2Rus 13 - Hdi

Aviya, mghama la Yuda

¹ Ta maghwaŋpəɗ tghasa vakwa Yaruvgham ta gá mgham, lama Aviya da gá mgham ta ghəŋa la Yuda.

² Hkən vakwa ni ta gá mgham ma Ursalima. Mihayahu hga ma ni, makwa Uriʼel mnda la Givgha. Ka vulu i Aviya ta vulu nda Yaruvgham ma vgha taŋ.

³ Ka sliʼanaftá Aviya ta vulu kawadaga nda mnduha viɗviɗ ma vulu zabap tsi dəmbuʼ fwaɗ dərmək (400.000). Ka dzaftá Yaruvgham ta gwal viɗviɗ ma vulu zabap tsi dəmbuʼ tghas dərmək (800.000).

⁴ Ka sliʼaftá Aviya ka lafi ta wa lilwa ta ghwá Tsəmarayim, tekw ma kwakwar ta ghwá Ifrayim, ka sladata, kaʼa mantsa: « Fihawa fa ta sləməŋ i Yaruvgham nda la Israʼila demdem!

⁵ Sna a kuni kazlay na vlaŋ vla Yawe, Lazglafta la Israʼila ta Dawuda ta gá mgham ŋa ɗekɗek ta ghəŋa la Israʼila, ŋa tsatsi nda inda zivira ni, nda ma dzratá wi nda slughul, kəʼa wu ra?

⁶ Ama lagha Yaruvgham, zwaŋa Nəvat, si ta nzakway ka kwalva Salumuŋ, zwaŋa Dawuda ná, ka sliʼafta ganavatá sidi ta daŋahəga ni.

⁷ Lagha falaya mnduha, nda gwal kul zɗaku hafa taŋ, ka gwaftá vgha nda tsi ta ghəŋa Rəhavgham, zwaŋa Salumuŋ. Ta ka zwaŋ Rəhavgham, tska a hiɗakwa ni wu, kwal tsi ŋaŋta da həŋ.

⁸ Ndana tama, nda mbra ŋni ŋa dzaŋtá kuma nda gá mghama Yawe ma dzva zivira Dawuda ka kuni ɓa! Nda nza kuni ka bakwa mnduha nda ndəgha, mamu kuni nda fwata mamakwa slaha ka dasu magaghunaf Yaruvgham ŋa nzakwa taŋ ka lazglaftaha ghuni.

⁹ Ghazliŋ a kuni ta gwal dra skwi ŋa Yawe, i zivira Haruna nda la Levi, ka hlamtá kaghuni ka ghəŋa ghuni ta gwal dra skwi ŋa Lazglafta manda mnduha ma sana haɗikha wu ra? Inda mndu ta lagha nda lghəŋ dɓakwa nda ya nda maŋazakha ndəfáŋ ná, tsaya ta famta lu ka mnda dra skwi ŋa skwi kul haɗ ka Lazglafta.

¹⁰ Aŋni tani ná, Yawe, Lazglafta ŋa aŋni, zlanava a ŋni wa. Mnduha ŋni ta dra skwi ŋa Yawe ná, zivira Haruna həŋ, ta maga slna taŋ la Levi guli.

¹¹ Inda sərɗək nda ya inda hawu ta dra ŋni ŋa Yawe ta skwa pla ghəŋ ŋa dray tsuh tsuh nda urdi zɗa ziʼakwa ni. Ta dzaf dza ŋni ta gatuha fana lu ta Yawe ta tabəl nda tsaɗa, ta tsatsuŋ tsatsa ŋa ta vu ta wa pitirlaha ta gaŋaŋa ni ka dasu. Ta magay ŋni ta slna Yawe, Lazglafta ŋni, ama kaghuni, zlanava zla kuni.

¹² Wana kawadaga Lazglafta nda aŋni, tsatsi mghama ŋni, nda paya vgha gwal dranatá skwi ŋa vya duli ŋa dzaʼa guyata nda kaghuni. Ariwa Israʼila! Ma vulu kuni ta vulu nda Yawe, Lazglafta dzidzíha ghuni, kabga haɗ kuni dzaʼa zatá ghwa wu! » kaʼa.

¹³ Ma va tsaya ná, pgha pgha Yaruvgham ta sanlaha ma gwal vulu ma buɗukwa ŋa dɗanaghatá la Yuda nda ga mahulhul. Mamu gula gwal vula ni mbəŋ nda nzata nzakwa bakwa sludziha la Yuda, ta nzatá tsa gwal ma bɗukwa ya nda ga mahulhula taŋ.

¹⁴ Kəʼa ka la Yuda mbəɗavata ná, wya gwal ŋa vulu nda həŋ ta kəma taŋ nda ya nda ga mahulhula taŋ. Ka wahu həŋ ta wahu da Yawe, ta viy gwal dra skwi ŋa Lazglafta ta talakwaha,

¹⁵ ka hlaftá la Yuda ta hlawa vulu. Na tsa hlafta la Yuda ya, ka dzuŋtá Lazglafta ta Yaruvgham nda inda la Israʼila ta wa ira i Aviya nda la Yuda.

¹⁶ Ka tatá la Israʼila ta vgha nda hwaya ta kəma la Yuda, ka vlatá Lazglafta ta həŋ ma dzva la Yuda.

¹⁷ Ka pslatá i Aviya nda gwal vula ni katakata ta la Israʼila. Ka rwanatá həŋ ta gwal vulu zabap lu dəmbuʼ hutaf dərmək (500.000).

¹⁸ Ma tsa fitik ya, ka hanaganatá la Israʼila ta ghəŋ, ka zatá la Yuda ta ghwa, kabga dihaf diha həŋ ta vgha ta Yawe, Lazglafta dzidzíha taŋ.

¹⁹ Ka ndriŋtá Aviya ta Yaruvgham, ka zluʼaghutá luwaha ni: Tsaha ya Betel nda zwana luwaha ni, nda Yəsana nda zwana luwaha ni, nda Ghefruŋ nda zwana luwaha ni.

²⁰ Mutsəglaf a Yaruvgham ta mbraku ɗekɗek ta fitika gá mghama Aviya wu, ka dzuŋtá Yawe, ka mtutá tsi.

²¹ Ama ka sgaku mbrakwa Aviya nda sga. Ghwaŋpəɗ fwaɗ miʼa ni, ka yayatá tsi ta zwana zgwana hisambsak his mida nda kuʼaha ghwaŋpəɗ mkuʼ.

²² Pɗakwa slnaha Aviya, nda slnaha maga tsi nda gwaɗaha gwaɗa tsi ná, vivindam vivinda lu ma ɗelewera rusa anabi Ghidu.

²³ Ka laghu Aviya da dzidzíha ni, ka paɗamtá lu ma luwa Dawuda. Ka lam zwaŋa ni Asa da gá mgham ma vla ni. Ta fitika gay Asa ta mgham, ka zatá tsa haɗika ya ta vaku ghwaŋ ma zɗaku.