2Mgh 9 - Hdi

Famtá Yehu ka mghama la Israʼila

¹ Ka hgaŋtá anabi Ilisa ta sani mataba guyatá ghəŋa anabiha, kaʼa nda tsi mantsa: « Hba ta vgha, ka klafta ka ta hwaraka rɗi, ka dzaʼa ka da Ramut ma Gilghat.

² Ɓhadaghata gha da hada ya, ka lagha ka da slanaghatá Yehu, zwaŋa Yəhusafat, zigha Nimsi. Ka hgaghuta ka mataba zwana ma ni, ka klaghata ka da sana dzuguvi kətsaʼu.

³ Ka klafta ka ta tsa hwaraka rɗi ya, ka pghəganata ka ma ghəŋ, ka ka dazlay: “Wya ka Yawe mnata: Nda ma pghaghaghatá na rɗi na, fa fa yu ta kagha ka mghama la Israʼila,” kaʼa, ka ka dazlay. Ka gi gunata ka ta wa tgha ka hwayaghuta ka yaha ka da sladavata, » kaʼa.

⁴ Ka laghu tsa duhwal ka anabi ya da Ramut ma Gilghat.

⁵ Ɓhadaghata ni, ka slanaghatá tsi ta tskata vgha maliha gwal vulu ta nzaku, kaʼa mantsa: « Mghama ɗa, mamu gwaɗa ɗa nda kagha, » kaʼa. Ka Yehu mantsa: « Nda wa gwaɗa gha mataba ŋni? » kaʼa. « Nda kagha mghama ɗa, » ka tsa anabi ya.

⁶ Ka sliʼaftá Yehu ka lam da həga. Ka pghəganatá tsa duhwal ka anabi ya ta rɗi ma ghəŋ, kaʼa mantsa: « Wya ka Yawe, Lazglafta la Israʼila mnata: “Nda ma pghaghaghatá rɗi, fa fa yu ta kagha ka mghama mnduha ɗa la Israʼila.

⁷ Kagha dzaʼa rwanatá la ga Ahav, si daŋahəga gha ghalya. Mantsa ya dzaʼa plamta yu ta rwanata rwana Izabel ta kwalvaha ɗa la anabi, nda sanlaha ma kwalvaha ɗa.

⁸ Aŋi, dzaʼa rwana rwa lu ta inda la ga Ahav. Dzaʼa zaɗana zaɗa yu ta inda zgwana ka kwana la Ahav ma Israʼila, dər vuʼa tsi, dər mndu nda pla vgha ni a tsi.

⁹ Dzaʼa magana maga yu ta la ga Ahav manda ya magana yu ta la ga Yaruvgham, zwaŋa Nəvat, nda la ga Baghsa, zwaŋa Ahiya ya.

¹⁰ Izabel ya, kri dzaʼa zuta ma vwaha Yizrəghel, haɗ mndu dzaʼa lamta wu,” kaʼa, » kaʼa. Tahula tsa, ka gunagapta tsa duhwal ka anabi ya ta wa tgha, ka hwayaghuta.

¹¹ Saba Yehu da sanlaha ma kwalvaha rvera ni, ka lu nda tsi mantsa: « Zɗaku suʼu? Kabgawu kəl tsa halaway ya ka sagha da kagha na? » ka həŋ. Ka Yehu zlghaftá wi mantsa: « Nda sna kaghuni ta mndərga tsa mndu ya, nda gwaɗa ta gwaɗ tsi, » kaʼa.

¹² Ka həŋ nda tsi mantsa: « Bukwaʼa gha ya! Mnaŋna mna ta skwi ta maguta, » ka həŋ. Ka Yehu zlghaftá wi mantsa: « Wya skwi mniha tsi: “Wya ka Yawe mnata: Nda ma pghaghatá rɗi, fa fa yu ta kagha ka mghama la Israʼila,” kaʼa, » kaʼa.

¹³ Ka gi klaftá dər wa ta lguta ni ka zlazlatata ta kəma Yehu ŋa sladafta ni tida ta madzəɓara. Ka vyatá həŋ ta duli, ka hla wi, « Ta mblam ka hafa mgham Yehu! » ka həŋ.

Zbay Yehu ta zluʼatá ga mgham da Yuram

¹⁴ Ka zbə Yehu, zwaŋa Yəhusafat, zigha Nimsi ta tva dzatá mgham Yuram, ma fitika nzakwa ni nda inda gwal vula la Israʼila ma Ramut ma Gilghat ŋa huzla haɗika la Israʼila, yaha Hazaʼel mghama la Aram da dɗanaghata.

¹⁵ Tsaw vragaghu vra mgham Yuram da zughula vgha ni ma Yizrəghel, ma vəl balanata la Aram ta vulu həŋ ta vulu nda Hazaʼel, mghama la Aram. Ka Yehu mantsa: « Ka kura kura kuni ta dzaʼa mista ɗa katsi, yaha mndu dər turtuk da ndapta ma luwa ŋa dzaʼa da Yizrəghel da mna na skwi ta maguta hadna na, » kaʼa.

¹⁶ Ka laf Yehu da mwata plisa ni, ka laghwi da Yizrəghel, da vla hana Yuram ka ɓasay. Ka laha Ahaziya, mghama la Yuda da nghanaghata.

¹⁷ Ka nghaŋtá mnda nghapta ta wa lilwa ta həga nda slra ma Yizrəghel ta lagha bakwa mnduha Yehu. « Nda ngha yu ta bakwa mnduha! » kaʼa dzatá lawlaw. Ka Yuram mantsa: « Ghunaf ghuna ta mndu ta plis ka dzaʼa tsi guyaku nda həŋ ŋa ɗawaŋta, ka ləŋləŋ vli, » kaʼa.

¹⁸ Ka lab mnda ŋla plis da guyaku nda Yehu, ka ɗawaŋta, kaʼa mantsa: « Wya ka mgham mnata: “Zɗaku suʼu ta klaktá kagha na?” » kaʼa. Ka Yehu zlghaftá wi mantsa: « Nu gwaɗa gha nda zɗaku na? Mbəɗava mbəɗa mista ɗa, » kaʼa. Ka tsa mnda nghapta ta wa lilwa ta gugɗata ya mantsa: « Lagha la tsa mndu ghunaf lu ya da həŋ, ama ta vragagha a wu, » kaʼa.

¹⁹ Ka ghunəglafta tsi ta sana mnda ŋla plis, ka ɓhadaghatá tsi da həŋ, kaʼa mantsa: « Wya ka mgham mnata: “Zɗaku suʼu ta klaktá kagha na?” » kaʼa. Ka Yehu zlghaftá wi mantsa: « Nu gwaɗa gha nda zɗaku na? Mbəɗava mbəɗa mista ɗa, » kaʼa.

²⁰ Ka tsa mnda nghapta ta wa lilwa ya mnəglaŋta mantsa: « Lagha la tsa mndu ghunaf lu ya da həŋ, ama vragagha a wa. Ta graftá yu ná, zlah Yehu, zigha Nimsi ya, kabga ka halaway halaway ta hwaya tsi ta hwaya nda mwata plis, » kaʼa.

²¹ Ka Yuram mnafta mantsa: « Payaɗifwa paya ta mwata plisa ɗa, » kaʼa. Ka payanaftá lu ta mwata plisa ni. Ka sliʼaftá i Yuram, mghama la Israʼila, nda Ahaziya, mghama la Yuda dər wa ma mwata plisa ni ŋa dzaʼa guyaku nda Yehu. Ka guyatá həŋ nda tsi ma vwaha Navut mnda la Yizrəghel.

²² Na gi nghaŋta Yuram ta Yehu, ka ɗaw tsi da tsi, kaʼa mantsa: « Zɗaku suʼu ta klaktá kagha na? » kaʼa. Ka Yehu zlghaftá wi mantsa: « Waká a dzaʼa nzakway ka zɗaku, tata kɗaŋ kɗa ma gha Izabel ta tsəlɓu ŋa skwa wuyay, ka ga tsa ma muta muta ni ta ndəghuta ya na? » kaʼa.

²³ Ka mbəɗavatá Yuram ka hwaya, ka dza lawlaw ŋa Ahaziya, kaʼa mantsa: « Ɗasuwa ka ka Ahaziya, mndu ya skwap lu! » kaʼa.

²⁴ Ama ka tɗaptá Yehu ta lgheɗa ni ka hata Yuram ma vɗakata hul. Ka tanaptá tsa hava ya ta ŋuɗuf ka zlagapta ma ghuva. Ka zləmbatá Yuram dzəŋwaf ma mwata plisa ni, ka mtuta.

²⁵ Ka Yehu nda Bidkar, mnda klanatá huzla vula ni mantsa: « Klaga kla ka vzamta ka ma vwaha Navut, mnda la Yizrəghel. Havak hava gha ta fitika mbaɗay u ta mbaɗa kawadaga ma mwata plis nda sanlaha mista da ni Ahav ya, ka mnaftá Yawe ta na gwaɗa na ta ghəŋa ni ya:

²⁶ “Nda ngha yu kahwathwata ɗahawu ta pslatá i Navut nda zwana ni. Ka Yawe ná, dzaʼa plagham pla yu ma va na vwah na,” ka Yawe mnata. Mantsa tama, klaga kla ta mbla ni, ka vzadamta ka da na vwah na taɓta gwaɗa Yawe ta mnata, » kaʼa.

Mtakwa Ahaziya

²⁷ Nghanata Ahaziya, mghama la Yuda ta skwi ta magutá, ka hwayaghatá tsi nda ta tva dzaʼa da Betʼhagaŋ. Ama ka zbiŋtá Yehu, kaʼa mantsa: « Dzawa dza ta tsatsi guli, » kaʼa. Ka hatá lu ma mwata plisa ni ta ŋla vli ma Gur, ndusa nda Yivlegham. Ka hwayaghatá tsi da Məgidu, ka mtuta tsi hada.

²⁸ Ka klaghatá kwalvaha ni ma mwata plisa ni da Ursalima. Ka paɗamtá lu ma kula ni ta vata dzidzíha ni ma luwa Dawuda.

²⁹ Ta maghwaŋpəɗ ndeŋa vakwa Yuram, zwaŋa Ahav ta pala, ka nzatá Ahaziya ka mgham ta ghəŋa la Yuda.

³⁰ Ta lam Yehu da Yizrəghel, ka snaŋtá Izabel ta tsaya, ka tahamtá skwi ma iri, rkafha ta rka ma ghəŋ, ka nghagapta nda ta finitir.

³¹ Ta lam Yehu ta wa tgha luwa, ka Izabel mantsa: « Zɗaku ta klakta ka rki, a Zimri, mndu ta dzatá daŋahəga ni? » kaʼa.

³² Ka klaŋtá Yehu ta ghəŋ təv finitir, kaʼa mantsa: « Wa ya kawadaga nda iʼi na? Wa ya? » kaʼa. Ka didiɗadaghatá mapslaha his ka hkən a tsi ta vgha nda ta finitir, ka hihɗiŋagapta.

³³ Ka Yehu mantsa: « Vzagawa vza ta haɗik, » kaʼa. Ka vzagatá həŋ, ka wutsiraftá usa ni ta vata matsak nda ya ta plisha. Ka ŋalaftá Yehu tida nda mwata plisa ni.

³⁴ Ka lam Yehu da həga gá mgham, ka zutá tsi ta skwa zay, suha ta skwa say, kaʼa nda gwal mista ni mantsa: « Kdəkwa kdək, lawa la ngha gwaɗa ta tsa marakw nda ksiʼa ya, ka lamta kuni, kabga makwa mgham ya, » kaʼa.

³⁵ Ka lab həŋ má ŋa dzaʼa da lamta, lay ngha a həŋ wu, ta ghəŋa leghwa ghəŋa ni, nda papahha ni, nda huɗa wa dzvuha ni yeya slanagha həŋ.

³⁶ Ka vradaghatá həŋ da mnanatá Yehu. Ka Yehu mantsa: « Tsaya skwi mna Yawe nda ma wa kwalva ni Iliya, mnda la Tisbe. Kaʼa mnata na: “Kriha dzaʼa zutá sluʼa Izabel ma vwaha Yizrəghel.

³⁷ Dzaʼa watsakanap watsaka lu ta sluʼa Izabel manda dzatá rgwa ta vwaha Yizrəghel, ha ŋa traptá mnay kazlay: Izabel ya,” kəʼa, » kaʼa.