2Rus 11 - Hdi

Gwaɗa anabi Səmaghya

¹ Ɓhadaghata Rəhavgham da Ursalima, ka tskanatá tsi ta gwal ka bikwira vulu dəmbuʼ dərmək nda tghas mbsak (180.000) mataba la Yuda nda la Biŋyamiŋ, ŋa vulu nda la Israʼila ŋa vranaktá həŋ dista gá mghama Rəhavgham.

² Ama ka mnanatá Yawe ta gwaɗa ni ta Səmaghya mnda Lazglafta, kaʼa mantsa:

³ « Mnana mna ta Rəhavgham, zwaŋa Salumuŋ, mghama la Yuda, mnana ka ta inda la Yuda, nda la Biŋyamiŋ, la Israʼila, ka ka nda həŋ na:

⁴ “Wya ka Yawe mnata: Ma laf kuni da vulu nda zwana ma ghuni, la Israʼila! Ka vra inda kaghuni dzagha ni, kabga iʼi ta maga tsa skwi ta magaku ya,” » kaʼa. Ka snatá həŋ ta gwaɗa Yawe ta mnata, ka zlanatá dzaʼa da vulu nda Yaruvgham.

Ŋaŋglamta Rəhavgham ta luwaha

⁵ Ka nzatá Rəhavgham ma Ursalima, ka ŋaŋglamtá tsi ta luwaha ma matsaka huzlu da la Yuda.

⁶ Wya luwaha ŋaŋglam tsi: Betʼlehem, nda Ghetam, nda Tekuwa,

⁷ nda Betʼtsur, nda Suhu, nda Ghadulam,

⁸ nda Gat, nda Maresa, nda Zif,

⁹ nda Adurayim, nda Lahis, nda Ghazeka,

¹⁰ nda Tsurgha, nda Ayaluŋ, nda Hevruŋ. Tsaha ya luwaha ma matsaka huzlu ma haɗika Yuda nda Biŋyamiŋ.

¹¹ Ka ŋaŋglaftá tsi ta matsakha huzlu, ka paghatá tsi ta maliha, ka nzulanatá tsi ta skwa zay, nda rɗa zaytuŋ, nda ima inabi.

¹² Ka paghatá tsi ma inda tsa luwaha ya ta zalamha dagala dagala, nda gupaha, ka valaŋtá tsi ta mbraku ta həŋ. Ka nzatá haɗika Yuda nda Biŋyamiŋ ka ŋa ni.

Gwal ta gwaftá vgha nda Rəhavgham

¹³ Ka sliʼakta gwal dra skwi ŋa Lazglafta nda la Levi ta nzakw ta inda kwakwara la Israʼila da gwaftá vgha nda Rəhavgham.

¹⁴ Ka zlanavatá la Levi ta haɗika za həga taŋ, nda vla ngha rina taŋ, ka laghwi da Yuda nda Ursalima, kabga pyafta i Yaruvgham nda zwana ni ta həŋ ka hɗamtá slna dra skwi ŋa Yawe.

¹⁵ Ka pghatá Yaruvgham ta gwal dra skwi ŋa Lazglafta ŋa maganatá slna ta vliha tskal tskala, nda skwa wuyay ka duguzumha nda ya ka mamakwa slaha.

¹⁶ Ma inda mndəra la Israʼila, mamu mnduha ta kuratá zba Yawe, Lazglafta la Israʼila. Ka laghu həŋ mista la Levi da Ursalima ŋa vla skwa pla ghəŋ ŋa Yawe, Lazglafta dzidzíha taŋ.

¹⁷ Ka vlaŋtá həŋ ta mbraku ta gá mghama la Yuda, ka hinistá həŋ ta dzvu ta Rəhavgham, zwaŋa Salumuŋ ka vaku hkən. Hkən vakwa taŋ ta ksa saɗa i Dawuda nda Salumuŋ.

La ga Rəhavgham

¹⁸ Ka klaftá Rəhavgham ka marakw ta i Mahalat makwa Yəremut zwaŋa Dawuda, nda Avihayil makwa Iliʼav, zwaŋa Yisay.

¹⁹ Ka yayanatá Mahalat ta zwani hkən: I Yəghus, nda Səmarya, nda Zaham.

²⁰ Tahula tsa, ka klaftá tsi ta Maghaha, zigha Avsalum. Ka yayanatá tsi ta zwani: I Aviya, nda Ghatay, nda Ziza, nda Səlumit.

²¹ Ka ɗvutá Rəhavgham ta Maghaha, zigha Avsalum ka malaghutá inda miʼa ni nda miʼa sanagha ni. Tsaw ghwaŋpəɗ tghas miʼa ni, mkuʼ mbsak miʼa sanagha ni, ka yayatá tsi ta zwana zgwana hisambsak tghas mida, nda kuʼaha mkuʼ mbsak.

²² Ka vlaŋtá Rəhavgham ta mamalmali ta Aviya, zwaŋa Maghaha, ka fatá tsi ka mali ta ghəŋa zwana ma ni, kabga ta kumay ta famta ka mgham.

²³ Ka ndanaptá Rəhavgham ta ndanu ɗina, ka dagiŋtá tsi ta zwana ni da inda kwakwarha la Yuda nda la Biŋyamiŋ, da inda luwaha ma matsaka huzlu. Ka valaŋtá tsi ta skwiha ŋa zay ka haslay ta həŋ, ka halanaftá tsi ta ndəghatá miʼi ta həŋ.