2Mgh 20 - Hdi

Mbafta Hizkiya ma ɗaŋwa ni

¹ Ma tsa fitikha ya, ka ksaftá ɗaŋwa drəsl ta Hizkiya ŋa dzaʼa da haɗik. Ka lagha anabi Isaya, zwaŋa Amuts slanaghata, kaʼa nda tsi mantsa: « Wya ka Yawe mnata: “Mnanaf mna ta sləkaɗa gha ta la ga ghuni, kabga dzaʼa mtu mta ka, nzəglata a ka nda hafu wu,” kaʼa, » kaʼa.

² Ka mbəɗavata Hizkiya nda təv vata həga, ka maga duʼa da Yawe, kaʼa mantsa:

³ « Ar Yawe, havap hava ka mbaɗa ya mbaɗ yu kahwathwata ta kəma gha ma hya hya ŋuɗufa ɗa, ka magatá yu ta skwi ɗina ta wa ira gha, » kaʼa. Ka hərɓ Hizkiya ta taw katakata.

⁴ Ta kɗivigis a Isaya ta sabi da daɓi ma takataka həga wu, ka sagha gwaɗa Yawe da tsi, kaʼa mantsa:

⁵ « Vra mnanatá Hizkiya, mala mnduha ɗa kazlay: “Wya ka Yawe, Lazglafta dzidza gha Dawuda mnata: Nda sna yu ta duʼa gha, nda ngha yu ta ima tawa gha. Dzaʼa mbaghaf mba yu. Baɗima ya, ka ŋladafta ka da həga Yawe.

⁶ Dzaʼa sgaghagha sga yu ta vaku ghwaŋpəɗ hutaf. Dzaʼa zluʼap zluʼa yu ta kagha, nda na luwa na ma dzva mghama la Asur. Dzaʼa katay yu ta na luwa na dabga iʼi, nda ya dabga kwalva ɗa Dawuda,” kaʼa, » kaʼa.

⁷ Ka Isaya mantsa: « Klagaghawa kla ta hwaɗata ɗgatá ghuraf, » kaʼa. Ka klaktá lu ka masafta ta mbuʼa mgham, ka mbafta tsi.

⁸ Ka Hizkiya nda Isaya mantsa: « Wati ŋizla ya dzaʼa griɗifta kazlay dzaʼa mbiɗif mba Yawe, ŋa ŋladafta ɗa da həga Yawe baɗ mahkən kəʼa na? » kaʼa.

⁹ Ka Isaya tama mantsa: « Wya ŋizla ya vlagha Yawe dzaʼa graghafta kazlay dzaʼa hɗam hɗa ta gwaɗa ya mna tsi kəʼa: Laba sulkum ka fata səla ghwaŋ re, ari vraghuta ni ka fata səla ghwaŋ a kumaŋ ka na? » kaʼa.

¹⁰ Ka Hizkiya mantsa: « Mal ndəkweɗata laba sulkum nda ta kəma ka fatá səla ghwaŋ, ka vra ni nda hul, » kaʼa.

¹¹ Ka ndəɓu anabi Isaya ta dzvu da Yawe. Ka vranaktá Yawe ta sulkum ka fatá səla ghwaŋ ta madzəɓara Ahaz si sa tsi tida ya.

Zlghafta Hizkiya ta gwal ghunak mghama Babila

¹² Ma tsa fitik ya, ka tsəghanaftá Merudakʼbaladaŋ, zwaŋa Baladaŋ, mghama Babila ta ɗelewerha nda mbəhu ta Hizkiya, kabga snaŋta ni ta kwala Hizkiya kul ɗughwanaku.

¹³ Ka rfu Hizkiya ta rfu nda lagha tsa gwal ghunay ya, ka mamaranaŋtá tsi ta həŋ ta inda dzuguva ɗifa skwa ni, nda tseda ni, nda dasa ni, nda urdiha ni, nda rɗiha zɗa zɗa ziʼakwa ni, nda huzla vula ni, nda inda skwiha ma dzuguva ɗifa skwa gadghəla ni. Haɗ sana skwi ga taŋ nda ya ta kwakwara ni pɗanaghu Hizkiya kul mamaranaŋtá həŋ wa.

¹⁴ Tahula tsaya, ka lagha anabi Isaya slanaghatá mgham Hizkiya, ka ɗawaŋtá tsi da tsi: « Nahgani mna tsa mnduha ya, sagha ma vli ga həŋ da nghaghata na? » kaʼa. Ka Hizkiya zlghaftá wa ni mantsa: « Sagha ta haɗik diʼiŋ həŋ, ma Babila, » kaʼa.

¹⁵ Ka Isaya mantsa: « Nahgani naghana həŋ ma həga gá mghama gha na? » kaʼa. Ka Hizkiya zlghaftá wa ni mantsa: « Naghana nagha həŋ ta inda skwi ma həga ga ini. Haɗ skwi ma dzuguva ɗifa skwa gadghəla ɗa kul mamaranaŋtá yu ta həŋ wu, » kaʼa.

¹⁶ Ka Isaya tama nda Hizkiya mantsa: « Sna ta gwaɗa mna Yawe!

¹⁷ “Dzaʼa sagha sa fitik ŋa hlaghata da Babila ta inda skwi ma həga ga ghuni, nda inda skwi tskana dzidzíha gha ha ka sagha ta na fitik na. Haɗ skwi dzaʼa pɗata wu,” ka Yawe.

¹⁸ “Dzaʼa hlagha hla lu ta sanlaha ma zwana gha ya ya ya kagha, ŋa paslaftá həŋ ŋa maga slna ma həga gá mghama, mghama Babila,” kaʼa, » kaʼa.

¹⁹ Ka Hizkiya nda Isaya mantsa: « Zɗa tsa gwaɗa Yawe ta mnihata ya, » kaʼa. « Ka dzaʼa mamu zɗaku nda nzakw ləŋləŋ ma nzakwa ɗa nda hafu tani ní, nu gwaɗa iʼi na! » kaʼa ma ghəŋa ni.

Mtakwa Hizkiya

²⁰ Pɗakwa slnaha Hizkiya ta magata, nda glakwa gá mghama ni, nda ghwa dzaf tsi, nda ya kəʼa tagatá tva imi ka klaghata da luwa ná, vivindam vivinda lu ma ɗelewera vinda slnaha mghamha la Yuda.

²¹ Ka laghu Hizkiya da dzidzíha ni. Ka lam zwaŋa ni Mənase da gá mgham ma vla ni.