Silhi.

³² Ka ksaftá tsi kahwathwata ta saɗa da ni Asa, dzimbiɗana a wu, ka mag tsi ta skwi tɗukwa ta wa ira Yawe.

³³ Kulam nda tsa, hlu a vliha tskal tskala wu, ta ndiʼa a ŋuɗufa mnduha kahwathwata ta Lazglafta dzidzíha taŋ wa.

³⁴ Pɗakwa slnaha Yəhusafat, zlrafta ni nda kɗavakta ni ná, vivindam vivinda lu ma ɗelewera rusa slna da Yehu, zwaŋa Hanani, ka vivindamtá lu ma ɗelewera mghamha la Israʼila.

³⁵ Tahula tsa, ka dzraftá Yəhusafat mghama la Yuda ta wi nda Ahaziya mghama la Israʼila ta maga ghwaɗaka skwi ya.

³⁶ Ka dzraftá həŋ ta wi ŋa tsatsaftá kwambaluha zɗindil zɗindil ŋa dzaʼa da Tarsis. Ka magaftá həŋ ma Ghetsiyuŋʼgever.

³⁷ Ama ka klaktá anabi Ilighezer, zwaŋa Dudavahu, mnda la Maresa ta lwa Lazglafta ŋa Yəhusafat, kaʼa mantsa: « Tsəhala gwaf gwa ka ta vgha nda Ahaziya ya, dzaʼa ɓadziŋ ɓadza Yawe ta skwiha mamagaf ka, » kaʼa. Manda va tsa ya guli, ka ɓaɓalutá tsa kwambaluha ya, laviŋ a həŋ ta sliʼafta ŋa dzaʼa da Tarsis wa.