2Mgh 3 - Hdi

Gá mghama Yuram ma Israʼila

¹ Ka lam Yuram, zwaŋa Ahav da ga mgham ta ghəŋa la Israʼila ma Samari, ta maghwaŋpəɗ tghasa vakwa Yəhusafat ta ga mgham ta ghəŋa la Yuda. Ghwaŋpəɗ his vakwa ni ta ga mgham.

² Ka mag tsi ta ghwaɗaka skwi ta wa ira Yawe, ama nza a manda ŋa i da ni nda ma ni wa. Ka zlaɗiŋtá tsi ta dzagwatá palaha ŋa Baghal, si dzagwana da ni.

³ Kulam nda tsa, ka ndiʼaftá tsi ta vgha ta dmakuha Yaruvgham, zwaŋa Nəvat ta hlamtá la Israʼila da ga dmaku ya. Mbəɗana a ta hul wa.

Sliʼafta mghamha hkən huts da vulu nda la Muwav

⁴ Mesa, mghama la Muwav ná, mamu rini ga taŋ. Si ta play ta dzumna ŋa mghama la Israʼila nda slaɓalakwa maŋazakha, dəmbuʼ dərmək (100.000), nda ya nda swida maŋazakha dəmbuʼ dərmək (100.000).

⁵ Ma mtatá Ahav, ka ganavatá mghama Muwav ta sidi ta mghama la Israʼila.

⁶ Gi ka sab mgham Yuram ma Samari, ka tskanatá sludziha la Israʼila demdem.

⁷ Ka sliʼaftá tsi, tsəghanafha ta lwi ta Yəhusafat, mghama la Yuda, kaʼa mantsa: « Ya gaɗiva ga mghama la Muwav ta sidi. Ta kumay ka ta dzaʼa kawadaga nda iʼi da vulu nda la Muwav ra? » kaʼa. Ka Yəhusafat zlghanaftá wi mantsa: « Ta dzaʼa laf la yu mista gha. Nda kagha nda iʼi, nda mnduha gha nda ŋa ɗa, nda plisha gha nda ŋa ɗa ná, haɗta a dgəvgha ni ɗekɗek wu, » kaʼa.

⁸ Kaʼa guli mantsa: « Nda ta wati tvi dzaʼa ŋla mu na? » kaʼa. Ka Yəhuram mantsa: « Nda ta mtaka Idum, » kaʼa.

⁹ Ka sliʼaftá mghama la Israʼila, nda mghama la Yuda, nda ŋa la Idum ka laghwi. Tahula zata taŋ ta fitik ndəfáŋ ta mbaɗa, ka pɗatá həŋ ta imi ŋa sludziha, nda ya ŋa mbsaka rini ta dzaʼa mista taŋ.

¹⁰ Ka mghama la Israʼila mantsa: « Mndəra wati ma zləmnda na! Hagaf haga Yawe ta na amu mghamha hkən na ŋa vlata ma dzva la Muwav, » kaʼa.

¹¹ Ama ka Yəhusafat mantsa: « Haɗ sana anaba Yawe ɗekɗek hadna, ka dzaʼa mu da ɗawaŋtá ndana Yawe da tsi ra? » kaʼa. Ka sani ma kwalvaha mghama la Israʼila mantsa: « Mamu Ilisa, zwaŋa Safat hadna, mndu si ta sə Iliya ta imi tida, » kaʼa.

¹² Ka Yəhusafat mantsa: « Kawadaga gwaɗa Yawe nda tsi, » kaʼa. Ka sliʼadatá i mghama la Israʼila, nda Yəhusafat, nda mghama la Idum da Ilisa.

¹³ Ka Ilisa nda mghama la Israʼila mantsa: « Nahgani ya mataba ɗa nda kagha na? La slanaghatá anabiha da gha, nda anabiha ma gha, » kaʼa. Ama ka mghama la Israʼila nda tsi mantsa: « Mantsa a wu, Yawe ta hagaftá na aŋni mghamha hkən na ŋa vlata ma dzva la Muwav, » kaʼa.

¹⁴ Ka Ilisa mantsa: « Ta waɗa waɗa yu nda hga Yawe nda hafu mida, mghama gwal vulu ya ta maganata yu ta slna, ka má haɗ yu ta vlaŋtá glaku ta Yəhusafat, mghama la Yuda wu katsi, má haɗ ghuya ɗa nda kagha wu, haɗ yu má dzaʼa walaŋta nghapta ka kagha wa.

¹⁵ Ndanana, klagaɗighawa kla ta mnda dza htimbil, » kaʼa. Ta dzə tsa mndu ya ta htimbil ya, ka saha mbrakwa Yawe ta ghəŋa Ilisa,

¹⁶ kaʼa mantsa: « Wya ka Yawe mnata: “Lalapwa lala ta ghurumha ma tsa ghwalata lika ya,

¹⁷ kabga wya ka Yawe mnata: Nghaŋta a kuni ta falak wu, nghaŋta a kuni ta nzakwa imi wu, ama dzaʼa ndəghaf ndəgha na lika na da imi, ŋa say ghuni, kaghuni, nda braha slaha ghuni, nda rina fisika ghuni,” kaʼa.

¹⁸ Ama slaghu a tsaya ta wa ira Yawe wa. Dzaʼa vlaghuna vla Yawe ta la Muwav ma dzva ghuni!

¹⁹ Dzaʼa badzana badza kuni ta inda luwaha taŋ ŋaŋam həŋ ma matsaka huzlu, nda inda luwaha taŋ ɗina ɗina. Dzaʼa dzaɓiŋ dzaɓa kuni ta inda fuha taŋ zɗa zɗa. Dzaʼa naʼuwaf naʼuwa kuni ta inda dzuɓayha taŋ, dzaʼa badziŋ badza kuni ta inda vwahha taŋ ka gənək nda ma wamtá dzir dida, » kaʼa nda həŋ.

²⁰ Ga sərɗək ta fitika vla skwa pla ghəŋ, gi ka sagha imi nda təv la Idum, ka ndaghanaftá inda vli.

²¹ Ma tsa fitik ya, ka snaŋtá inda la Muwav kazlay ta saf sa tsa mghamha hkən ya da vulu nda həŋ kəʼa. Ka hagaftá həŋ ta inda gwal prək ka kla huzla vulu, nduk nda gwal malap ima taŋ tani, ka ŋaftá həŋ ta mukuma.

²² Ta sliʼavatá həŋ wrək sərɗək, ta wuɗaku fitik ta imi, ka nghaŋtá la Muwav ta kəma taŋ ta imi ka dva manda us.

²³ Ka həŋ mantsa: « Ya us ya! Lmavagha lma mghamha ta lmu nda kafay ka psluvtá həŋ ta vgha taŋ. Ndanana tama la Muwav, mbaɗma hla huzla zləɗu! » ka həŋ.

²⁴ Gavadaghata taŋ təv ghuɓa la Israʼila, ka sliʼaftá la Israʼila liŋtá la Muwav nda vulu, ka hwayaftá həŋ ta kəma taŋ. Ka zbiŋtá la Israʼila ta həŋ ta haɗika la Muwav, ka pslatá həŋ katakata ta tsa mnduha ya.

²⁵ Ka dzaɓiŋtá həŋ ta luwaha. Dər wa ma həŋ ta hla palaha da inda vwahha ka gənək, ha ka ndaghanafta. Ka naʼuwaftá həŋ ta inda dzuɓayha, ka dzaɓiŋtá həŋ ta inda fuha zɗa zɗa. Ta ghəŋa Kirʼheres nda palaha ni yeya ta pɗata, ama ka wanaftá sludziha nda tsivuʼ ta həŋ, ka pslatá həŋ.

²⁶ Nghay mghama la Muwav ta dzaʼa mbranaghata nda vulu, ka hlaftá tsi ta mnduha nda kafay nda kafay da həŋ ndəfáŋ dərmək (700) mista ni, má ŋa gunaptá tvi nda təv mghama la Idum ŋa ndapta, ama ka trapta tsi.

²⁷ Mantsa tama, ka klaftá tsi ta zumala ni, ya má dzaʼa nzakway ka mgham ma vla ni, ka vlatá tsi ka skwa pla ghəŋ ŋa dray tsuh tsuh ta matsaka luwa. Ka ŋwaruta ŋuɗuf la Israʼila katakata, ka zlanatá həŋ ta mghama la Muwav ka vraghuta ta haɗika taŋ.