2Mgh 23 - Hdi

Vranafta Yusiya ta dzraftá wi nda Lazglafta

¹ Ka ghunaftá mgham Yusiya ta gwal ghunay ŋa hagadaghata da tsi ta inda la galata mnduha la Yuda nda ŋa la Ursalima.

² Ka ŋladaftá tsi da həga Yawe kawadaga nda inda la Yuda, nda inda la Ursalima, nda gwal dra skwi ŋa Lazglafta, nda la anabi, nda inda mnduha, sliʼafta ni ta zwani ha ta galata mnduha. Ka dzaŋaftá mgham ta wa sləməŋa inda taŋ ta inda gwaɗa ma deftera dzratá wi slanagha lu ma həga Yawe.

³ Tata sladu mgham ta vata guguɗi, ka dzraftá tsi ta wi ta kəma Yawe. Ka fatá tsi ta ghəŋa ni ŋa dzaʼa mista Yawe nda hya hya ŋuɗufa ni, nda ya nda kɗavakta hafa ni, ŋa ŋanatá zlahuha ni, nda tva skwiha ni ta raku ka magay, nda ma maga slna nda gwaɗaha tsa dzratá wi vindam lu ma tsa defteri ya. Ka pghatá inda mnduha ta ghəŋa taŋ ŋa tsa dzratá wi ya.

Mbəɗanaftá nzakw da la Yuda

⁴ Ka mnanaftá mgham Yusiya ta Hilkiya, mali ta ghəŋa gwal dra skwi ŋa Lazglafta, nda gwal dra skwi ŋa Lazglafta ka sagəŋ mista ni, nda gwal ta ngha wi tgha tva lami da həga Yawe, ŋa hligiŋta taŋ ta inda huzla maganaf lu ta Baghal, nda ya ŋa skwa wuyay Asera, nda ya ŋa inda skwiha ta luwa. Ka driŋtá tsi ta hula Ursalima ma vwahha ta vata vli ma lika Kidruŋ, ka faɗaftá tsi ta hutiɗifa ni ka hlaghata da Betel.

⁵ Ka hlanatá tsi ta gwal dra skwi ŋa sanlaha ma lazglaftaha si pgha mghamha la Yuda, ŋa dra urdi ŋa dray nda dra ta vliha tskal tskala ma luwaha la Yuda, nda vliha ta wanaftá Ursalima ya. Mantsa ya guli gwal ta dra urdi ŋa dray nda dra ŋa Baghal, nda fitik, nda tili, nda tekwatsaha, nda inda skwiha ta luwa.

⁶ Ka kligiŋtá tsi ta skwa wuyay Asera ma həga Yawe. Ka klaghatá tsi da lika Kidruŋ ta hula Ursalima, ka driŋtá tsi hada, ka ŋərɗiŋtá tsi ka hutiɗif, ka paghafta ta daɓa kuluha hamata mnduha.

⁷ Dzaɓiŋha ta dzuguviha nzakwa karwaha si ma həga Yawe, vli ta kəl miʼaha ka ga lgut ŋa skwa wuyay Asera.

⁸ Ka vraganaghatá tsi da Ursalima ta inda gwal dra skwi ŋa Lazglafta ma inda luwaha la Yuda. Ka dmanaftá tsi ta vliha tskal tskala ta kəl gwal dra skwi ŋa lazglafta ka dra urdi, daga ma Gevagh dikw da Bəʼerseva. Ka dzaɓiŋtá tsi ta vliha tskal tskala ta wa tghaha, tsa si ta tva lami ta wa tgha Yəhusuwa, guvna luwa, tsa nda ga zlaɓa wa tgha luwa ya.

⁹ Vlaŋ a lu ta tvi ta gwal si ta dra skwi ŋa Lazglafta ta vliha tskal tskala ŋa laviŋtá ŋladafta ta gwira Yawe ma Ursalima wu, ama ta zay həŋ ta buradi kul haɗ is mida manda ŋa zwana ma taŋ.

¹⁰ Ka dmanaftá Yusiya ta Tufet ma didiŋa Benʼhinum ya, ŋa kwala dər wati ma mndu vlatá zwaŋa ni ka makwa ni a tsi ka skwa pla ghəŋ ta vu ŋa vlaŋtá glaku ta Mulek.

¹¹ Ka hlanatá tsi ta plisha si pgha mghamha la Yuda ta wi tgha həga Yawe ŋa vla glaku ŋa fitik, ndusa nda dzuguva mapsla Nataŋʼmelek, tekw mataba zwana dzuguviha duhwalha mgham. Ka dariŋtá tsi ta mwata plisha vla glaku ŋa fitik.

¹² Ka dzaɓiŋtá tsi ta gwirha ta ghərzla dzuguvi ta ghəŋa həga nda slra ŋa Ahaz, gwirha ya si dzidzihwaf mghamha la Yuda ya. Mantsa ya tsaha magaf Mənase ma daɓiha his ma həga Yawe ya. Tahula ɓaliŋta ni, ka hlafta tsi hada, ka hlaghata pghiŋtá hutiɗifa taŋ ma lika Kidruŋ.

¹³ Ka dmanaftá mgham ta vliha tskal tskala ya si dzihwaf Salumuŋ mghama la Israʼila mbəŋ nda Ursalima, nda ga zeghwa ghwá Zaɗaku, si ŋa vlaŋtá sgit ta Ghasturet, manzakɗawaya skwa wuyaya la Tsiduŋ, nda Kəmus, manzakɗawaya skwa wuyaya la Muwav, nda Milkum, manzakɗawaya skwa wuyaya la Ghamuŋ ya.

¹⁴ Ka ɓalanaptá tsi ta tsatsatá skwiha dgum dguma, ɗaɗatsiŋha ta skwiha wuyay Asera, ka ndaghanaftá tsi ta tsa vli si nza tsi ya nda ghudzifa mnduha.

Mbəɗanaftá nzakw ma Israʼila

¹⁵ Ka dzaɓiŋtá Yusiya guli ta gwir ma Betel, vli tskala si dzihwaf Yaruvgham, zwaŋa Nəvat ta hladamtá la Israʼila da ga dmaku ya. Ka driŋtá tsi ta tsa vli tskala ya, ka ŋərɗiŋta ka hutiɗif, ka driŋtá tsi ta skwa wuyay Asera.

¹⁶ Ka mbəɗavatá Yusiya, ka nghaŋtá tsi ta kuluha hada ta ghwá. Ka ghunaftá tsi ta mnduha ŋa dzaʼa hlagapta ghudzifha ma tsa kuluha ya, ka driŋta ta gwir ka dmanafta, taɓta gwaɗa Yawe ta mnata nda ma wa mnda Lazglafta ta mnutá tsa skwiha ya.

¹⁷ Tahula tsa, kaʼa mantsa: « Nahgani ya ŋira pala ta nghə yu ya na? » kaʼa. Ka mnduha ma tsa luwa ya zlghanaftá wi mantsa: « Kula mnda lazglafta ta sabi ma Yuda ya, tsatsi ta mnutá inda tsa skwi magana ka ta gwir ma Betel ya, » ka həŋ.

¹⁸ Kaʼa mantsa: « Zlanawa zla! Ma ksaŋ dər wa ta ghudzifha ni, » kaʼa. Ka zlanatá lu ta ghudzifha ni, mantsa ya ŋa anabi ta sabi ma Samari.

¹⁹ Ka hliŋtá Yusiya ta inda həgaha skwa wuyay ma vliha tskal tskala ma luwaha Samari, si babaf mghamha la Israʼila ta gufanaftá ŋuɗuf ta Yawe ya. Ka maganatá tsi ta həŋ ta inda skwi ya maga tsi ma Betel.

²⁰ Ka ghwaghwanaftá tsi ta gwirha ta inda gwal dra skwi ta vliha tskal tskala si hada, ka draftá tsi guli ta ghudzifa mnda səla ta həŋ. Tahula tsa, ka vraghatá tsi da Ursalima.

Skala Pak

²¹ Tahula tsa, ka mnanaftá mgham ta inda mnduha, kaʼa mantsa: « Skalawa skala ta Pak ŋa vla glaku ŋa Yawe, Lazglafta ghuni, taɓta skwi ya nda vinda ma na deftera dzratá wi na, » kaʼa.

²² Ta skalaŋ a lu ta mndərga tsa skala Pak ya daga ta fitika ŋanata gwal tsa guma ta la Israʼila, dər ta fitika mghamha la Israʼila, nda ŋa mghamha la Yuda wa.

²³ Ta maghwaŋpəɗ tghasa vakwa Yusiya ta gá mgham skala lu ta tsa skala Pak ya, ŋa vla glaku ŋa Yawe ma Ursalima.

Skwiha mbaɗanaf Yusiya

²⁴ Ta ghəŋa tsa, ka hlanatá Yusiya ta gwal ta gwaɗa nda sulkuma gwal ma haɗik, nda ɗəgha, nda lazglaftaha ma həga, nda skwa wuyay, nda inda skwiha ka manzakɗaway ta nghaŋta lu ta haɗika la Yuda nda ya ma Ursalima. Maga maga manda tsaya kada magata lu ta slna nda gwaɗa zlaha Musa, ya nda vinda ma tsa ɗelewera slanagha Hilkiya, mnda dra skwi ŋa Lazglafta ta slanaghata ma həga Yawe ya.

²⁵ Ma kɗaku Yusiya, haɗ sana mgham manda tsatsi ta ndiʼaftá vgha ta Yawe nda hya hya ŋuɗufa ni, nda inda hafa ni, nda inda mbrakwa ni, taɓta inda zlaha Musa wa. Tahula tsatsi, haɗ sani ta zlagapta manda tsatsi guli wa.

²⁶ Nziya nza tsi, zlana a Yawe ta gufatá ŋuɗufa ni katakata wa. Gufu gufa ŋuɗufa ni katakata ta ghəŋa la Yuda, dabga inda skwiha maga Mənase ta ganaftá ɓasa ŋuɗuf.

²⁷ Ka Yawe tama mantsa: « Dər la Yuda guli, dzaʼa diʼiŋiŋtá yu nda iʼi manda ya diʼiŋiŋ yu ta la Israʼila ya. Dzaʼa vziŋ vza yu ta luwa Ursalima si zbap yu, nda tsa həga si mna yu kazlay na: “Hada dzaʼa nzakwa hga ɗa,” kəʼa ya, » kaʼa.

Mtakwa mgham Yusiya

²⁸ Pɗakwa slnaha Yusiya, nda inda skwiha maga tsi ná, vivindam vivinda lu ma ɗelewera vinda slnaha mghamha la Yuda.

²⁹ Ma fitika tsatsi, ka laf Firʼawna Nəhu, mghama Masar nda ta zala Yufratis da kataŋtá mghama la Asur. Ka sliʼaftá mgham Yusiya da gmata nda tsi, ama na gi nghaŋta Firʼawna ma Məgidu, ka dzatá tsi ta Yusiya.

³⁰ Ka klaghatá kwalvaha ni ta mbla ni ma mwata plis daga ma Məgidu da Ursalima, ka paɗamtá həŋ ma kula ni. Ka klaftá mnduha ma tsa haɗik ya ta Yuʼahaz, zwaŋa Yusiya, ka pghanaghatá rɗi, ka famta ka mgham ma vla da ni.

Gá mghama Yuʼahaz ma Yuda

³¹ Hisambsak hkən mida ima Yuʼahaz ta nzatá tsi ka mgham. Ka zatá tsi ta tili hkən kweŋkweŋ ta gá mgham ma Ursalima. Hamutal, hga ma ni, makwa Yirməya, mnda la Livna.

³² Ka mag tsi ta ghwaɗaka skwi ta wa ira Yawe manda va ya maga dzidzíha ni.

³³ Ka ksaftá Firʼawna Nəhu, ka hamta ma gamak ma Rivla, ta haɗika Hamat, ŋa kwala ni gəgəlta mgham ma Ursalima. Ka mblaftá Firʼawna Nəhu ta haɗika la Yuda ŋa pla dzumna ka kiluʼa tsedi dəmbuʼ hkən nda fwaɗ dərmək (3.400) nda kiluʼa dasu hkən mbsak fwaɗ mida.

³⁴ Ka fatá Firʼawna Nəhu ta Ilyakim, zwaŋa Yusiya ka mgham ma vla da ni Yusiya, ka mbəɗanaftá tsi ta hga ni ka Yəhuyakim. Yuʼahaz ya, ka ksutá tsi, ka klaghata da Masar, hada mtuta tsi.

³⁵ Ka vlaŋtá Yəhuyakim ta tsedi nda dasu ŋulum ta Firʼawna Nəhu, ama ka tsatsanaftá tsatsi ta mnduha ma tsa haɗik ya ŋa mutsaftá tsa tsedi ta ɗawu Firʼawna ya. Ka fafanaftá tsi ta mayaka inda mndu taɓta mbrakwa ni, ka ɗaway tkweʼ da mnduha ma tsa haɗik ya ta tsedi nda dasu má dzaʼa vlaŋta tsatsi ta Firʼawna Nəhu.

Gá mghama Yəhuyakim ma Yuda

³⁶ Hisambsak hutaf mida ima Yəhuyakim ta nzatá tsi ka mgham. Ka zatá tsi ta vaku ghwaŋpəɗ ndeŋ ta gá mgham ma Ursalima. Zevida, hga ma ni, makwa Pədaya, mnda la Rumah.

³⁷ Ka mag Yəhuyakim ta ghwaɗaka skwi ta wa ira Yawe manda va ya maga dzidzíha ni.