2Mgh 21 - Hdi

Gá mghama Mənase ma Yuda

¹ Ghwaŋpəɗ his ima Mənase ta nzatá tsi ka mgham. Hutaf mbsak hutaf mida vakwa ni ta gá mgham ma Ursalima. Heftsiva hga ma ni.

² Ka mag Mənase ta ghwaɗaka skwi ta wa ira Yawe, ka klaftá tsi ta saɗa manzakɗawayha mndəra mnduha ghazliŋ Yawe ta kəma la Israʼila ya.

³ Ka dzidzihuglaftá tsi ta vliha tskal tskala ya si dzadzaɓiŋ da ni Hizkiya ya. Dzidzihuglafha ta gwirha ŋa vla sgit ŋa Baghal, dzagwaha ta skwa wuyay Asera manda ya maga Ahav, mghama la Israʼila. Ka tsəlɓu tsi ta tsəlɓu ta kəma inda skwiha ta luwa, ka maga slna ŋa taŋ.

⁴ Dzidzihwafha ta gwirha ma həga Yawe, ma vli mna Yawe kazlay na: « Ma Ursalima zbapta yu ta vli ŋa nzakwa hga ɗa, » kəʼa ya.

⁵ Ka dzidzihwaftá tsi ta gwirha ma daɓiha his his ma həga Yawe, ŋa vla sgit ŋa inda skwiha ta luwa.

⁶ Ka draftá tsi ta zwaŋa ni ka skwa pla ghəŋ ta vu. Ka dzugu tsi ta zlazlra, nda vza mandaŋ, ka laghu tsi da gwal ta gwaɗa nda sulkuma gwal nda rwa, nda gwal ga ɗəgha. Ka dzaʼa tsi ta kəma ta kəma nda maga ghwaɗaka skwi ta kəma Yawe, ka gufanaftá ŋuɗuf.

⁷ Tsa skwa wuyay Asera magaf tsi ya ná, ka kladamtá tsi da həga Yawe. Tsaw ka Yawe si mnanatá i Dawuda nda zwaŋa ni Salumuŋ na: « Ma na həga na nda ya ma Ursalima, ya zbap yu mataba inda mndəra la Israʼila, ŋa fata hga ɗa ŋa ɗekɗek kəʼa ya.

⁸ Ka ŋava ŋa la Israʼila ɗina ka snatá inda zlahuha ɗa, nda inda skwi ya taghanaf kwalva ɗa Musa ta həŋ katsi, haɗ yu dzaʼa kakraŋgəltá həŋ diʼiŋ nda haɗik ya vlaŋ yu ta dzidzíha taŋ wu, » kaʼa.

⁹ Ama ka kwalaghutá həŋ ta snata. Ka mbəɗiŋtá Mənase ta həŋ ta ghwaɗaka tvi, ka magatá həŋ ta ghwaɗaka skwiha ka malaghutá ŋa mndəra sanlaha ma mnduha la mayəm, ya zaɗana Yawe ta kəma la Israʼila ya.

¹⁰ Ka Yawe mnata nda ma wa kwalvaha ni la anabi mantsa:

¹¹ « Maga maga Mənase, mghama la Yuda ta tsa manzakɗawayha ya. Ka magatá tsi ta ghwaɗaka skwi ka malaghutá ŋa la Amuru ta maguta ghalya ma kɗaku tsatsi ya. Ka pghamtá tsi ta la Yuda da ga dmaku nda ma tsa skwa wuyayha ni ya.

¹² Dabga tsaya, wya ka Yawe, Lazglafta la Israʼila mnata: “Dzaʼa klanak kla yu ta zləmnda ta la Ursalima nda la Yuda, dər wa dzaʼa snaŋta nda sləməŋa ni, dzaʼa nza nza daghəzlaw.

¹³ Dzaʼa tɗap tɗa yu ta tɓaŋa gra skwi ta ghəŋa la Ursalima manda ya tɗap yu ta ghəŋa la Samari nda ya ta ghəŋa la ga Ahav ya. Dzaʼa niʼaf niʼa yu ta Ursalima manda ya ta niʼata lu ta hilba ka dzuɓanata tahula niʼata ya.

¹⁴ Dzaʼa zlanava zla yu ta pɗakwa mnduha ɗa, dzaʼa vla vla yu ta həŋ ma dzva ghumaha taŋ. Dzaʼa zləɗa zləɗa inda ghumaha taŋ ta həŋ ka zlaʼuwatá həŋ,

¹⁵ kabga maga maga həŋ ta ghwaɗaka skwi ta wa ira ɗa, zlana a həŋ ta gaɗifta ɓasa ŋuɗuf daga ka yawu saba dzidzíha taŋ ma Masar ha gita wu,” » kaʼa.

¹⁶ Pəghiŋ pəgha Mənase ta usa ndəghata gwal kul haɗ dmakwa taŋ ha ka ndəghanaftá Ursalima daga ta sana slərpu dikw ta sana slərpu. Zlanaha lu ta dmaku ya maga tsi, ka hlamtá la Yuda da maga ghwaɗaka skwiha ta wa ira Yawe ya.

¹⁷ Pɗakwa slnaha Mənase, nda inda skwi hɗam tsi, nda dmaku maga tsi ná, vivindam vivinda lu ma ɗelewera vinda slnaha mghamha la Yuda.

¹⁸ Ka laghu Mənase da dzidzíha ni, ka paɗamtá lu ma gavaka həga ni ta hgə lu ka gavaka Ghuza ya. Ka lam zwaŋa ni Amuŋ da gá mgham ma vla ni.

Gá mghama Amuŋ ma Yuda

¹⁹ Hisambsak his mida ima Amuŋ ta nzatá tsi ka mgham. Ka zatá tsi ta vaku his ta gá mgham ma Ursalima. Məsulemet hga ma ni, makwa Haruts, mnda la Yutva.

²⁰ Ka mag Amuŋ ta ghwaɗaka skwi ta wa ira Yawe manda ŋa da ni Mənase.

²¹ Ka klaftá tsi ta saɗa da ni ma inda skwi demdem. Ka mag tsi ta slna ŋa skwa wuyayha ya si ta mag da ni ta slna ŋa ni, ka tsəlɓu tsi ta tsəlɓu ta kəma taŋ.

²² Ka zlanavatá tsi ta Yawe, Lazglafta dzidzíha ni, ka kwalaghutá ksa tva Yawe.

²³ Ka dzraftá kwalvaha ni ta wi ta ghəŋa mgham Amuŋ. Ka dzatá həŋ ma həga gá mghama ni.

²⁴ Ama ka pslatá mnduha tsa haɗik ya ta inda tsa gwal ta dzraftá wi ta ghəŋa mgham Amuŋ ya, ka famtá həŋ ta zwaŋa ni Yusiya ka mgham ma vla ni.

²⁵ Pɗakwa slna Amuŋ ya maga tsi ná, vivindam vivinda lu ma ɗelewera vinda slnaha mghamha la Yuda.

²⁶ Ka paɗamtá lu ma kula ni ma gavaka Ghuza. Ka lam zwaŋa ni Yusiya da gá mgham ma vla ni.