2Mgh 6 - Hdi

Safa sndiliŋa slpaɗa ta ghəŋa imi

¹ Ka guyatá ghəŋa anabiha nda Ilisa mantsa: « Nda hta na vli ta nzata ŋni ta kəma gha na katakata ka ŋa ŋni.

² Wya dzvu, ka la ŋni ta wa zala Yardeŋ! Dzaʼa tsadanagha tsa dər wati ma aŋni ta udzu ŋa magafta ŋni ta vla nzaku hada, » ka həŋ. Ka Ilisa mantsa: « Lawa la, » kaʼa.

³ Ka sani mataba taŋ mantsa: « Wya dzvu, mbaɗa mista kwalvaha gha, » kaʼa. « Aray, ta dzaʼa yu, » kaʼa.

⁴ Ka laghu tsi mista taŋ. Ɓhadaghata taŋ da Yardeŋ, ka pslə həŋ ta fu.

⁵ Ta tsay tsay sani mataba taŋ ta fu, ka sndilaghatá slpaɗa da imi. Ka wahatá tsa mndu ya, kaʼa mantsa: « Wayaw, rvera ɗa! Da mndu ɗawafta yu! » kaʼa.

⁶ Ka mnda Lazglafta ɗawaŋta mantsa: « Ga dɗadata tsi na? » kaʼa. Ka ɗikwanaftá tsi ta vla ni. Ka tsaʼatá Ilisa ta udzu desla, ka wuɗadata ma tsa vli ya, ka saf tsa slpaɗa ya ta ghəŋa imi.

⁷ Ka Ilisa mantsa: « Klagaf kla gha, » kaʼa. Ka tsəghadaptá tsi nda dzvu, ka klagafta.

Hlafta Ilisa ta sludziha la Aram

⁸ Ma vulu mghama la Aram nda la Israʼila, ka dzərku tsi ta dzərku nda maliha ta ghəŋa gwal vula ni, kaʼa mantsa: « Ma vli manda ya dzaʼa fata yu ta ghuɓa ɗa, » kaʼa.

⁹ Ama ka tsəghanaftá mnda Lazglafta ta lwi ta mghama la Israʼila, kaʼa mantsa: « Ɗasuwa ka ka, nda lab da tsa vli ya, kabga hada dzaʼa saha la Aram, » kaʼa.

¹⁰ Ka ghunaftá mghama la Israʼila ta mnduha da nzata ma tsa vli mnanaf mnda Lazglafta ya. Kidaghi səla taŋ ta magay.

¹¹ Ka kɓanaftá tsi ta mghama la Aram. Ka hagaftá tsi ta kwalvaha ni, kaʼa nda həŋ mantsa: « Dzaʼa mniɗiŋ mna kuni ka wa tsi mataba mu ta hla tsa mndər ŋa mghama la Israʼila ya? » kaʼa.

¹² Ka ya turtuk mataba kwalvaha ni mantsa: « Haɗ mndu rveri, mghama ɗa wa! Ilisa, anabi ma Israʼila ya, ta hlaŋtá mghama la Israʼila ta gwaɗaha ta mnata ka ma dzuguva hana gha, » kaʼa.

¹³ Ka mgham mantsa: « Lawa nghanata ka ga tsi ya, ŋa laba ɗa da ksafta, » kaʼa. Ka lu mnanata mantsa: « Waʼa ma Dutaŋ, » ka lu.

¹⁴ Ka ghunaftá tsi ta ŋəɗdəmata bakuha sludziha nda plis nda plis, nda mwata plisha, ka ɓhadaghatá həŋ girviɗik, ka ŋaftá həŋ ta tsa luwa ya.

¹⁵ Ka tsavaftá slufa mnda Lazglafta ga sərɗək ŋa sabi ma luwa, kəʼa kəʼa ná, wanaf wa bakwa sludziha, nda plis nda plis, nda mwata plisha. Ka tsa duhwala ni ya nda tsi mantsa: « Aya rvera ɗa! Waká u dzaʼa magay na? » kaʼa.

¹⁶ Ka Ilisa mantsa: « Ma zləŋ ka ta zləŋ, kabga mal gwal kawadaga nda uʼu ndəghata həŋ ka gwal kawadaga nda hahəŋ, » kaʼa.

¹⁷ Ka magata Ilisa ta duʼa, kaʼa mantsa: « Yawe, gunana guna ta iri ta na duhwal na ka nghaŋta tsi, » kaʼa. Ka gunanatá Yawe ta iri, ka nghaŋtá tsi ta sumtukwata ghwá ta wanaftá Ilisa da plisha nda ya da mwata plis ka vu.

¹⁸ Ka sliʼadatá la Aram nda təv Ilisa. Ka magatá tsi tama ta duʼa da Yawe, kaʼa mantsa: « Kdəkkdək ghulpiŋ ghulpa ta na mnduha na! » kaʼa. Ka ghulpiŋtá Yawe ta həŋ taɓta gwaɗa Ilisa.

¹⁹ Ka Ilisa nda həŋ mantsa: « Tvi ɗina a nana wu, nana na a vərɗa luwa wa. Mbaɗwa mista ɗa, ka hlaghunata yu da tsa mndu ta psə kuni ya, » kaʼa. Ka hlaghatá tsi ta həŋ da Samari.

²⁰ Manda lama taŋ da luwa Samari, ka Ilisa mantsa: « Yawe, gunana guna ta ira na mnduha na ka nghaŋta həŋ tama ta vli! » kaʼa. Ka gunanatá Yawe ta ira taŋ. Kəʼa ka həŋ ná, ma huɗa luwa Samari həŋ.

²¹ Na gi nghaŋta mghama la Israʼila ta həŋ, kaʼa nda Ilisa mantsa: « Da ɗa, ka pslata yu ta həŋ ra? » kaʼa.

²² Ka Ilisa zlghaftá wa ni mantsa: « Pslata a ka ta həŋ wa. Ta psla psla ka tazlay ta gwal ta hlafta ka ka vuʼa nda kafaya gha nda ya nda lgheɗa gha ra? Vlaŋ vla ta skwa zay nda imi ta həŋ, ka za həŋ, ka sa həŋ, ka vra həŋ da rvera taŋ, » kaʼa.

²³ Ka maganatá mghama la Israʼila ta skwa zay dagala ta həŋ, ka zutá həŋ, ka sutá həŋ. Tahula tsa, ka vriŋtá tsi ta həŋ, ka laghu həŋ da daŋahəga taŋ. Daga baɗ tsa, vrəgladagha a tsa gwal ta zləɗu la Aram ya ta haɗika la Israʼila wa.

Maya ma Samari

²⁴ Tahula tsa, ka tskanatá Benʼhadat, mghama la Aram ta inda sludziha ni, ka laf tsi ŋafta hesl nda vulu ta luwa Samari.

²⁵ Ka nzəɗavata tsa ŋatá ni hesl ya, ka slata maya katakata ma Samari, ha ka skway lu ta ghəŋa kəɗih ka sulay tghas mbsak, dgata rita kiluʼa ghuva ghərbuʼ fwaɗ ka skwapta lu ka sulay hutaf.

²⁶ Ma sana fitik ta wawavatá mghama la Israʼila ta wa matsak, ka wahu sana marakw ta wahu da tsi, kaʼa mantsa: « Kata ta iʼi rveri, mghama ɗa! » kaʼa.

²⁷ Kaʼa mantsa: « Ka kataf a Yawe ta kagha ya wu ní, ndaw dzaʼa katafta yu ta kagha na? Nda skwi ta wa blikwi re, ari nda skwi ma tsuʼaŋa ɗitsa yakwa inabi a na? » kaʼa.

²⁸ Ka mgham nda tsi guli mantsa: « Nahgani ya ta slaghaghata na? » kaʼa. Kaʼa zlghaftá wi mantsa: « Nana marakw na ta mnihata kazlay na: “Vla vla ta zwaŋa gha! Ka zuta u gita, mahtsim ya, ŋa zay u ta ŋa ɗa,” kəʼa.

²⁹ Ka dutá ŋni ta zwaŋa ɗa, ka zutá ŋni. Ga mahtsima ni, ka yu nda tsi mantsa: “Vla vla ta zwaŋa gha ka zuta u kay,” ka yu, ama ka ɗifanatá tsi ta ŋa ni, » kaʼa.

³⁰ Snanata mgham ta gwaɗa tsa marakw ya, ka kuhiŋtá tsi ta lguta ni. Ma tsa mbaɗa ni ta wa matsak ya, ka nghaŋtá mnduha ta buhu ta klə tsi ma huɗa lgut ta vgha ni.

³¹ Ka mgham mantsa: « Ka tsiɗagha tsa Lazglafta ta guma katakata, ka tsaghu a yu ta ghəŋa Ilisa, zwaŋa Safat gita! » kaʼa.

³² Ta nzaku Ilisa mintgha ni, kawadaga la galata mndu nda tsi. Ka ghunaftá mgham ta ya turtuk ma kwalvaha ni. Ama makəɗ tsa mndu ghunaf lu ya ka ɓhadaghata, ka Ilisa nda la galata mndu mantsa: « Nda ngha kuni ra? Waʼa ghunafta tsa mnda dzatá mndu ya ta mndu ŋa tsaghuta ghəŋa ɗa. Snawa sna! Ka sagha sa tsa mnda ghunay ya, ka hunusta kuni ta wa tgha, ka tiŋwidiŋta kuni dzibil. Sna a kuni ta ghudzaga səla daŋahəga ni nda hula ni wu ra? » kaʼa.

³³ Tata gwaɗa Ilisa nda həŋ ta lagha tsa mnda ghunay ya slanaghata, kaʼa mantsa: « Yawe ta klaɗiktá na zləmnda na. Nya dzaʼa kəl yu ka fəglaftá ghəŋ ta Yawe na? » kaʼa.