2Rus 16 - Hdi

Vula i Asa nda Baghsa

¹ Ta mahkən mbsaka mkuʼ mida vakwa Asa ta gá mgham, ka laf Baghsa mghama la Israʼila guk liŋtá la Yuda, ka ŋaŋglamtá tsi ta Rama ŋa pyaftá dər wa ta lami nda sabi ta kwakwara Asa, mghama la Yuda.

² Mantsa tama, ka hlagaptá Asa ta kfura tsedi nda dasu ma dzuguviha ɗifa skwa gadghəl ma həga Yawe nda ya ma həga mgham, ka tsəghaftá nda ma dzva gwal ghunay ŋa Benʼhadat, mghama la Aram ta nzakw ma Damas, kaʼa nda tsi mantsa:

³ « Dzraf u dzra ta wi, manda si nzakwa ni mataba i da gha nda da ɗa ya. Wya kfura tsedi nda dasu ta tsəghaghafta yu ka mbəhu. Skwi ta ɗaw yu da kagha na: La, ka dzaʼa ka da tsiŋtá tsa dzratá wi mataba gha nda Baghsa, mghama la Israʼila ya, ka zliɗiŋta həŋ ta haɗika ɗa, » kaʼa.

⁴ Ka snanatá Benʼhadat ta mgham Asa, ka ghunaftá tsi ta maliha ta ghəŋa gwal vula ni liŋtá luwaha la Israʼila, ka zluʼatá həŋ ta luwaha Ghiyuŋ, nda Daŋ, nda Avelʼmayim, nda inda luwaha ka vla ɗifa skwi ma kwakwara Naftali.

⁵ Na tsa snaŋta Baghsa ta tsa gwaɗa ya, ka zlanatá tsi ta ŋaŋgəltá Rama, ka zlanavatá slnaha ta mag tsi.

⁶ Ka tskanatá mgham Asa ta inda la Yuda. Ka hlaghatá həŋ ta palaha, nda udzuha si kəl Baghsa ka ŋaŋglamtá Rama nda tsi ya. Ka hlaftá tsi ŋa ŋaŋglamtá Gevagh nda Mitspa.

Gwaɗa Hanani ka slayaŋ

⁷ Ma tsa fitik ya, ka lagha Hanani ka slayaŋ slanaghatá Asa, mghama la Yuda, kaʼa nda tsi mantsa: « Vəl dihafta gha ta vgha ta mghama la Aram, ka kwalaghuta dihaftá vgha ta Yawe, Lazglafta gha, kəl gwal vula mghama la Aram ka ndandapta ma dzva gha.

⁸ La Kus nda la Libi ná, ndəghu ndəgha həŋ katakata. Mamu mwata plis ŋa vulu, nda gwal ŋla plis ta ndəghuta da həŋ. Kulam nda tsa ndəghatá həŋ ya, vla vla Yawe ta həŋ ma dzva gha, kabga vəl dihafta gha ta vgha tida.

⁹ Nziya nza tsi, ta ray Yawe ta inda ghəŋa haɗik nda ngha vli ŋa hinistá dzvu ta gwal nda fa ŋuɗufa taŋ kahwathwata ta tsatsi. Guv ga ka ta rgha ma tsa ma tsa skwi maga ka ya, tsaya dzaʼa kəl lu ka vulu daga ndanana nda kagha, » kaʼa.

¹⁰ Ka ɓasanavatá Asa ta ŋuɗuf ta tsa slayaŋ ya, ka tsamtá tsi ma gamak, kabga gufatá ŋuɗufa ni ta ghəŋa ni, dabga tsa gwaɗa ya. Ma tsa fitik ya, ka ghuyanaptá Asa ta ɗaŋwa ta sanlaha ma mnduha.

Kwanaha gá mghama Asa

¹¹ Slnaha Asa, nda zlrafta ni nda kɗavakta ni tani ná, vivindam vivinda lu ma ɗelewera slnaha mghamha la Yuda nda la Israʼila.

¹² Ta mahkən mbsak təmbay mida vakwa Asa ta gá mgham, ka ksaftá sana ɗaŋwa ka kuzla ta səlaha. Kulam nda nzakwa tsa ɗaŋwa ni ya ka kuzla, zbaŋ a ta Yawe wu, ama ka laghu tsi ɗawa katu da gwal ta zughula mndu.

¹³ Ka laghu Asa da dzidzíha ni. Ka mtutá tsi ta mafwaɗ mbsak ndeŋ mida vakwa ni ta gá mgham.

¹⁴ Ka paɗamtá lu ma kulu ya lanap tsatsi ta ghəŋa ni ma luwa Dawuda. Ka hananaftá lu ta sana ghəzləŋ bərzlaf lu ta urdiha zɗa zɗa ziʼakwa taŋ, nda urdiha ya payaf la ka midala ta data, ka vanaghatá lu ta vu gik ŋa vlaŋtá sgit.