2Mgh 2 - Hdi

Klaghatá Iliya ta luwa

¹ Baɗ klaghata Yawe ta Iliya ta luwa ma mghama falak ná, ta mbaɗa i Iliya nda Ilisa ta tvi manda sliʼafta taŋ ma Gilgal.

² Ka Iliya nda Ilisa mantsa: « Nza nza hadna, wya dzvu, kabga ta ghuna iʼi Yawe ha da Betel, » kaʼa. Ka Ilisa zlghanaftá wi mantsa: « Ta waɗa waɗa yu nda hga Yawe nda hafu mida, nda ya nda hafa vərɗa kagha, haɗ yu dzaʼa zlaghata wu, » kaʼa. Ka laha həŋ da Betel.

³ Ka sliʼagaptá sana guyatá ghəŋa anabiha ma Betel da Ilisa, ka həŋ nda tsi mantsa: « Nda sna kagha kazlay gita dzaʼa klagadaghawuta Yawe ta rvera gha kəʼa ra? » ka həŋ. Kaʼa zlghanaftá wi ta həŋ mantsa: « Nda sna yu, nzawa nza tsəriɗ, » kaʼa.

⁴ Ka Iliya nda tsi mantsa: « Ilisa! Nza nza hadna, wya dzvu, kabga ta ghuna iʼi Yawe da Yeriku, » kaʼa. Ka Ilisa zlghanaftá wi mantsa: « Ta waɗa waɗa yu nda hga Yawe nda hafu mida, nda ya nda hafa vərɗa kagha, haɗ yu dzaʼa zlaghata wu, » kaʼa. Ka ɓhadaghatá həŋ da Yeriku.

⁵ Ka sliʼadaghatá sana guyatá ghəŋa anabiha guli ma Yeriku da Ilisa, ka həŋ nda tsi mantsa: « Nda sna kagha kazlay gita dzaʼa klagadaghawuta Yawe ta rvera gha kəʼa ra? » ka həŋ. Kaʼa zlghanaftá wi ta həŋ mantsa: « Nda sna yu, nzawa nza tsəriɗ, » kaʼa.

⁶ Ka Iliya nda tsi mantsa: « Nza nza hadna, wya dzvu, kabga ta ghuna iʼi Yawe təv Yardeŋ, » kaʼa. Kaʼa zlghanaftá wi mantsa: « Ta waɗa waɗa yu nda hga Yawe nda hafu mida, nda ya nda hafa vərɗa kagha, haɗ yu dzaʼa zlaghata wu, » kaʼa. Ka kɗə həŋ his his ta tva taŋ.

⁷ Ka sliʼaftá mnduha hutaf mbsak mataba guyatá ghəŋa anabiha mista taŋ, ka nzakta həŋ mbəŋ nda hahəŋ his kətsaʼu, ta sladatá hahəŋ ta wa Yardeŋ.

⁸ Ka klaftá Iliya ta sɗakwa ni, ka mbsanata ka dzaŋtá imi nda tsi. Ka tavaptá tsa imi ya, ka lab hahəŋ his his nda səla ta ghwalata vli.

⁹ Manda tsughwaɗadapta taŋ, ka Iliya nda Ilisa mantsa: « Mniha mna ta skwi ta kum ka ta magaghata ɗa, ma kɗaku lu klaghatá iʼi diʼiŋ nda kagha, » kaʼa. Ka Ilisa zlghanaftá wi mantsa: « Ta ndəɓa dzvu yu da kagha, má ka mutsaf mutsa yu his səla ta mbrakwa sulkuma gha! » kaʼa.

¹⁰ Ka Iliya mantsa: « Skwi nda bla ta ɗaw ka. Ama nziya nza tsi, ka dzaʼa nda ngha ka ta iʼi ta fitika klay dzaʼa klaghata lu ta iʼi diʼiŋ nda kagha ya, dzaʼa mutsay ka. Ka nghaŋta a ka wu, mutsafta a ka wu, » kaʼa.

¹¹ Tata kɗay kɗay həŋ ta mbaɗa ta dzaʼa nda gwaɗa, gi ka dganatá mwata plis nda plisha ka vu ka vu ta həŋ, gi ka ŋlaghatá Iliya ta luwa ma mghama falak.

¹² Ka nghə Ilisa nda wahu nda wahu, kaʼa mantsa: « A da ɗa! A da ɗa! Mwata plis nda gwal ŋla plisa la Israʼila! » kaʼa. Tahula tsa, gi nghəgla a wu, ka ksaftá tsi ta lguta ni, ka kuhwanapta his.

¹³ Tahula tsa, ka klaftá tsi ta sɗakw ta dɗagaghuta ta badzaga Iliya. Ka vraghatá tsi, ka sladata ta wa Yardeŋ.

¹⁴ Ka klaftá tsi ta tsa sɗakwa Iliya ta dɗagaghuta ya, ka dzaŋtá imi, kaʼa mantsa: « Ga Yawe, Lazglafta Iliya ya na? » kaʼa. Dzuŋta Ilisa ta tsa imi ya, ka dgavaptá tsi guli, ka tsughwaɗadapta tsi.

¹⁵ Ka nghə tsa sana guyatá ghəŋa anabiha ma Yeriku mbəŋ nda tsi ya, ka həŋ mantsa: « Ya nzanagha nza mbrakwa sulkuma Iliya ta Ilisa! » ka həŋ. Ka lab həŋ da guyay, ka zlambatá həŋ zluzlumbruh ta haɗik ta kəma ni.

¹⁶ Ka həŋ nda tsi mantsa: « Wana mamu mnduha viɗviɗ hutaf mbsak kawadaga nda kwalvaha gha. Ta kumay ka ta dzaʼa taŋ da zbaghaktá rvera gha ra? Kawayaka skwi, klagha kla Sulkuma Yawe ka laghwi da fata ta ghwá, ka ma sana didiŋa a tsi, » ka həŋ. Ama ka Ilisa mantsa: « Ma ghunaf kuni ta həŋ, » kaʼa.

¹⁷ Ka va mbrəh həŋ ka ŋɗaŋɗa ha ka traptá tsi ta skwi ŋa mnay, kaʼa mantsa: « Ghunafwa ghuna ta həŋ, » kaʼa. Ka ghunaghatá həŋ ta mnduha hutaf mbsak da psa Iliya, hkən fitika taŋ slanagha a həŋ wa.

¹⁸ Vrakta taŋ da Ilisa ta ma Yeriku karaku, kaʼa nda həŋ mantsa: « Si mnaghuna a yu ma lə kuni kəʼa kay wu ra? » kaʼa nda həŋ.

Zlrafta Ilisa ta maga skwiha ka mandərmimi

¹⁹ Ka mnduha ma luwa nda Ilisa mantsa: « Rvera ɗa, má ɗina nzakwa haɗika na luwa na ka kagha ta nghay, ama ɗina a ima ni wu, haɗ skwi ta magaku ta haɗika ni wu, » ka həŋ.

²⁰ Kaʼa mantsa: « Klagaɗighawa kla ta kuwa ka lfiɗ, ka magamta kuni ta slughul mida, » kaʼa. Ka klanaktá həŋ.

²¹ Ka lab tsi nda təv dzuɓay, ka pghadatá tsi ta tsa slughul ya dida, kaʼa mantsa: « Wya ka Yawe mnata: “Ta nanaf na yu ta na imi na zɗa, dzəgəlta a ta mndu wu, pyəglafta a ta magakwa skwi ta na haɗik na wu,” » kaʼa.

²² Ka nzatá tsa imi ya zɗa ha gita, taɓta gwaɗa ya mna Ilisa.

²³ Ka sliʼaftá tsi hada, ka ŋlaghata da Betel. Ta ŋladaftá tsi ta tvi, ka sliʼagaptá galaɓayha ma luwa, ka ghuɓasay, ka həŋ nda tsi mantsa: « Sliʼa! Sliʼa! Vərndaha vərndaha ghəŋ na! » ka həŋ.

²⁴ Ka mbəɗavatá tsi ka ngha həŋ, ka ksiʼaftá tsi ta həŋ nda hga Yawe. Mantsa tama, ka sliʼagaptá ziŋaha his ma həga fu, ka kwakwahanaptá gwal fwaɗ mbsak his mida mataba tsa galaɓayha ya.

²⁵ Ka sliʼaftá tsi hada, ka laghwi ta ghwá Karmel. Ka sliʼiglaftá tsi hada, ka vraghata da Samari.