2Rus 19 - Hdi

Dvanaghata anabi Yehu ta Yəhusafat

¹ Ka laghu Yəhusafat mghama la Yuda dzagha ni nda vgha ta zɗakwa ni, da Ursalima.

² Ka sliʼaftá slayaŋ Yehu, zwaŋa Hanani, da guyaku nda mgham Yəhusafat, kaʼa nda tsi mantsa: « Dzaʼa kataŋ kata lu ta mndu ta ga dmaku ra? Ta ksay ka ta gra nda gwal husaŋ Yawe ta həŋ ra? Dabga tsaya, nda ɓasa ŋuɗufa Yawe nda kagha.

³ Kulam nda tsa, slanagha sla ta skwi ɗina ma kagha, kabga zaɗana zaɗa ka ta skwa wuyay Asera ma haɗik gha, ka fatá ka ta ŋuɗufa gha ŋa zba Lazglafta, » kaʼa.

Klakta Yəhusafat ta payay

⁴ Ka nzatá Yəhusafat ma Ursalima, ka sliʼiglaftá tsi naghəglanaghatá mnduha, daga ma Bəʼerseva ha ta kwakwar ta ghwá Ifrayim, ŋa vranaktá həŋ da Yawe, Lazglafta dzidzíha ni.

⁵ Ka paghatá tsi ta gwal tsa guma ma inda luwaha la Yuda ŋaŋam lu ma matsaka huzlu.

⁶ Kaʼa nda tsa gwal tsa guma ya mantsa: « Ɗasuwa ká kuni nda skwi dzaʼa kuni da magay, kabga ŋa mnduha a dzaʼa tsa kuni ta guma wu, ŋa Yawe ya, kawadaga tsatsi nda kaghuni ta tsə kuni ta guma.

⁷ Ndanana, ka nza zləŋa Yawe da kaghuni. Ɗasuwa ka kuni nda slna ghuni, kabga haɗ Yawe, Lazglafta mu ta maga skwi kul nzakway tɗukwa wu, haɗ ta gala mndu, haɗ ta ɗva sməɗ wu, » kaʼa.

⁸ Manda va tsaya, ma Ursalima guli, ka paghatá Yəhusafat ta sanlaha ma la Levi, nda gwal dra skwi ŋa Lazglafta, nda sanlaha ma zəʼala həgaha la Israʼila, ŋa tsa guma manda ya ta taghu zlaha Yawe, ŋa nzakwa taŋ guli ka gwal dzra gwaɗa mataba mnduha. Dzaʼa nzakw ma Ursalima həŋ.

⁹ Wya kaʼa mnanaftá həŋ: « Ka maga kuni ta slna nda zləŋa Yawe, nda fatá ghəŋ tasl, nda ya nda hya hya ŋuɗufa ghuni.

¹⁰ Inda hwazlaɓaku dzaʼa hlaghunakta zwana ma ghuni ma luwaha taŋ ta ghəŋa pghiŋtá us, ka ɓlanaptá zlaha Musa a tsi, ka zlahuha a tsi, ka tva skwiha ŋa magay a tsi, ka tɗanaŋta kuni ta sləməŋ ta həŋ, kada kwala dmaku ksaftá həŋ ta kəma Yawe. Haɗ gufatá ŋuɗufa ni dzaʼa sagha ta ghəŋa kaghuni nda zwanama ghuni tani wa. Mantsa ya ka kuni da magay, ya ksafta a dmaku ta kaghuni wa.

¹¹ Wya Amarya, mali ta ghəŋa gwal dra skwi ŋa Lazglafta ka mala ghuni ŋa maga inda skwi ta nghanaghatá gwaɗa Yawe, nda Zəvadiya, zwaŋa Yismaghel, ka mali ta ghəŋa guyatá ghəŋa la Yuda, ŋa maga inda skwi ta nghanaghatá mgham. Wya la Levi da kaghuni, ŋa dzəgaghunatá dzvu. Mbrawa mbra ta vgha, ka maga kuni ta slna, ka nza Yawe kawadaga nda mndu ta maga skwi ɗina, » kaʼa.