2Mgh 22 - Hdi

Yusiya, mghama la Yuda

¹ Tghas ima Yusiya ta nzatá tsi ka mgham. Ka zatá tsi ta vaku hkən mbsak ndeŋ mida ta gá mgham ma Ursalima. Yədida hga ma ni, makwa Ghadaya mnda la Butskat.

² Ka mag tsi ta skwi tɗukwa ta wa ira Yawe. Ka ksaftá tsi ta tvi manda va ŋa dzidza ni Dawuda, dzəmbiɗana a dər nda ga zeghwi, dər nda ga zlaɓa wa.

Slafta Hilkiya ta deftera zlaha Musa

³ Ta maghwaŋpəɗ tghasa vakwa ni ta gá mgham, ka ghunaftá mgham Yusiya ta Safaŋ da həga Yawe. Safaŋ ná, zwaŋa Atsalyahu, zigha Məsulam, mnda vindanatá vindi ta mgham ya. Ka Yusiya nda tsi mantsa:

⁴ « Ŋla, ka dzaʼa ka da Hilkiya, mali ta ghəŋa gwal dra skwi ŋa Lazglafta, ka mbəɗafta tsi ta tsedi hlagagha lu da həga Yawe, ya tsaʼuwaf gwal ta ngha wa tghaha da mnduha ya.

⁵ Ka vlaŋtá lu ta tsa tsedi ya ta maliha ta nghanaghatá slna ma həga Yawe, ŋa play taŋ ŋa gwal ta papaya vliha ta badzuta ta həga Yawe,

⁶ nda gwal tsa dzaʼuwa, nda gwal ba həga, nda gwal ba həga brik, ŋa skway taŋ ta udzu nda fifiɗatá palaha ŋa papaya tsa həga ya.

⁷ Haɗ lu dzaʼa ɗaway da tsa mnduha vlaŋ lu ta tsa tsedi ya, ta skwi ta mag həŋ nda tsi wu, kabga nda tva ni ta maga həŋ, » kaʼa.

⁸ Ka Hilkiya, mali ta ghəŋa gwal dra skwi ŋa Lazglafta nda Safaŋ, mnda vindi mantsa: « Slaf sla yu ta deftera zlaha Musa ma həga Yawe, » kaʼa. Ka vlaŋtá Hilkiya ta tsa defteri ya ta Safaŋ, ka dzaŋaftá tsi.

⁹ Ka lagha Safaŋ, mnda vindi rusanaftá mgham, kaʼa mantsa: « Hlap hla kwalvaha gha kay ta tsa tsedi ma həga Lazglafta ya, ka pghanamta ma dzvu ta maliha ta nghanaghatá slna ma həga Yawe, » kaʼa.

¹⁰ Kaʼa guli mantsa: « Vliha vla Hilkiya, mnda dra skwi ŋa Lazglafta ta defteri, » kaʼa. Ka dzaŋaftá Safaŋ mnda vindi ta kəma mgham.

Ɗaway Yusiya ta gwaɗa da Hulda

¹¹ Snaŋta mgham ta gwaɗa ma deftera zlaha Musa, ka kuhiŋtá tsi ta lgutha ni.

¹² Ka mnanaftá mgham ta Hilkiya, mnda dra skwi ŋa Lazglafta, nda Ahikam, zwaŋa Safaŋ, nda Ghakbur, zwaŋa Mihaya, nda Safaŋ mnda vindi, nda Ghasaya, kwalva mgham, kaʼa mantsa:

¹³ « Lawa ɗawaɗiptá ndana Yawe ka ŋa ɗa, nda ya ŋa mnduha, nda ya ŋa inda la Yuda ta ghəŋa gwaɗaha tsa defteri slanagha lu ya. Dagala vusla htsiŋa Yawe ta ghəŋa amu, kabga kwalaghuta dzidzíha mu ta snatá gwaɗaha tsa defteri ya, maga a həŋ ta slna nda inda skwi nda vinda mida wu, » kaʼa.

¹⁴ Ka laghu Hilkiya, mnda dra skwi ŋa Lazglafta, nda Ahikam, nda Ghakbur, nda Safaŋ, nda Ghasaya slanaghatá anabi Hulda, markwa Salum, zwaŋa Tikva, zigha Harhas mndu ta nghapta ka lgutha ya. Ma lfiɗa ghərzla ma Ursalima ta nzakwa Hulda. Ka rusanaftá həŋ ta tsa gwaɗa ya.

¹⁵ Ka tsa marakw ya nda həŋ mantsa: « Wya ka Yawe, Lazglafta la Israʼila mnata: “Mnanawa mna ta tsa mndu ta ghunaghunakta da iʼi ya kazlay:

¹⁶ Wya ka Yawe mnata: Dzaʼa kladagha kla yu ta zləmnda da tsa vli ya, nda ya ta ghəŋa mnduha ni taɓta inda gwaɗaha nda vinda ma tsa defteri dzaŋaf mghama la Yuda ya.

¹⁷ Tsəhala zliha zla gwal ma Ursalima, ka laghwi dra urdi ŋa dray nda dra ŋa sanlaha ma lazglaftaha ŋa gaɗifta ɓasa ŋuɗuf, nda ma inda slna magaf həŋ nda dzva taŋ ya, nda gufa ŋuɗufa ɗa ta ghəŋa tsa vli ya, lɓavata a wa.

¹⁸ Ama ka mnanata kuni ta mghama la Yuda ta ghunaghunakta ɗawaptá ndana Yawe na: Wya ka Yawe, Lazglafta la Israʼila mnata ta ghəŋa tsa gwaɗa snaŋ ka ya:

¹⁹ Tsəhala ta haga madər ka, ka hanaganatá ka ta ghəŋa gha ta kəma Yawe snaŋər ka ta skwi mna yu ta ghəŋa tsa vli ya, nda mnduha ta nzakw mida tani, kazlay dzaʼa nzakway tsa luwa ya ka kufik, vli nda ksiʼa kəʼa ya, nda ya ka kuhiŋtá ka ta lguta gha, ka tawatá ka ta taw ta kəma ɗa ya, iʼi guli ná, nda sna yu, ka Yawe mnata.

²⁰ Tsaya tama, dzaʼa gwaghaf gwa yu nda dzidzíha gha, ma zɗaku dzaʼa dzaʼa ka da guya vgha nda həŋ ma kulu. Nghaŋta a ka ta inda zləmndaha dzaʼa klakta yu ta ghəŋa na vli na wu,” kaʼa, » kaʼa. Ka vraŋtá həŋ ta tsa zlgha wi ya ta mgham.