2Mgh 18 - Hdi

Gá mghama Hizkiya ma Yuda

¹ Ta mahkəna vakwa Huseya, zwaŋa Ila, ka mgham ta ghəŋa la Israʼila, ka nzatá Hizkiya, zwaŋa Ahaz, ka mgham ta ghəŋa la Yuda.

² Hisambsak hutaf mida ima ni ta nzatá tsi ka mgham. Ka zatá tsi ta vaku hisambsak təmbay mida ta gá mgham ma Ursalima. Avi hga ma ni, makwa Zakari.

³ Ka mag tsi ta skwi tɗukwa ta wa ira Yawe, manda va ŋa dzidza ni Dawuda.

⁴ Tsatsi ta hliŋtá vliha tskal tskala, ɓaliŋha ta dzagwatá palaha, ghwadiŋha ta skwa wuyayha Asera, dzaɓiŋha ta nahaɗika ghuva tili si magaf Musa ya, kabga ta dray la Israʼila ta urdi ŋa dray nda dra ta kəma ni ha ka lagha ta tsa fitik ya. Nəhustaŋ, ka lu ta hgay.

⁵ Ta Yawe, Lazglafta la Israʼila fafta Hizkiya ta ghəŋa ni. Haɗ mgham manda tsatsi mataba inda mghamha la Yuda wu, dər mataba gwal ta tiŋlaghutá tsatsi, dər mataba gwal tahula tsatsi wa.

⁶ Ka nzatá tsi nda ndiʼatá vgha ta Yawe, kul dzimbiɗaŋtá dzaʼa mista ni. Ka ŋanatá tsi ta inda zlahuha ya mnanaf Yawe ta Musa.

⁷ Ka nzatá Yawe kawadaga nda tsi. Dər nahgani kura tsi ta magay, ta katsaf katsa. Ka ganavatá tsi ta sidi ta mghama la Asur, ka kwalaghutá skwa htsiŋ da tsi.

⁸ Ka kwaraftá tsi ta la Filisti ha da Ghaza nda kwakwara ni tani, daga ma zwana luwaha, ha da luwaha ŋaŋam lu ma matsaka huzlu tani.

Klaghuta la Asur ta Samari

⁹ Ta mafwaɗa vakwa mgham Hizkiya ta gá mgham, ta nzakway ka mandəfáŋa vakwa mgham Huseya, zwaŋa Ila mghama la Israʼila, ka laf Salmanʼeser, mghama la Asur dɗanaghatá Samari ka ŋamta hesl nda vulu,

¹⁰ ta kɗavakta mahkəna vaku ka zluʼatá tsi. Tsaya mamkuʼa vakwa Hizkiya ta gá mgham, ta nzakway ka matəmbaya vakwa Huseya ta gá mgham ta ghəŋa la Israʼila.

¹¹ Ka hlaghatá mghama la Asur ta la Israʼila da Asur, ka pghatá tsi ta həŋ ma Halah nda ya ta wa zala Havur ma Guzaŋ, nda ya ma luwaha la Mediya.

¹² Magu maga manda tsaya kabga kwalaghuta taŋ ta snatá skwi mnaf Yawe, Lazglafta taŋ, ka ɓlanapta dzratá wa ni nda həŋ, nda ya kabga vəl kwalaghuta taŋ ta snata, dər ka magaŋtá slna nda inda skwiha mnaf Musa, kwalva Yawe.

Ghudzanafta Saŋheriv mghama la Asur ta la Yuda

¹³ Ta maghwaŋpəɗ fwaɗa vakwa Hizkiya ta gá mgham, ka ŋladaftá Saŋheriv, mghama la Asur dɗanaghatá inda luwaha la Yuda ŋaŋam lu ma matsaka huzlu, ka hlaghuta.

¹⁴ Ka ghunaftá Hizkiya, mghama la Yuda ta mndu da mghama la Asur ma Lahis, kaʼa mantsa: « Guv ga yu ta krughuvi! Ma ləgliɗis ka. Dər kidaghi dzaʼa tsaɗifta ka ŋa play, dzaʼa play yu, » kaʼa. Ka tsanaftá mghama la Asur ta Hizkiya, mghama la Yuda ta dzumna ka sulay kiluʼ dəmbuʼ ghwaŋ (10.000), nda dasu ka kiluʼ dəmbuʼ turtuk (1.000).

¹⁵ Ka vlaŋtá Hizkiya ta inda tsedi ma həga Yawe nda ya ma dzuguva ɗifa skwa gadghəl ma həga gá mgham.

¹⁶ Ma tsa fitik ya, ka kukluhatagatá Hizkiya ta dasu si magaf tsi ta wa tghaha nda ya ta vata wa tghaha həga Yawe, ka vlaŋtá mghama la Asur.

Dvay Saŋheriv ta la Ursalima

¹⁷ Ka ghunaftá mghama la Asur ta mali ta ghəŋa maliha sludziha, nda mali ta ghəŋa gwal ta maganatá slna, nda slufa ni daga ma Lahis kawadaga nda ndəghata gwal vulu da Ursalima ŋa vulu nda mgham Hizkiya. Lafa taŋ, ka ɓhadaghatá həŋ, ka nzaghutá həŋ ndusa nda tva saha imi ma ghwa ta kuɗuŋur ta tva dzaʼa da vwaha Gwal Ghwaɓa Lgut.

¹⁸ Ka hgə həŋ ta mgham, ka sab Iliyakim, zwaŋa Hilkiya, mali ta ghəŋa həga gá mgham, ka labi da həŋ kawadaga nda Sevna, mnda vindi, nda Yuʼah, zwaŋa Asaf mnda tskanatá ɗelewera gwaɗa ga mgham.

¹⁹ Ka slufa mghama la Asur nda həŋ mantsa: « Lawa mnanatá Hizkiya, ka kuni na: Wya ka mgham dagala, mghama la Asur mnata: Ta wu fafta ka ta ghəŋa gha tama na?

²⁰ Gwaɗa ta falak ta gwaɗ ka, ta graftá ka ná, dzaʼa mutsay ka ta hiɗaku nda mbraku ŋa vulu ra? Ta wa fafta ka ta ghəŋa gha ŋa gaɗivata gha ta sidi na?

²¹ Ndanana, faf fa ka ta ghəŋa gha ta katu da la Masar, tsa dafa zaŋwafi ta ɓlavapta ka zlaranaptá dzva inda mndu ta dihaftá vgha tida ya. Tsaya Firʼawna, mghama Masar, ŋa inda gwal ta faftá ghəŋa taŋ tida.

²² Kawayaka skwi ka kuni dzaʼazlay nda iʼi na: “Ta Yawe, Lazglafta ŋni fafta ŋni ta ghəŋa ŋni,” ka kuni. Ama vliha ni tskal tskala, nda gwirha ni ya a zaɗana Hizkiya nda mnay ŋa la Yuda nda ya ma Ursalima kazlay na: “Ta kəma na gwir ma Ursalima na dzaʼa tsəlɓa kuni ta tsəlɓu,” kəʼa ya kay wu ra?

²³ Mantsa tama, sawi da dzrafta nda rvera ɗa, mghama la Asur, dzaʼa vlagha vla yu ta plisha dəmbuʼ his (2.000) ka dzaʼa mutsay kagha ta gwal dzaʼa ŋla həŋ.

²⁴ Laviŋta a ka ta ghəzlaftá dər mali ya nda hta mataba sludziha daŋahəga ɗa wa. Waká kagha dzaʼa faftá ghəŋa gha ta la Masar ŋa mutsaftá mwataha plis nda gwal ŋa ŋla həŋ ya na?

²⁵ Tsaya a va ni wu, nda kumay Yawe a safa yu da zaɗanatá na vli na kasiʼi wa? Ka Yawe mnaɗifta na: “Ŋla liŋtá tsa haɗik ya, ka zaɗanata ka!” » kaʼa.

²⁶ Ka i Iliyakim, zwaŋa Hilkiya, nda Sevna, nda Yuʼah zlghanaftá wi ta slufa mghama la Asur mantsa: « Wya dzvu, nda gwaɗa Aram mnanata ka ta kwalvaha gha, kabga nda sna ŋni ta tsa gwaɗa ya, ma gwaɗaŋna ka nda gwaɗa Hebru. Nana mnduha ta matsak na ná, nda sana həŋ demdem, » ka həŋ.

²⁷ Ka tsa slufa mghama la Asur ya mantsa: « Ŋa daŋahəga gha, nda ya ŋa gha kweŋkweŋ ghunagaɗifta rvera ɗa da mna na gwaɗa na ra? Ŋa na mnduha ta nzaku ta wa matsak dzaʼa tsutá ghuva taŋ, nda sutá kwana taŋ na a guli wu ra? » kaʼa.

²⁸ Ka sladatá tsa slufa ya, ka gugɗatá nda lwi dagala dagala nda gwaɗa Hebru, kaʼa mantsa: « Snawa sna ta gwaɗa mgham dagala, mghama la Asur!

²⁹ Ka mgham mnata na: Ma nan Hizkiya ta kaghuni, laviŋta a ta zluʼagaptá kaghuni ma dzva ɗa wa.

³⁰ Ma hlam Hizkiya ta kaghuni ŋa faftá ghəŋ ta Yawe, nda mnay kazlay na: “Dzaʼa katay Yawe ta amu! Haɗ na luwa na dzaʼa lami da dzva mghama la Asur wu!” kəʼa ya.

³¹ Ma snə kuni ta gwaɗa Hizkiya, kabga wya ka mghama la Asur mnata: Zbawa zba ta nzata nda zɗaku nda iʼi. Saghawa sa da iʼi, dzaʼa zay dər wa ta yakwa fwa inaba ni nda ghurafa ni, dzaʼa say dər wa ta imi ma vavrəma ni.

³² Tahula tsa, dzaʼa sagha sa yu da hla kaghuni ta haɗik ya manda va ŋa ghuni, ta haɗika alkama nda ima inabi ka nunu, ta haɗika skwa zay nda fuha inabi, ta haɗika fuha zaytuŋa rɗi nda zuɗum. Dzaʼa nzay kuni ta nzakwa ghuni, rwuta a kuni wa. Ma snə kuni ta ŋa Hizkiya, kabga tiŋwa kaghuni ta tiŋwu tsi ta sana tvi nda mnay kazlay na: “Dzaʼa katay Yawe ta kaghuni,” kəʼa ya.

³³ Mamu dər wati ma lazglaftaha sana mndəra mnduha ta kəɗ klaptá haɗika ni ma dzva mghama la Asur ra?

³⁴ Ga lazglaftaha la Hamat nda ŋa la Arpat na? Ga lazglaftaha la Səfarvayim, nda ŋa la Hena, nda ŋa la Ghiva na? Zluʼap zluʼa həŋ ta Samari ma dzva ɗa ra?

³⁵ Mataba inda lazglaftaha tsa haɗikha ya, wati ya ma həŋ ta kataptá haɗika taŋ ma dzva ɗa na? Waká Yawe dzaʼa laviŋta zluʼaptá Ursalima ma dzva ɗa na? » kaʼa.

³⁶ Ama ka nzatá mnduha tsətsriɗ, pəslaf a həŋ ta wi dər teʼ wu, kabga ka mgham mnanaftá həŋ na: « Yaha kuni da zlghanaftá wa ni, » kaʼa.

³⁷ Ka vraghatá i Iliyakim, zwaŋa Hilkiya, mali ta ghəŋa həga gá mgham, nda Sevna mnda vindi, nda Yuʼah, zwaŋa Asaf mnda tskanatá ɗelewera gwaɗa ga mgham slanaghatá Hizkiya nda kwahatá lgut ta vgha, ka rusanaftá həŋ ta tsa gwaɗaha slufa mghama la Asur ya.