2Rus 18 - Hdi

Dzrafta Yəhusafat ta wi nda Ahav

¹ Ka mutsaftá Yəhusafat ta gadghəl nda glaku ta fərtuta, ka ksaftá tsi ta gra nda Ahav nda ma tsuʼafta ni ta klafta zwaŋa ni ta makwa Ahav.

² Tahula luta vakuha, ka laha Yəhusafat da slanaghatá Ahav ma Samari. Ka pslatá Ahav ŋa ni, nda ya ŋa mnduha mista ni ta ndəghata rina fisik nda slaha, ka bibraftá tsi ta Yəhusafat ŋa guyaftá ghəŋ nda tsi ŋa ŋlu ŋa dzaʼa da vulu nda la Ramut ma Gilghat.

³ Ka Ahav, mghama la Israʼila nda Yəhusafat mghama la Yuda mantsa: « Ta kumay ka ta dzaʼa kawadaga nda iʼi da Ramut ma Gilghat ra? » kaʼa. Ka Yəhusafat zlghanaftá wi mantsa: « Kagha nda iʼi, mnduha gha nda ŋa ɗa, haɗ skwi ta dganata wa. Ta dzaʼa mu da liŋta nda vulu kawadaga nda kagha, » kaʼa.

⁴ Ama ka Yəhusafat sganaghatá mghama la Israʼila mantsa: « Kdəkkdək, snana sna tama ndanana ta gwaɗa da Yawe karaku, » kaʼa.

⁵ Ka tskanatá mghama la Israʼila ta anabiha ta maga fwaɗ dərmək (400), kaʼa nda həŋ mantsa: « Dzaʼa laviŋ lava ŋni ta dzaʼa da vulu ma Ramut ma Gilghat re, ari ka kwalaghuta yu a na? » kaʼa. Ka həŋ mantsa: « Laf la gha! Dzaʼa vla vla Lazglafta ma dzva mgham, » ka həŋ.

⁶ Ama ka Yəhusafat mantsa: « Ta haɗ sana anaba Yawe hadna ŋa lavəgliŋta ɗawglamaŋta ra? » kaʼa.

⁷ Ka mghama la Israʼila nda Yəhusafat mantsa: « Ta mamu mndu turtuk dzaʼa laviŋta lu ta snanatá ndana Yawe nda da tsatsi, ama iʼi, husiha husa tsa mndu ya, kabga haɗ ta mnaŋtá skwi ɗina ta ghəŋa iʼi wu, ta ghəŋa ghwaɗaka ni ta mnə tsi. Mihayhu, zwaŋa Yimla ya, » kaʼa. Ka Yəhusafat mantsa: « Ma gwaɗ mgham ta gwaɗa mantsa! » kaʼa.

⁸ Ka hgaktá mghama la Israʼila ta sana mndu mataba maliha ta ksanatá slna, kaʼa nda tsi mantsa: « La misimmisim kudiɗ ka ka nda Mihayhu, zwaŋa Yimla ya! » kaʼa.

⁹ Ka nzatá i mghama la Israʼila nda Yəhusafat mghama la Yuda ta dughurukha gá mgham, nda susuɗatá lguta mamgham mgham ta vgha ta blikwi ta wi tgha tva lami da Samari, ta nzatá inda la anabiha Lazglafta ta kəma taŋ ta mna lwa Lazglafta.

¹⁰ Ka slaraftá Tsidkiya, zwaŋa Kənaghana ta duliha ni ka kfur, kaʼa mantsa: « Wya skwi mna Yawe: Nda nza tsa duliha ya ka ŋizla mbraku ya dzaʼa kəl ka ka dzaɓidiŋtá sludziha la Aram ha ka kɗanatá həŋ, » kaʼa.

¹¹ Ka mnə inda sanlaha ma la anabiha ta lwa Lazglafta manda va tsaya, ka həŋ mantsa: « Ŋla da Ramut ma Gilghat, dzaʼa katsay ka! Dzaʼa vla vla Yawe ta həŋ ma dzva mgham, » ka həŋ.

Mnaŋta anabi Mihayhu ta zləmbakwa la Israʼila

¹² Ka tsa mnda ghunay si ta laghwi da hga Mihayhu ya, nda tsi mantsa: « Ka skwa turtuk gwaɗa anabiha demdem kazlay na dzaʼa katsay mgham kəʼa. Kdəkkdək ka nza gwaɗa kagha guli manda ŋa dər wati ma həŋ! Ka mna ka ta skwi ɗina! » kaʼa.

¹³ Ama ka Mihayhu nda tsi mantsa: « Ta waɗagha waɗa yu nda hga Yawe nda hafu mida, dzaʼa mnay yu ta skwi dzaʼa mnata Lazglafta ɗa! » kaʼa.

¹⁴ Ɓhadaghata ni da mgham, ka ɗawaŋtá mgham da tsi: « Mihayhu, ka dzaʼa mu da liŋta nda vulu ta Ramut ma Gilghat re, ari ka kwalaghuta mu a na? » kaʼa. Kaʼa zlghanaftá wa ni mantsa: « Ŋlawa ŋla! Dzaʼa zay kuni ta ghwa, dzaʼa vlaghuna vla lu ta həŋ ma dzva ghuni, » kaʼa.

¹⁵ Ka mgham nda tsi mantsa: « Kidaghi səla dzaʼa famta yu ta kagha da waɗu ŋa mnihata gha ta kahwathwata kweŋkweŋ nda hga Yawe na? » kaʼa.

¹⁶ Ka Mihayhu mantsa: « Nda ngha yu ta inda la Israʼila ta tatá vgha ta ghwáha, manda rini kul haɗ mnda ngha həŋ. Ka Yawe mnata na: “Haɗ mala taŋ wu, ka vra dər wati ma həŋ nda vghata zɗaku dzagha taŋ!” » kaʼa.

¹⁷ Ka mghama la Israʼila nda Yəhusafat mantsa: « Si mna gha a yu kay wu ra? Haɗ ta mna lwa Lazglafta ɗina ta ghəŋa iʼi wu, ta ghəŋa skwi kul ɗinaku ta mnə tsi! » kəʼa kay wu ra?

¹⁸ Ka Mihayhu mantsa: « Katək ra! Sna tama ta gwaɗa Yawe: Nda ngha yu ta Yawe ta nzaku ta dughurukwa gá mghama ni, nda inda gwal vulu ta luwa ta sladu ta vata ni, nda ga zeghwa ni, nda ya nda ga zlaɓa ni.

¹⁹ Ka Yawe mnata na: “Wa mndu dzaʼa gataftá Ahav mghama la Israʼila ŋa lafa ni da vulu ma Ramut ma Gilghat, ka dzata lu na?” kaʼa. Ka zlghaftá həŋ ta wa ni, tskəm ka ya nda ŋa ni, tskəm ka ya nda ŋa ni.

²⁰ Ama ka lagha sana sulkum da maravata ta kəma Yawe, kaʼa mantsa: “Iʼi dzaʼa gatafta,” kaʼa. Ka Yawe nda tsi mantsa: “Kinawu ká ka dzaʼa magay?” kaʼa.

²¹ Kaʼa zlghanaftá wi mantsa: “Ta dzaʼa yu, dzaʼa nzakway yu ka sulkuma tsakalawi ma wa inda anabiha ni,” kaʼa. Ka Yawe nda tsi mantsa: “Kahwathwata ná, dzaʼa gataf gata ka, dzaʼa katsay ka. La ka magata ka manda tsaya!” » kaʼa.

²² Ka Mihayhu mantsa: « Nda ngha ka! Pgham pgha Yawe ta sulkuma tsakalawi ma wa na anabiha gha wana həŋ na. Yawe ya ta mnaftá zləmnda ta kagha, » kaʼa.

²³ Ka gavadaghatá Tsidkiya, zwaŋa Kənaghana, ka dzuŋtá Mihayhu ma lagəŋ, kaʼa mantsa: « Nda ta wati tvi saba sulkuma Yawe ma iʼi ŋa gwaɗgaghata na? » kaʼa.

²⁴ Ka Mihayhu mantsa: « Dzaʼa nghay ka baɗ dzaʼa gha da ra vli, lam da ya dzuguvi, lam da ya dzuguvi da ɗifa, » kaʼa.

²⁵ Ka mghama la Israʼila mantsa: « Ksaf ksa ta Mihayhu, ka vriŋta ka da Amuŋ, guvna luwa, nda ya da zwaŋa ɗa, Yuʼas.

²⁶ Ka mnanafta ka ta həŋ: “Wya skwi mna mgham: Famwa fa ta na mndu na ma gamak, ka vla kuni ta buradi kiʼa nda imi kiʼa ŋa ni kweŋkweŋ, ha ka vrakta ɗa dzagha ma zɗaku,” » kaʼa.

²⁷ Ka Mihayhu mantsa: « Ka vragagha vra ka ma zɗaku katsi, ba nda ma iʼi a gwaɗata Yawe ta gwaɗa tama wu, » kaʼa. Kaʼa sganaghata mantsa: « Ta snay snay kaghuni mnduha demdem! » kaʼa.

Mtakwa Ahav

²⁸ Ka sliʼaftá i mghama la Israʼila nda Yəhusafat mghama la Yuda ka lafi da Ramut ma Gilghat.

²⁹ Ka mghama la Israʼila nda Yəhusafat mantsa: « Ka slahwaf slahwa yu ta vgha ŋa dzaʼa da vulu. Ama kagha, suɗava suɗa ta lguta gha, » kaʼa. Ka mbəɗavaftá mghama la Israʼila tama, ka laghu həŋ da vulu.

³⁰ Tsaw, wya ká mghama la Aram si mnanaftá maliha mwata plisa ni: « Yaha kuni da lmu nda hamata gwal vulu dər maliha taŋ, ama nda mghama la Israʼila kweŋkweŋ, » kaʼa.

³¹ Nghay maliha ta ghəŋa mwata plis ta Yəhusafat, ka həŋ mantsa: « Mghama la Israʼila ya, » ka həŋ. Ka mbəɗadaghatá həŋ ta vgha nda ta vata ni si má ŋa lmu nda tsi, ama ka wahatá Yəhusafat. Ka lagha Yawe katata, ka diʼiŋiŋta Lazglafta ta həŋ ta vata ni.

³² Nghay taŋ ná, mghama la Israʼila a wu, ka mbəɗaghutá həŋ ta vgha, ka zlanata.

³³ Ama ka hiŋtá sana mndu ta hava manda hazawa, ka lagha tsi krits slafta ta mghama la Israʼila ma vla guyata wa zalama ghuva ka kfur. Ka mgham nda mndu ta klanatá mwata plisa ni ya mantsa: « Mbəɗa ta vgha, ka klapta ka ta iʼi ma bakwa vulu, kabga nda bala yu, » kaʼa.

³⁴ Ɗavaf ɗa tsa vulu ya baɗ tsaya, ka diɗanavatá mghama la Israʼila ta vgha ta vata mwata plisa ni mbəŋ nda la Aram. Ka mtutá tsi ta dɗakwa fitik.