2Mgh 5 - Hdi

Mbafta Naghamaŋ ma ɗaŋwa ni

¹ Mala gwal vula mghama la Aram ná, Naghamaŋ ya. Ta rfay ta rfu ta ghəŋa sgit, nda glaku katakata ya vlaŋ mghama ni, kabga nda ma tsatsi zanata Yawe ta ghwa ta la Aram. Nziya nza tsi, tsa mndu nda mbra, viɗviɗ ya ná, nda ghwaɗaka lku tida.

² Tsaw ma fitika lagha la Aram zləɗatá haɗika la Israʼila ná, ksagha ksa həŋ ta sana zwaŋa makwa, ka fata ka kurɗa markwa Naghamaŋ.

³ Ka tsa makwa ya nda matarmba ni mantsa: « Aya! Ka má dzaʼa laviŋ lava daŋahəga ɗa ta lagha da anabi ma Samari katsi ná, má dzaʼa mbanaf mba ta ya ghwaɗaka lku tida ya, » kaʼa.

⁴ Ka lagha Naghamaŋ da mnanatá rvera ni kazlay: « Wya wya wya, ká makwa haɗika la Israʼila mnata, » kaʼa.

⁵ Ka mghama la Aram mantsa: « La! Dzaʼa vlagha vla yu ta ɗelewer ŋa mghama la Israʼila, » kaʼa. Ka laghu Naghamaŋ, nda klatá kiluʼa tsedi hkən dərmək (300), nda dasu ka kiluʼ ndəfáŋ mbsak, nda lgutha ghwaŋ kavghakavgha ŋa rka.

⁶ Ka klədanaghatá tsi ta tsa ɗelewer ya ta mghama la Israʼila. Ka lu vindamta ma tsa ɗelewer ya na: « Ghunaf ghuna yu ta Naghamaŋ, kwalva ɗa nda na ɗelewer na, ŋa mbanafta gha ta ghwaɗaka lku tida, » ka lu.

⁷ Tahula dzaŋafta mghama la Israʼila ta tsa ɗelewer ya, ka kuhiŋtá tsi ta lguta ni, kaʼa mantsa: « Lazglafta yu, ŋa laviŋta ɗa ta dzatá mndu ka mbanaftá mndu a tsi ra? Kəl tsi ka mnay ŋa ɗa kazlay ka mbanafta yu ta mndu nda ksa da ghwaɗaka lku kəʼa ra? Nghawa ká na mndu na ta zba ghazeŋzeŋ nda iʼi ɓa! » kaʼa.

⁸ Snaŋta Ilisa, mnda Lazglafta kazlay kuhiŋ kuhwa mghama la Israʼila ta lguta ni kəʼa, ka tsəghanaftá tsi ta lwi ta mgham, kaʼa mantsa: « Kabgawu kəl ka ka kuhiŋtá lguta gha na? Ghunagagha ghuna ta tsa mndu ya da iʼi, dzaʼa nda sna kazlay mamu anabi ma Israʼila kəʼa, » kaʼa.

⁹ Ka lagha Naghamaŋ nda plisha ni, nda mwata plisa ni, ka sladatá tsi ta wi tgha ga Ilisa.

¹⁰ Ka ghunagaptá Ilisa ta mndu da tsi, kaʼa nda tsi mantsa: « La da mbazaghutá mbaza ndəfáŋ səla ma Yardeŋ, ŋa nzata vgha gha kləwəɗ, ŋa nzakwa gha nda tsaɗa, » kaʼa.

¹¹ Ka ɓasaftá Naghamaŋ ta ŋuɗuf ka gi sliʼaftá tsi ka mbaɗa, kaʼa mantsa: « Ka yu sizlay na: “Dzaʼa sab sa tsa anabi ya da iʼi, ŋa hgaŋta ni ta hga Yawe, Lazglafta ni, ŋa zukwaŋta ni ta dzvu ta tsa vla ɗaŋwa ɗa ya, ka mbanafta ni ta na ghwaɗaka lku na,” ka yu sizlay.

¹² Malaghu a zala Avana nda Parpar ma Damas, ka inda ghwaha la Israʼila ra? Má laviŋ a yu ta mbazaghutá mbaza mida ka nzakwa ɗa nda tsaɗa ra? » kaʼa. Ka mbəɗavatá ka sliʼa nda ɓasata ŋuɗuf.

¹³ Ama ka gavadaghatá kwalvaha ni ta vata ni, ka həŋ nda tsi mantsa: « Ar da! Ka má skwi nda bla ɗawaŋ anabi da kagha ní, haɗ ka má dzaʼa magata wu ra? Ɓalavakata tsaya rki: “Mbazaghu mbaza, dzaʼa nza nza ka nda tsaɗa,” » ka həŋ.

¹⁴ Mantsa tama, ka laha Naghamaŋ da Yardeŋ, ka lami tsi dida ndəfáŋ səla taɓta gwaɗa mnda Lazglafta. Ka nzatá vgha ni manda ŋa zwaŋ, ka nzatá tsi nda tsaɗa.

¹⁵ Ka vradaghatá Naghamaŋ da mnda Lazglafta nda inda gwal mista ni tani. Lagha ni, ka maraŋtá tsi ta vgha ni ta kəma ni, kaʼa mantsa: « Ndanana, nda sna yu kazlay haɗ Lazglafta ta inda ghəŋa haɗik wu, ba ma Israʼila kəʼa. Ndanana, kdəkkdək tsuʼaf tsuʼa ta mbəhu si da kwalva gha, » kaʼa.

¹⁶ Ka Ilisa zlghanaftá wi mantsa: « Ta waɗagha waɗa yu nda hga Yawe nda hafu mida, ya ta maganata yu ta slna, haɗ sana skwi ta tsuʼafta yu wu, » kaʼa. Ka mbərhu Naghamaŋ kabga ŋa tsuʼafta ni, ama ka kwalaghutá tsi.

¹⁷ Ka Naghamaŋ mantsa: « Ka si kwalaghu kwala ka, vla vla ta tvi ka tsəɗaɗifta lu ta haɗika na vli na, ŋa iʼi kwalva gha. Ka tsəɗaɗifta lu prək ka hlay plisa ghwandala his, kabga iʼi kwalva gha ná, haɗ yu dzaʼa vləgəltá pla ghəŋ ŋa dray tsuh tsuh, dər sanlaha ma pla ghəŋ ŋa sanlaha ma lazglaftaha wu, ba ŋa Yawe kweŋkweŋ.

¹⁸ Nziya nza tsi, ka plana pla Yawe ta dmakwa skwi turtuk ta kwalva gha: Ma lam ta lam rvera ɗa da həga Rimuŋ skwa wuyay ŋa tsəlɓu, ta tsəlɓay iʼi guli, kabga ta ŋiha ŋa drəsl ta dzvu ka gwitsidihata. Ka pliha pla Yawe kahwathwata ta dmakwa iʼi kwalva gha, ta ghəŋa tsa tsəlɓu ta tsəlɓu yu ma həga Rimuŋ skwa wuyay ni ya! » kaʼa.

¹⁹ Ka Ilisa nda tsi mantsa: « La nda vghata zɗaku, » kaʼa. Ka laghu Naghamaŋ. Tahula zlaŋta Naghamaŋ ta Ilisa ka zaptá mtak daʼu,

Haraʼu ta ira Gehazi

²⁰ ka Gehazi, duhwala Ilisa, mnda Lazglafta ma ghəŋa ni mantsa: « Wana zliŋta daŋahəga ɗa ta Naghamaŋ, tsa mnda la Aram mantsa ya, ka kwalaghuta tsuʼaftá tsa skwi hlak tsi ya. Ta waɗa waɗa yu nda hga Yawe nda hafu mida, dzaʼa hwayiŋtá yu, ka tsuʼata yu ta tsa skwi da tsi ya, » kaʼa.

²¹ Ka hwayiŋtá Gehazi ta Naghamaŋ. Nghay Naghamaŋ ta hwayadaghata ni nda hula ni, ka gi saha tsi misimmisim ta mwata plisa ni ŋa guyaku nda tsi, kaʼa mantsa: « Ləŋləŋ suʼu? » kaʼa.

²² Kaʼa zlghaftá wi mantsa: « Ləŋləŋ vli! Daŋahəga ɗa ya ta ghunaɗikta mnaghata kazlay na: “Nda va nana sagha sana duhwalha his ta kwakwar ta ghwá Ifrayim, mataba guyata ghəŋa anabiha da ini. Wya dzvu, vliha vla ŋa taŋ ta kiluʼa tsedi hkən mbsak nda lguta rka his kəʼa,” » kaʼa.

²³ Ka Naghamaŋ mantsa: « Kla ta kiluʼa tsedi mkuʼ mbsak, » kaʼa. Ka mbərhaftá Naghamaŋ ka pghanamtá kiluʼa tsedi mkuʼ mbsak ma zlibiha his, vlaŋha ta lguta rka his, ka hlanatá duhwalha ni ŋa Gehazi ta kəma.

²⁴ Ɓhadaghata taŋ ta sana kuɗuŋur, ka zlghaghutá Gehazi ta tsa mbəhu ya ma dzva taŋ, ka pghata ga taŋ, ka vriŋtá tsi ta tsa mnduha ya, ka laghu həŋ.

²⁵ Ka vradaghatá Gehazi da daŋahəga ni. Ka Ilisa ɗawaŋta da tsi mantsa: « Si ga ka ní, a Gehazi? » kaʼa. Kaʼa zlghaftá wi mantsa: « Haɗ sana vli lavaghu kwalva gha wu, » kaʼa.

²⁶ Ama ka Ilisa nda tsi mantsa: « Ta grə ka ná, kawadaga a sulkuma ɗa guli nda kagha ma zlanata tsa mndu ya ta mwata plisa ni ka lagha da guyaku nda kagha ya wu rki na? Fitika zlgha tsedi ŋa skwa lgut, nda zaytuŋ, nda fwa inabi, nda rina fisik, nda slaha, nda kwalvaha nda ya nda kurɗuha na ra?

²⁷ Dzaʼa ndiʼaf ndiʼa tsa ghwaɗaka lku si ta Naghamaŋ ya ta kagha, nda zivira gha tani ŋa ɗekɗek, » kaʼa. Ka zlanatá Gehazi ta Ilisa, nda ksata ni da tsa ghwaɗaka lku ya, ka ŋusliŋ manda papla.