2Mgh 19 - Hdi

Ɗaway Hizkiya ta gwaɗa da anabi Isaya

¹ Snaŋta mgham Hizkiya ta tsa gwaɗaha ya, ka kuhiŋtá tsi ta lguta ni, ka favatá buhu, ka laghwi da həga Yawe.

² Ka ghunaftá tsi ta Iliyakim, mali ta ghəŋa həga gá mgham, nda Sevna mnda vindi, nda galata mnduha gwal dra skwi ŋa Lazglafta, hahəŋ demdem nda susuɗatá buhu ta vgha da anabi Isaya, zwaŋa Amuts,

³ ka həŋ nda tsi mantsa: « Wya ká Hizkiya mnata: “Nana fitik na ná, fitika ŋratá ŋuɗuf, nda ghuya ɗaŋwa, nda pagha dzvu ma ghəŋ ya, kabga ndusa zwani ka saghwi ma huɗa mamaha taŋ, ama haɗ mbraku ŋa ŋiʼagatá həŋ wa.

⁴ Kawayaka skwi, nda sna Lazglafta gha ta inda tsa gwaɗaha slufa ghunak daŋahəga ni, mghama la Asur ŋa raza Lazglafta nda hafu mida ya. Kawayaka skwi, dzaʼa tsanagha tsa Yawe, Lazglafta gha ta guma ta tsa gwaɗaha snaŋ tsi ya. Maga ta duʼa ta ghəŋa gwal ta pɗata,” kaʼa, » ka həŋ.

⁵ Ka laghwi tsa kwalvaha mgham Hizkiya ya da Isaya.

⁶ Ka Isaya nda həŋ mantsa: « Wya ká kuni da mnanatá daŋahəga ghuni: “Ka Yawe mnata na: Ma zləŋ ka ta tsa gwaɗaha snaŋ ka, nda tsa razay duhwalha mghama la Asur ta iʼi ya.

⁷ Wana yu dzaʼa ghunanamtá sana sulkum, ŋa famta da snaŋtá sasa, ŋa vraghata ni ta haɗika ni. Hada, dzaʼa dzata yu nda kafay,” kaʼa, » kaʼa.

Dvəglay Saŋheriv ta Hizkiya

⁸ Ka vraghatá tsa slufa mghama la Asur ya slanaghatá daŋahəga ni ta vulu nda luwa Livna, kabga snaŋ sna kazlay sliʼap sliʼa mgham ma Lahis kəʼa.

⁹ Tata tsaya lu, ka snaŋtá mghama la Asur ta gwaɗa ta ghəŋa Tirhaka, mghama la Kus. « Waʼa ta sagha da vulu nda kagha, » ka lu. Ka ghunəglaftá mghama la Asur ta gwal ghunay da Hizkiya, kaʼa mantsa:

¹⁰ « Wya ká kuni da mnanatá Hizkiya, mghama la Yuda: “Ma nanə tsa Lazglafta gha faf ka ta ghəŋ tida ya ta kagha, ka mnay kazlay: Lamta a Ursalima da dzva mghama la Asur wu,” kəʼa ya.

¹¹ Aʼ! Sna vərɗa kagha ta skwiha magana mghama la Asur ta inda haɗikha, ya kəʼa zaɗanatá həŋ nekwnekw. Kagha yeya dzaʼa ndapta tama ka kagha ta gray rki?

¹² Kataŋ kata sanlaha ma lazglaftaha mndəra mnduha zaɗana dzidzíha ɗa ya ta həŋ rki? Ngha ta skwi ta slanaghatá luwa Guzaŋ, nda ŋa Haraŋ, nda ŋa Retsef, nda ŋa la Ghedeŋ si ma Təlʼasar ya!

¹³ Ga mghama Hamat, nda ŋa Arpat, nda ŋa Layir, nda ŋa Səfarvayim, nda ŋa Hena, nda ŋa Ghiva ndana na? » kaʼa.

Duʼa Hizkiya

¹⁴ Ka zlghaftá Hizkiya ta ɗelewer da tsa gwal ghunaya mghama la Asur ya, ka dzaŋafta. Ka ŋladaftá tsi da həga Yawe. Ka planaptá Hizkiya ta tsa ɗelewer ya ta kəma Yawe.

¹⁵ Ka mag Hizkiya ta duʼa ta kəma Yawe, kaʼa mantsa: « Ar Yawe, Lazglafta la Israʼila, kagha ta nzamta mataba kerubaha, kagha turtuktuk Lazglafta inda gá mghamha ta ghəŋa haɗik, kagha ta magaftá luwa nda haɗik.

¹⁶ Ar Yawe, fa fa ta sləməŋ, ka sna ka! Guna guna ta iri gha Yawe, ka ngha ka! Sna ɓa ta gwaɗa Saŋheriv ta ghunakta ŋa raza kagha Lazglafta nda hafu mida!

¹⁷ Manda tsa nzakwa ni Yawe, zaɗana zaɗa mghamha la Asur ta mndəra sana mnduha nda haɗikha taŋ tani.

¹⁸ Pgham pgha həŋ ta lazglaftaha taŋ da vu, kabga vərɗa lazglaftaha a tsaha ya wu, ama dzva mnduha ta tsatsaftá həŋ, udzu nda pala həŋ. Tsaya kəl həŋ ka laviŋta zaɗanatá həŋ.

¹⁹ Ndanana, Yawe, Lazglafta ŋni, katap kata ta aŋni ma dzva Saŋheriv, ŋa snaŋta inda gá mgham ta ghəŋa haɗik kazlay kagha turtuktuk Lazglafta kəʼa, a Yawe! » kaʼa.

Mnaŋta Isaya ta zlgha wa Yawe

²⁰ Ka tsghaftá Isaya, zwaŋa Amuts ta lwi ŋa Hizkiya, kaʼa mantsa: « Wya ká Yawe, Lazglafta la Israʼila mnata: “Nda sna yu ta duʼa gha ta ghəŋa Saŋheriv, mghama la Asur.”

²¹ Wya gwaɗa mna Yawe ta ghəŋa ni: Hərtəta hərtəta Tsiyuŋ daghala makwa ta kagha, ta ghuɓasay ta kagha. Ta gagama ghəŋ Ursalima ka makwa ya ta ghəŋa kagha.

²² Wa ta gag ka, ka razay na? Wa ta ŋruh ka nda gwaɗa, ka ghwazla iri ŋa ni na? Nda iʼi Lazglafta la Israʼila nda ghuɓa ka nda tsa!

²³ Nda ma gwal ghunay gha, ka razatá ka ta iʼi mgham Yawe, ka ka na: “Iʼi Saŋheriv, əŋkaʼ ka ndəghatá mwataha plisa ɗa, kəl yu ka ŋladafta ta bɗəma ghwáha, ha ka zaghuta ta kɗavakta Ləvanuŋ. Ɗatsiŋ ɗatsa yu ta sedraha ni ta slaslaruta, nda bərusha ni ta ɗiɗinuta. Ɓhanava ɓha yu ta kɗavakta vla nzakwa ni, həga fuha ni himbəzim ya.

²⁴ Iʼi, lalap lala yu ta vavrəmha, ka sutá yu ta imi ta haɗika mayəmha. Ghwaliŋ ghwala yu nda huɗa səla ɗa ta inda ghwaha ma Masar,” ka ka.

²⁵ Sna a kagha kazlay: Daga manda ghalya payafta yu ta tsa skwiha ya, manda bama fata yu kəʼa wu ra? Ndanana tama, ta hɗamtá yu: Ka niŋta ka ta luwaha ma matsaka huzlu ka ŋira kufik.

²⁶ Haɗ mbrakwa mnduha taŋ wu, hlu hla zləŋ katakata, nda hula ta həŋ. Nda nza həŋ manda kuzuŋa vwah, nda ləhtəɗata masuʼata, manda kuzuŋ ta ɗyaku ta həga, ta ghwaluta ka makaʼukaʼu da falaka silwa ya.

²⁷ Ama nda sna yu ta fitik ta nzadata ka, nda fitik ta sab ka, nda fitik ta lam ka, nda fitik ta gaɗivata ka ta sidi.

²⁸ Mantsa nzakwa ni, gaɗiva ga ka ta sidi, ka ɓhagaftá ghərɓakwa gha da sləməŋa ɗa. Tsaya dzaʼa kəl yu ka haghamtá gidaŋa ɗa ma htsiŋa gha, nda tsuhwal ɗa ma wa gha, ka vraghista ɗa nda ta tvi ya sagha ka.

²⁹ Kagha Hizkiya, wya skwi dzaʼa maraghatá ŋizla ni: Ma na vaku na, mandawasa dzaʼa lu da zay. Kɗaghalam ya, ya ta ɗyafta ka ghəŋa ni dzaʼa lu da zay. Ama ta mahkəna vaku ya, ka sləga kuni ta sləgu, ka tska kuni ta skwi ta vwah, ka ŋaɓafta kuni ta vwaha inabiha, ka za kuni ta yakwa taŋ.

³⁰ Gwal ta ndapta mataba la Yuda dzaʼa pɗata nda hafu ya ná, dzaʼa nza nza həŋ manda fu ta dzaghatá slrəŋ nda ma haɗik, ka yaftá yaku nda ta ghəŋ ya.

³¹ Manda tsa nzakwa ni, ma Ursalima dzaʼa saba pɗakwa taŋ, ta ghwá Tsiyuŋ dzaʼa slanaghata lu ta gwal ta pɗata nda hafu. Drakwa ɗvuta Yawe mghama gwal vulu ta kaghuni dzaʼa magay.

³² Tsaya kəl Yawe ka mnay ta ghəŋa mghama la Asur kazlay na: “Lamta a da tsa luwa ya wu, haŋta a ta havaha ni wu, haɗ dzaʼa kapaŋtá zalam wu, tərɓanavata a ta haɗik ta vata matsaka ni wu kəʼa ya.

³³ Nda ta tsa tvi kəl tsi ka lagha ya dzaʼa vra tsi, lamta a da tsa luwa ya wu, ka Yawe mnata.

³⁴ Dzaʼa nghay yu ta tsa luwa ya ŋa katay, dabga vərɗa iʼi, nda ya dabga kwalva ɗa Dawuda,” kəʼa, » kaʼa.

Mtakwa Saŋheriv

³⁵ Ta tsa rviɗik ya, ka sab duhwala Yawe pslatá la Asur dəmbuʼ dərmək nda tghas mbsak hutaf mida (185.000) ma ghuɓa taŋ. Ta sliʼavatá lu wrək sərɗək ná, mbliha yeya sinaka.

³⁶ Ka sliʼanaftá Saŋheriv, mghama la Asur ta ghuɓu, ka vraghuta da Ninive, ka nzata hada.

³⁷ Ma sana fitik, ta tsəlɓu tsi ta tsəlɓu ma həga Nisruk lazglafta ni, ka lagha zwana ni i Adramelek nda Sarʼetser da dzata nda kafay. Ka hwayaghatá həŋ ta haɗika Ararat. Ka lam zwaŋa ni Isarʼhaduŋ da gá mgham ma vla ni.