2Rus 15 - Hdi

Dzrəglafta Asa ta wi nda Yawe

¹ Ka saha Sulkuma Lazglafta ta ghəŋa Ghazaryahu zwaŋa Ghudet.

² Ka sab tsi ta kəma Asa, kaʼa nda tsi mantsa: « Fihawa fa ta sləməŋ, i Asa nda inda la Yuda nda la Biŋyamiŋ! Kawadaga Yawe nda kaghuni, ka kawadaga kaghuni nda tsi. Ka ta zbay kuni, dzaʼa slay kuni, ama ka zlanava zla kuni, dzaʼa zlavaghuna zla.

³ Nda kɗa fitika la Israʼila ta nzakw kul haɗ vərɗa Lazglafta, kul haɗ mnda dra skwi ŋa Lazglafta ta tagha skwi ŋa taŋ, kul haɗ zlahu.

⁴ Ama ma ghuya ɗaŋwa taŋ, ka vradaghatá həŋ da Yawe, Lazglafta la Israʼila. Ka zbaŋtá həŋ, ka slaftá həŋ tida.

⁵ Ma tsa fitikha ya, haɗ zɗaku dər da wati ma mndu wu, kabga dagala skwiha ta ghudza inda mnduha ta haɗikha.

⁶ Ka ɗatsu lu ta vgha, sana mndəra mndu nda sana mndəra mndu, sana luwa nda sana luwa, kabga Lazglafta ta zlaɓanaftá həŋ nda inda mndərga ghuya ɗaŋwaha kavgha kavgha.

⁷ Ama kaghuni, mbrawa mbra ta vgha, ma rwu kuni ta vgha, kabga mamu nisəla slna ghuni, » kaʼa.

⁸ Snaŋta taŋ ta tsa gwaɗa klak anabi Ghazaryahu zwaŋa Ghudet ya, ka mutsaftá Asa ta mbrakwa hliŋtá skwa manzakɗaway ta inda haɗikha la Yuda nda la Biŋyamiŋ, nda ya ma luwaha hlaghu tsi ta kwakwarha ta ghwá Ifrayim, ka vranaftá tsi ta tsa gwira Yawe si ta kəma rmaka həga Yawe ya.

⁹ Ka tskanatá tsi ta inda la Yuda nda la Biŋyamiŋ, nda ya nda la Ifrayim, nda la Mənase, nda la Simghuŋ ta nzakw ma səla taŋ. Nda ndəgha la Israʼila ta dziŋtá vgha mista ni manda nghanata taŋ kazlay na kawadaga Yawe, Lazglafta ni nda tsi kəʼa.

¹⁰ Ma mahkəna tili, ta maghwaŋpəɗ hutafa vakwa Asa ta gá mgham, ka tskavatá həŋ ma Ursalima.

¹¹ Baɗ tsa fitik ya, ka vlaŋtá həŋ ta skwa pla ghəŋ ta Yawe, mataba skwiha zləɗak həŋ: Ndəfáŋ dərmək (700) slaha, dəmbuʼ ndəfáŋ (7.000) rina fisik.

¹² Ka fatá həŋ ta ghəŋ nda ma dzratá wi ka zba Yawe, Lazglafta dzidzíha taŋ, nda hya hya ŋuɗufa taŋ, nda inda hafa taŋ.

¹³ Dər wati ma mndu tsi, kul zba Yawe, Lazglafta la Israʼila, dzaʼa dza dza lu, dər zwaŋ tsi, dər glata mndu tsi, dər zgun tsi, dər marakw a tsi.

¹⁴ Ka waɗanatá həŋ ta Yawe nda lwi dagala, nda dza hayayi nda dza hayayi, nda ya nda vya talakwaha nda duliha.

¹⁵ Ka rfu inda la Yuda ta rfu ta ghəŋa tsa waɗu ya, kabga ma hya hya ŋuɗufa taŋ waɗata həŋ, nda kumay taŋ zba həŋ ta Yawe. Ka slaftá həŋ tida, ka vlaŋtá Yawe ta mbiʼa vgha ta həŋ dər ndiga ndiga.

¹⁶ Ka kliŋtá mgham Asa ta midza ni Maghaha markwa mgham ma nzakwa ni ka markwa mgham, kabga vəl magafta ni ta skwa wuyay Asera ta vla hula ŋa mndu. Ka hliŋtá Asa ta skwa wuyay ni, ka nanafta ka gninika haɗik, ka driŋta ta wa lika Kidruŋ.

¹⁷ Kulam nda tsa, hlu a tsa vliha tskal tskala ma Israʼila, dər má ndiʼaf ndiʼa Asa ta vgha kahwathwata ta Yawe ma nzakwa ni nda hafu wa.

¹⁸ Ka hladaghatá tsi da həga Lazglafta ta skwiha si pghaghu da ni, nda ya pghaghu vərɗa tsatsi ŋa Lazglafta: Tsaya tsedi, nda dasu, nda huzlaha kavghakavgha.

¹⁹ Haɗ vulu dər ka kiʼa ta slata ha ka lagha ta mahkən mbsak hutaf mida vakwa Asa ta gá mgham wa.