2Rus 17 - Hdi

Zɗakwa mgham Yəhusafat

¹ Ka lam zwaŋa ni Yəhusafat da gá mgham ma vla ni. Ka sganaghatá mbrakwa ni ŋa dzaŋtá kuma nda la Israʼila.

² Ka paghatá tsi ta bakwa gwal vulu ma inda luwaha nda matsaka huzlu ma Yuda, paghaha ta gwal ŋa nghapta ma haɗika Yuda nda ya ma luwaha la Ifrayim ya hlaghu da ni Asa.

³ Ka nzatá Yawe kawadaga nda Yəhusafat, kabga ksaf ksa ta tvi ya si ta ksə dzidza ni Dawuda taŋtaŋ. Zbaŋ a ta Baghalha wu,

⁴ ama da Lazglafta dzidzíha ni ta zba tsi, ka snatá tsi ta zlahuha ni, ksaf a ta saɗa la Israʼila wa.

⁵ Mantsa tama, ka dihanatá Yawe ta gá mgham ma dzva ni. Ka plə inda la Yuda ta dzumna ŋa Yəhusafat. Ka mutsaftá tsi ta gadghəl nda glaku ta fərtuta.

⁶ Ka laghu ŋuɗufa ni suh da ksa tva Yawe, ka hliŋtá tsi guli ta vliha tskal tskala nda skwa wuyayha Asera ta haɗika la Yuda.

⁷ Ta mahkəna vakwa ni ta gá mgham, ka ghwanaftá tsi ta maliha ta ksanatá slna ŋa dzaʼa taghanaftá skwi ta mnduha ma luwaha la Yuda: I Beŋʼhayil, nda Ghuvadiya, nda Zakari, nda Netaŋʼel, nda Mihayahu.

⁸ Ka ghwanaftá tsi kawadaga nda həŋ ta la Levi, i Səmaghyahu, nda Nətaŋya, nda Zəvadiya, nda Ghasaʼel, nda Səmiramut, nda Yunataŋ, nda Aduniya, nda Tuviya, nda Tuvʼaduniya, kawadaga gwal dra skwi ŋa Lazglafta nda həŋ guli, i Ilisama nda Yuram.

⁹ Ka tagh həŋ ta skwi ŋa la Yuda, nda klatá deftera zlaha Yawe ma dzvu. Ka rə həŋ ta luwaha la Yuda demdem nda tagha skwi ŋa mnduha.

Mbrakwa Yəhusafat

¹⁰ Ka ksutá zləŋa Yawe ta inda gá mghamha ta inda haɗikha ta sləvda nda la Yuda, vulaŋ a həŋ ta vulu nda Yəhusafat wa.

¹¹ Ka hlədanaghatá la Filisti ta mbəhu ta Yəhusafat, nda dzumna ka tsedi. Nduk nda la Arap tani, ka hlədanaghatá həŋ ta rini: Maŋazakha dəmbuʼ ndəfáŋ nda ndəfáŋ dərmək (7.700), nda duguzumha dəmbuʼ ndəfáŋ nda ndəfáŋ dərmək (7.700).

¹² Ka dzaʼa mbrakwa Yəhusafat ta kəma ta kəma. Ka babaftá tsi ma Yuda ta luwaha ka ŋaŋamta ma matsaka huzlu, nda luwaha ŋa nzula huzla.

¹³ Ka nzulanatá tsi ta ndəghata skwiha ma luwaha la Yuda, ka paghatá tsi ta gwal viɗviɗ ma vulu ma Ursalima.

¹⁴ Wya dagata ni ta mndəra taŋ ta mndəra taŋ: Ŋa la Yuda, maliha ta ghəŋa bakwa gwal vulu dəmbuʼ dəmbuʼ ná, Ghadna mali, nda gwal viɗviɗ ma vulu dəmbuʼ hkən dərmək (300.000) kawadaga nda tsi.

¹⁵ Ta vata ni, mamu Yəhuhanaŋ, mali nda gwal vulu dəmbuʼ his dərmək nda tghas mbsak (280.000) kawadaga nda tsi.

¹⁶ Ka fiŋtá Ghamasiya, zwaŋa Zihri, ya ta vlatá ghəŋa ni ŋa Yawe, nda gwal vulu dəmbuʼ his dərmək (200.000), kawadaga nda tsi.

¹⁷ Ma mndəra la Biŋyamiŋ: Iliyada mali, sana mndu ya viɗviɗ ma vulu, nda gwal vulu dəmbuʼ his dərmək (200.000) kawadaga nda tsi, lgheɗ nda zalam da həŋ.

¹⁸ Mista ni, Yəhuzavat, nda gwal vulu dəmbuʼ dərmək nda tghas mbsak (180.000), nda habatá vgha ŋa vulu kawadaga nda tsi.

¹⁹ Tsaha ya gwal ta maga slna mgham zlanaha lu ta tsa gwal pagha tsi ma luwaha nda matsaka huzla inda kwakwara la Yuda ya.