2Mgh 4 - Hdi

Kataŋta Ilisa ta sana markwa wadgu

¹ Ma sana fitik, ka lagha wadga sana mndu si mataba guyatá ghəŋa anabiha da wahu da Ilisa, kaʼa mantsa: « Mtu mta zəʼala ini, si kwalva gha, nda sna ka kazlay na: Si ta zləŋay ta Yawe kəʼa. Tsaw wana sagha mndu si ta ɓlanaftá nzawa da hla zwana ɗa his, ŋa nzakwa taŋ ka vuʼa ni, » kaʼa.

² Ka Ilisa nda tsi mantsa: « Nahgani dzaʼa laviŋta yu ta magaghata na? Mniha mna, nahgani skwi ga ghuni na? » kaʼa. Ka tsa marakw ya mantsa: « Haɗ sana skwi ɗekɗek ga kurɗa gha ta ghəŋa hwaraka rɗi turtuk wu, » kaʼa.

³ Kaʼa nda tsi mantsa: « La da sləvdaha gha, ka ɗaɗawafta ka ta hwarakha ka kufandaŋ ka kufandaŋ, ka tskafta ka ŋulum.

⁴ Lagha gha dzagha ya, ka lama ka da həga, kagha nda zwana gha, ka hafta kuni ta wa tgha. Ka tatamta ka ta tsa rɗi ya da inda tsa hwarakha ya. Inda ya nda ndəgha ya, ka faghuta ka ta slərpu, » kaʼa.

⁵ Ka sliʼaftá tsa marakw ya ka laghwi. Ka lam həŋ da həga tsatsi nda zwana ni, ka haftá həŋ ta wa tgha. Ka vlə tsa zwana ni ya ta hwarakha, mbaɗa tsatsi ka ndaghay.

⁶ Ndaghuta tsa hwarakha ya, kaʼa nda sani ma zwaŋa ni mantsa: « Yaha ta sana hwarak, » kaʼa. Ama ka tsa zwaŋ ya nda tsi mantsa: « Ta haɗ wu, » kaʼa. Ka gi tsaghutá tsa rɗi ya.

⁷ Ka lagha tsi rusanaftá mnda Lazglafta. Ka tsa mndu ya nda tsi mantsa: « La da dzawaptá tsa rɗi ya, ka plata ka ta tsa dməŋ ta kagha ya. Pɗakwa ni ya, ŋa zay ghuni nda zwana gha, » kaʼa.

Kataŋta Ilisa ta makwa la Sunem

⁸ Ma sana fitik, ka lab Ilisa nda ma Sunem. Hada, mamu sana marakw ka gadghəl. Ka mbrəh tsa marakw ya ka ŋɗaŋɗa ŋa dzaʼa da za skwa zay ga taŋ. Daga baɗ tsaya, dər yawu laba tsi nda ta tsa, ta sladava slada ka zutá skwa zay ga taŋ.

⁹ Ka tsa marakw ya nda zəʼala taŋ mantsa: « Nda sna yu kazlay na, tsa mndu ta gɗata ta sagha da amu ya ná, mndu nda ghuɓa ya, mnda Lazglafta kəʼa.

¹⁰ Wya dzvu, baf u ba ta zwaŋa dzuguvi nda ghəŋa ni ta ghəŋa dədəmatá ghəŋa həga u, ka pghanamta u ta ghəzləŋ, nda tabəl, nda dughuruk, nda pitirla, kada laviŋta tsi ta mbiʼaptá vgha ta sagha tsi da amu, » kaʼa.

¹¹ Ma sana fitik, ka ləglagha Ilisa, ka lam tsi mbiʼaptá vgha ni ma tsa dzuguvi ya, ka han tsi hada.

¹² Kaʼa nda duhwala ni, Gehazi mantsa: « Hgaŋ hga ta tsa makwa la Sunem ya! » kaʼa. Ka hgaŋtá tsi, ka lagha tsa marakw ya da kəma ni.

¹³ Ka Ilisa nda Gehazi mantsa: « Mnana mna kazlay, dza dza ka ta vgha katakata ka ŋa ŋni! Nu dzaʼa ŋni magaghata? Ka gwaɗganata lu ta mgham, ka mala gwal vulu a tsi rki? » kaʼa. Ka tsa marakw ya zlghanaftá wi mantsa: « Ta nzay yu ta nzakw ləŋləŋ mataba mnduha ɗa, » kaʼa.

¹⁴ Ka Ilisa ɗawaŋta da kwalva ni mantsa: « Nahgani dzaʼa u magata ŋa na marakw na? » kaʼa. Ka Gehazi mantsa: « Andaw! Wana haɗ zwaŋ da tsi wu, nda hala zəʼala taŋ guli, » kaʼa.

¹⁵ Ka Ilisa mantsa: « Hgaŋ hga! » kaʼa. Ka hgaŋtá tsi. Ka lagha tsa marakw ya sladata ta wa tgha.

¹⁶ Ka Ilisa nda tsi mantsa: « Ta na luwa na kɗaghalam, dzaʼa mamu zwaŋ ta ghuva gha, » kaʼa. Ka tsa marakw ya mantsa: « Tsa a tsa rvera ɗa mnda Lazglafta wu, ma nanaf ka ta kurɗa gha! » kaʼa.

¹⁷ Ka zlghaftá tsa marakw ya ta huɗi, gə kɗaghalama ni, ka yatá tsi ta zwaŋa zgun ta va tsa luwa ya manda ya si mnana Ilisa.

¹⁸ Ka glavatá tsa zwaŋ ya. Ma sana fitik, ka laghu tsa zwaŋ ya slanaghatá da ni da gwal ta tska skwi ta vwah.

¹⁹ Gi ka tsa zwaŋ ya nda da ni mantsa: « Aya ghəŋa ɗa! Aya ghəŋa ɗa! » kaʼa. Ka da ni nda sana kwalva ni mantsa: « Kla da ma ni, » kaʼa.

²⁰ Ka klaghatá tsa kwalva ya vlaŋtá ma ni. Ka nzamtá tsa zwaŋ ya ma ghuva ma ni ha ka lafa fitik da ghəŋ, ka mtutá tsi.

²¹ Ka ŋladaftá tsa marakw ya, ka hananata ta ghəzləŋa mnda Lazglafta, ka saghwa ni, ka haftá wa tgha.

²² Ka hgaŋtá tsi ta zəʼala taŋ, kaʼa mantsa: « Wya dzvu, ghunaɗik ghuna ta duhwal turtuk mataba kwalvaha nda kəɗih turtuk! Ta kumay yu ta dzaʼa misimmisim slanaghata mnda Lazglafta, ŋa gi vrakta ɗa, » kaʼa.

²³ Kaʼa nda si mantsa: « Kabgawu kəl ka ka kuma dzaʼa da taŋ gita na? Ya skala dər ngha tili a wu, fitika dər Sabat a tsi wu na, » kaʼa. Ka tsa marakw ya mantsa: « Ləŋləŋ haɗ sana skwi wu, » kaʼa.

²⁴ Ka habaftá tsa marakw ya ta vla nzaku ta tsa kəɗih ya, kaʼa nda tsa duhwal, ka kwalva ni ya mantsa: « Ghəzla ta kəɗih, mbaɗa, yaha ka da sladihata ka mna gha a yu, » kaʼa.

²⁵ Ka laghu tsi tama da slanaghatá mnda Lazglafta ta ghwá Karmel. Nghadapta mnda Lazglafta ta diʼiŋ tsa marakw ya, kaʼa nda duhwala ni, Gehazi mantsa: « Waʼa tsa makwa la Sunem ya kay!

²⁶ Hwaya da guyay, ka ɗawaŋta ka da tsi: “Ɗughwana na mbaɗa gha na ra? Ta ɗughwana i zəʼala ghuni ra? Ta ɗughwana zwaŋa gha ra?” ka ka dazlay » kaʼa. Ka tsa marakw ya mantsa: « Ləŋləŋ, » kaʼa.

²⁷ Ɓhadaghata ni da mnda Lazglafta ta ghwá, ka ŋanatá tsi ta səla. Ka lagha Gehazi má ŋa tiŋwaghuta, ama ka mnda Lazglafta mantsa: « Zlana zla, kabga nda gurɗa ŋuɗufa ni. Tsaw si ɗifiha ɗifa Yawe, mniɗiŋ a wu, » kaʼa.

²⁸ Ka tsa marakw ya tama mantsa: « Si ɗawaŋ ɗawa yu ta zwaŋ da rvera ɗa ra? “Ma nan ka ta iʼi a,” ka yu si nda kagha kay wu ra? » kaʼa.

²⁹ Ka Ilisa nda Gehazi mantsa: « Hba ta vgha, kla ta dafa ɗa ma dzvu ka dzaʼa ka. Ka guya guya ka nda mndu, yaha ka da ga zgu ŋa ni. Ka gaghagha ga mndu ta zgu, yaha ka da zlghanaftá wa ni. Ka fafta ka ta dafa ɗa ta kuma tsa zwaŋ ya, » kaʼa.

³⁰ Ama ka ma ni ma tsa zwaŋ ya mantsa: « Ta waɗa waɗa yu nda hga Yawe nda hafu mida, nda ya nda hafa vərɗa kagha, haɗ yu ta sliʼafta ka la a kagha wu, » kaʼa. Ka sliʼaftá Ilisa ka laghwi mista ni.

³¹ Si tiŋlaghu tiŋla Gehazi ta hahəŋ, ka faftá tsi ta tsa dafa ya ta kuma tsa zwaŋ ya, ama sew haɗ skwi ta magavata wu, haɗ dər kwesleɗ kwesleɗ, dər sləʼef sləʼef wa. Ka vradaptá tsi da guyaku nda Ilisa, kaʼa mantsa: « Vram a tsa zwaŋ ya wu, » kaʼa.

³² Ɓhadaghata Ilisa da tsa həga ya, kəʼa kəʼa ná, nda mta zwaŋ, zərnaʼa ta ghəzləŋa ni.

³³ Ka lam Ilisa ka haftá wa tgha mida hahəŋ nda tsa zwaŋ ya, ka mag tsi ta duʼa da Yawe.

³⁴ Ka laf tsi ta ghəzləŋ, ka hananaghatá tsa zwaŋ ya. Ka fuŋtá tsi ta wubisima ni ta wubisima tsa zwaŋ ya, iriha ni ta iriha tsa zwaŋ ya, dzvuha ni ta dzvuha tsa zwaŋ ya, ka hananaghata. Ka lam hurfuk da vgha tsa zwaŋ ya.

³⁵ Ka sliʼaftá Ilisa ka wawaku ma tsa dzuguvi ya. Ka ləglaf tsi hanəglanaghatá tsa zwaŋ ya. Ka wudisatá tsa zwaŋ ya ndəfáŋ səla kada gunatá iri.

³⁶ Ka hgaŋtá Ilisa ta Gehazi, kaʼa nda tsi mantsa: « Hgagam hga ta tsa makwa la Sunem ya, » kaʼa. Ka hgadamtá Gehazi, ka lam tsi da Ilisa. « Kla ta zwaŋa gha! » ka Ilisa nda tsi.

³⁷ Ka lagha tsa marakw ya zləmbata ta haɗik zlumbruh ka tsəlɓata ma ghuva Ilisa. Tahula tsa, ka tsukwaftá tsi ta zwaŋa ni, ka saghwi ma tsa dzuguvi ya.

Kliŋta Ilisa ta gruma ma skwa zay

³⁸ Ka vraghatá Ilisa da Gilgal. Tsaw mamu maya ta tsa haɗik ya. Ma sana fitik, ta nzaku duhwalha ni la anabi ta kəma ni, kaʼa nda kwalva ni mantsa: « Diŋaf diŋa ta siga dagala ta vu, ka danata ka ta skwa zay ta guyata ghəŋa anabiha! » kaʼa.

³⁹ Ka sliʼaftá sani turtuk mataba anabiha ka laghwi da ŋsa masuʼata ma vwah. Ka slanaghatá tsi ta ŋurzla mtak, ka ɗagatá tsi ta yakwa ni tip. Lagha ni dzagha, ka ɗatsadatá tsi da tsa siga ya, ama haɗ mndu nda sna ka nahgani tsi wa.

⁴⁰ Ka vlaŋtá lu ta tsa mnduha ya ŋa zay. Ama na tapanata taŋ ta tsa skwa zay ya, ka wahu həŋ ta wahu: « Ya gruma na skwa zay na, a mnda Lazglafta! » ka həŋ. Laviŋ a həŋ ta zay wa.

⁴¹ Ka Ilisa mantsa: « Tsəɗagaghawa tsəɗa ta hpu, » kaʼa. Ka pghadatá tsi da tsa siga ya, kaʼa mantsa: « Vla ŋa na mnduha na ka za həŋ, » kaʼa. Haɗ sana ghwaɗaka skwi ta ma siga wa.

Zunusta Ilisa ta skwa zay ta mnduha dərmək

⁴² Ma va tsa fitik ya, ka sagha sana mndu daga ma Baghal Salisa. Ka klədanaghatá tsi ta mnda Lazglafta ta burada urz hisambsak da lu nda hupa lfiɗa nimaya, nda ya nda buhwa hənzila skwi tska tsi ta vwah. Ka Ilisa mantsa: « Daganaf daga ta na mnduha na ka za həŋ, » kaʼa.

⁴³ Ka slufa ni mantsa: « Kinawu ka yu dzaʼa daganaftá mnduha dərmək ta ghalaka nana na? » kaʼa. Ama ka Ilisa vrəgliŋtá mnay mantsa: « Daganaf daga ta na mnduha na, ka za həŋ, kabga wya ka Yawe mnata: “Dzaʼa zay lu ŋa haslata ni,” » kaʼa.

⁴⁴ Ka daganaftá tsa slufa ya ta tsa skwa zay ya ta həŋ demdem, ka zutá həŋ, ka haslatá tsi taɓta gwaɗa Yawe ta mnata.