2Mgh 24 - Hdi

¹ Ma fitika tsa gay Yəhuyakim ta mgham ya, ka laf Nevuhadnetsar, mghama Babila da liŋta guk nda vulu ta haɗika la Yuda. Ka zatá Yəhuyakim ta vaku hkən ta skwa htsiŋ da tsi, ama ka mbəɗəglavatá tsi ganavatá sidi.

² Ka ghwanadaghatá Yawe ta bakuha zləɗa la Kaldiya, nda ŋa la Aram, nda ŋa la Muwav, nda ŋa la Ghamuŋ dika Yəhuyakim ŋa zaɗanata haɗika la Yuda, taɓta gwaɗa ya mna Yawe nda ma wa kwalvaha ni la anabi.

³ Kahwathwata ná, Yawe ta mnaftá inda tsa skwiha ta maguta ya, ŋa diʼiŋiŋtá la Yuda nda tsi, dabga inda dmakuha ya ga Mənase,

⁴ nda ya dabga usa mnduha kul haɗ dmakwa taŋ pghiŋ tsi, ka ndəghanaftá Ursalima nda usa gwal kul haɗ dmakwa taŋ. Va a Yawe ta pliŋtá tsa dmaku ya wa.

⁵ Pɗakwa slnaha Yəhuyakim, nda inda skwiha ya hɗam tsi ná, vivindam vivinda lu ma ɗelewera vinda slnaha mghamha la Yuda.

⁶ Ka laghu Yəhuyakim da dzidzíha ni. Ka lam zwaŋa ni Yəhuyakiŋ da gá mgham ma vla ni.

⁷ Ka kwal mghama Masar ta səglapi ma haɗika ni, kabga hlaghu hla mghama Babila ta inda skwi ta nzakway ka ŋa ni, daga ta lika Masar ha ta zala Yufratis.

Gá mghama Yəhuyakiŋ ma Yuda

⁸ Ghwaŋpəɗ tghas ima Yəhuyakiŋ ta nzatá tsi ka mgham. Ka zatá tsi ta tili hkən ta gá mgham ma Ursalima. Nəhusta hga ma ni, makwa Ilnataŋ, mnda la Ursalima.

⁹ Ka mag tsi ta ghwaɗaka skwi ta wa ira Yawe, manda va ya mag da ni.

¹⁰ Ma tsa fitik ya, ka laf sludziha Nevuhadnetsar, mghama Babila dɗanaghatá Ursalima nda vulu, ka ŋamtá həŋ ta luwa.

¹¹ Ka lagha Nevuhadnetsar, mghama Babila, da tsa luwa ya ta fitika ŋamta sludziha ni.

¹² Ka sab Yəhuyakiŋ, mghama la Yuda vlaŋtá ghəŋa ni ta mghama Babila, kawadaga nda ma ni, nda kwalvaha ni, nda mnduha ka mali ka mali, nda mapslaha ni. Ka tsamtá mghama Babila ta həŋ ma gamak, ta matghasa vakwa ni ta ga mgham hlaghata tsi ta həŋ ka vuʼa.

¹³ Ka hlaghatá Nevuhadnetsar ta inda gadghəl ma dzuguva ɗifa skwa gadghəl ma həga Yawe, nda ya ma həga gá mgham. Ka dzaɓiŋtá tsi ta inda huzlaha ka dasu ma həga Yawe si magaf Salumuŋ, mghama la Israʼila ya. Magu maga tsaya taɓta gwaɗa manda ya mna Yawe.

¹⁴ Ka hlaghatá tsi nekwnekw ta la Ursalima: Inda gwal ka mali ka mali, nda inda gwal viɗviɗ ma vulu tani, nda gwal ka masəm tani, nda gwal ta sləru tani. Dəmbuʼ ghwaŋ (10.000) gwal hlagha lu. La ka pɗu ta tsa haɗik yeya ta pɗata.

¹⁵ Ka klaftá tsi ta mgham Yəhuyakiŋ ma Ursalima, ka klaghata da Babila, kawadaga nda ma ni, nda miʼa ni, nda mapslaha ni, nda gwal ka mali ka mali ta tsa haɗik ya,

¹⁶ nda inda gwal vulu dəmbuʼ ndəfáŋ (7.000), dəmbuʼ (1.000) gwal ka masəm nda gwal sləru. Inda taŋ ná, gwal ka mbirima vulu nda mbara nda mbara ta laviŋtá vulu hahəŋ. Ka hlaghatá mghama Babila ta həŋ da ga vuʼa ma Babila.

¹⁷ Ka famtá mghama Babila ka mgham ma vla Yəhuyakiŋ ta dasliʼiŋa ni Mataniya, ka mbəɗanaftá tsi ta hga ni ka Tsidkiya.

Gá mghama Tsidkiya ma Yuda

¹⁸ Hisambsak ndeŋ mida ima Tsidkiya ta nzatá tsi ka mgham. Ka zatá tsi ta vaku ghwaŋpəɗ ndeŋ ta gá mgham ma Ursalima. Hamutal hga ma ni, makwa Yirməya, mnda la Livna.

¹⁹ Ka mag tsi ta ghwaɗaka skwi ta wa ira Yawe, manda va ya mag Yəhuyakim.

²⁰ Maga maga manda tsaya dabga gufatá ŋuɗufa Yawe ta ghəŋa la Ursalima nda la Yuda. Ɓasaf ɓasa ta ŋuɗuf katakata ha ka pghiŋtá tsi ta həŋ diʼiŋ nda tsi. Ka ganavatá Tsidkiya ta sidi ta mghama Babila.