2Mgh 17 - Hdi

Huseya kwanaha mghama la Israʼila

¹ Ta maghwaŋpəɗ hisa vakwa Ahaz, mghama la Yuda ta pala, ka nzatá Huseya, zwaŋa Ila ka mghama la Israʼila ma Samari. Ka zatá tsi ta vaku təmbay ta gá mgham.

² Ka mag tsi ta ghwaɗaka skwi ta wa ira Yawe, ama nza a manda ŋa sanlaha ma mghamha la Israʼila ta tiŋlaghutá tsatsi wa.

³ Ka ŋladaftá Salmanʼeser, mghama la Asur dɗanaghata, ka zatá tsi ta ghwa ta ghəŋa Huseya, ka sku tsi ta htsiŋ da tsi, ka pla dzumna ŋa ni.

⁴ Ama tsatsafta mghama la Asur ta kala hiɗakwa Huseya ta ghəŋa ni nda ma ghunafta ni ta gwal ghunay da Suʼ, mghama Masar, nda ya kəʼa kwalaghuta planatá dzumna ta mghama la Asur manda ya si ta mag tsi inda vaku ya. Ka ksaftá mghama la Asur ta Huseya ka habafta nda ziɗa ma sana gamak.

⁵ Ka dɗanaghatá mghama la Asur nda vulu ta inda tsa haɗik ya, ka lagha ŋamtá Samari hesl nda vulu ka vaku hkən.

⁶ Ta matəmbaya vakwa Huseya ta pala, ka klaghutá mghama la Asur ta Samari nda vulu, ka hlaghatá la Israʼila ka vuʼa da Asur. Ka pghatá tsi ta həŋ ma Halah, nda ya ta wa zala Havur ma Guzaŋ, nda ya ma luwaha la Mediya.

Zləmbakwa gá mgham nda ga mazlay

⁷ Magu maga manda tsaya, kabga ganata la Israʼila ta dmaku ta Yawe, Lazglafta taŋ, ta hlagaptá həŋ ma haɗika Masar ma dzva Firʼawna, mghama Masar, nda ya kabga laghwa taŋ da tsəlɓu ŋa sanlaha ma lazglaftaha.

⁸ Laghu la həŋ ksa saɗa nzakwa mndəra mnduha ghəzlaf Yawe ta kəma taŋ, nda tva nzakw ta dzidzí tsatsanagha mghamha la Israʼila.

⁹ Maga maga la Israʼila ta sana skwiha ma ɗifa ma ɗifa kul raku ta kəma Yawe, Lazglafta taŋ. Dzidzihwaf dzidzihwa həŋ ta vliha tskal tskala ma inda luwaha taŋ, daga ma zwana luwaha, nduk ma luwaha ŋaŋam lu ma matsaka huzlu.

¹⁰ Dzagwa dzagwa həŋ ŋa taŋ ta skwiha dgum dguma, nda skwa wuyay Asera ta inda kuɗuŋurha tskal tskala, nda ya mista inda fuha lbuk lbukwa.

¹¹ Ka drə həŋ hada ta urdi ŋa dray nda dra ta tsa vliha tskal tskala ya manda ŋa sanlaha ma mndəra mnduha ya ghəzlaf Yawe ta kəma taŋ. Maga maga həŋ ta ghwaɗaka skwiha ta ŋlanaftá ŋuɗuf ta Yawe.

¹² Laghu la həŋ da tsəlɓu ŋa skwa wuyayha, ya si mnana Yawe ta həŋ kazlay na: « Yaha kuni da maga tsaya, » kəʼa ya.

¹³ Si tɗanaŋ tɗa Yawe ta sləməŋ ta la Israʼila nda la Yuda nda ma wa inda anabiha ni, nda inda la slayaŋ. Kaʼa nda həŋ na: « Mbəɗanawa mbəɗa ta hul ta ghwaɗaka tva ghuni, ka ŋanata kuni ta zlahuha ɗa, nda tva skwiha ŋa magay mna yu, taɓta inda zlahu ya vlaŋ yu ta dzidzíha ghuni, ka tsghaghunaftá yu nda da kwalvaha ɗa la anabi ya, » kaʼa.

¹⁴ Ama ka kwalaghutá həŋ ta snata, ka təŋanaftá həŋ ta ghəŋ manda ŋa dzidzíha taŋ ta kwalaghuta faftá ghəŋ ta Yawe, Lazglafta taŋ ya.

¹⁵ Ka pghiŋtá həŋ ta tva skwiha ŋa magay ya mna tsi, nda dzratá wi ya dzraf tsi nda dzidzíha taŋ, nda dvu ya si ta dvu tsi ŋa taŋ. Ka laghu həŋ mista skwa wuyayha kul haɗ hayhaya taŋ, ka niŋta həŋ kul haɗ hayhaya taŋ. Ka ksaftá həŋ ta saɗa nzakwa sanlaha ma mndəra mnduha ta wanafta həŋ, gwal si pyaf Yawe ta həŋ ka ksa saɗa taŋ ya.

¹⁶ Kwalaghu kwala həŋ ta sna inda zlahuha Yawe, Lazglafta taŋ. Ka tsatsaftá həŋ ta mamakwa sla his ka kfur nwap lu nda nwa, ka tsatsaftá həŋ ta skwa wuyay Asera, ka tsəlɓu həŋ ta tsəlɓu ta kəma inda skwiha ta luwa, ka mag həŋ ta slna ŋa Baghal.

¹⁷ Ka dadaraftá həŋ ta zwana taŋ nda kwagha taŋ ta vu, ka mag həŋ ta maɗəgha ɗəgha, ka vza mandaŋ. Ka vlatá hahəŋ ta ghəŋa taŋ ŋa maga ghwaɗaka skwi ta wa ira Yawe, ka gufanaftá ŋuɗuf.

¹⁸ Mantsa tama, ka gufaftá ŋuɗufa Yawe katakata ta ghəŋa la Israʼila, ka hliŋtá tsi ta həŋ diʼiŋ nda tsi. Ta ghəŋa mndəra la Yuda yeya ta pɗata.

¹⁹ Ama dər vərɗa la Yuda guli ná, ŋana a həŋ ta zlahuha Yawe, Lazglafta taŋ wa. Ka ksaftá həŋ ta saɗa tva nzaku ya nzə la Israʼila.

²⁰ Ka pghiŋtá Yawe ta zivira la Israʼila demdem, ka vraganatá həŋ, ka vlatá tsi ta həŋ ma dzva gwal ta zləɗatá mndu, ha ka hliŋtá həŋ diʼiŋ nda tsi.

²¹ Ma fitika zluʼanata Yawe ta kwakwar ta la Israʼila mista ga mghama la ga Dawuda ná, ka famtá la Israʼila ta Yaruvgham, zwaŋa Nəvat da mgham. Ka mbəɗiŋtá Yaruvgham ta la Israʼila diʼiŋ nda Yawe, ka hlamtá həŋ da mghama dmaku.

²² Ka kɗaŋta la Israʼila ta maga inda dmakuha ya maga Yaruvgham, mbəɗana a həŋ ta hul wu,

²³ ha ka ghəzliŋtá Yawe ta la Israʼila diʼiŋ ta kəma ni manda ya mna tsi nda ma wa inda kwalvaha ni la anabi. Ka hlaftá lu ta la Israʼila ta haɗika taŋ, ka hlaghata ka vuʼa da Asur ha gita.

Hladaghatá mayəmha da Samari

²⁴ Ka hlaftá mghama la Asur ta mnduha ma Babila, nda Kuta, nda Ghava, nda Hamat, nda Səfarvayim, ka hladaghatá həŋ da luwaha Samari ma vla la Israʼila. Ka nzatá Samari ka ŋa taŋ, ka nzatá həŋ ma luwaha ni.

²⁵ Tsaw ma fitika zlrafta taŋ ta nzata hada, tsəlɓa a həŋ ta tsəlɓu ŋa Yawe wa. Ka ghunadaghatá Yawe ta rveriha dika həŋ, ka pslatá ndəghata mnduha mataba taŋ.

²⁶ Ka həŋ nda mghama la Asur mantsa: « Tsa mnduha hlaf ka ta həŋ, ka pghatá lu ta həŋ ma luwaha Samari ya ná, sna a həŋ ká lu ta vla glaku ŋa lazglafta na haɗik na wa. Ka ghunadaghata tsa lazglafta ya ta rveriha dika həŋ, waʼa tsa rveriha ya ta rwa həŋ, kabga sna a həŋ ta vla glaku ŋa lazglafta na haɗik na wu, » ka həŋ.

²⁷ Ka mnaftá mghama la Asur ta zlahu, kaʼa mantsa: « Ghunawa ta sani turtuk ma gwal dra skwi ŋa Lazglafta ya hlagaghu kuni hada. Ka dzaʼa tsi nzata hada ka taghanata tsi ta həŋ ta tva vla glaku ŋa lazglafta tsa haɗik ya, » kaʼa.

²⁸ Mantsa tama, ka sliʼaftá sani turtuk ma gwal dra skwi ŋa Lazglafta ya si hlagaghu lu ta həŋ ma Samari, ka lagha tsi nzata ma Betel, ka tagha tva zləŋa Yawe ŋa taŋ.

²⁹ Kulam nda va tsa, ka tsatsaftá inda tsa mndəra mnduha ya ta lazglaftaha taŋ dgum dguma ma luwaha ta nzakw həŋ, ka paghata ma həgaha ta vliha tskal tskala babaf la Samari.

³⁰ Ka magaftá la Babila ta Sukutʼbənut dgum, ta magaftá la Kuta ta skwa wuyay Nergal, ta magaftá la Hamat ta Asima,

³¹ ta magaftá la Ghava guli ta Nivhaz nda Tartak. Dra zwani ta vu ŋa la Səfarvayim ŋa vlaŋtá sgit ta Adramelek nda Ghanamelek, lazglaftaha la Səfarvayim.

³² Ka tsəlɓu tsa mnduha ya guli ta tsəlɓu ŋa Yawe. Ka zabaptá həŋ mataba mnduha taŋ ta gwal dra skwi ŋa lazglafta ta vliha tskal tskala. Ka mag tsa gwal dra skwi ŋa lazglafta ya ta slna ma tsa həgaha ta vliha tska tskala ya.

³³ Mantsa tama, ta tsəlɓay tsəlɓay həŋ ta tsəlɓu ŋa Yawe, ta dzaʼa nda maganatá slna həŋ ta lazglaftaha taŋ manda tva nzakwa mnduha ta dzidza taŋ ta tsa haɗik hlagap lu ta həŋ mida ya.

³⁴ Ha gita, ka mag həŋ taɓta tsa tva maga skwi ta mag həŋ ghalya ya. Tsəlɓa a həŋ ta tsəlɓu ŋa Yawe wa. Maga a həŋ taɓta skwi ta mag həŋ nda tva skwi ŋa magay, dər zlahu ya vlaŋ Yawe ta zivira Yakubu, ya tsanaf tsi ta hgu ka Israʼila ya wa.

³⁵ Dzraf dzra Yawe ta wi nda həŋ, ka mnanaftá tsi ta tsa zlahu ya ta həŋ: « Yaha kuni da zləŋa sanlaha ma lazglaftaha, yaha kuni da tsəlɓu ta kəma taŋ, yaha kuni da maganatá slna ta həŋ, yaha kuni da pla ghəŋ ŋa taŋ,

³⁶ ama Yawe ta hlagaghunapta ma haɗika Masar nda tɗatá dzva ni ta mbruta yeya dzaʼa kuni da zləŋay. Ta kəma ni dzaʼa tsəlɓa kuni ta tsəlɓu. Ŋa ni dzaʼa pla kuni ta ghəŋ.

³⁷ Ka ŋanata kuni inda fitik ta skwiha ta raku mnaghuna tsi, nda tva skwiha ŋa magay, nda zlahu ya vindaghunaf tsi. Yaha kuni da zləŋa sanlaha ma lazglaftaha.

³⁸ Yaha kuni da zanapta dzratá wa ɗa nda kaghuni. Yaha kuni da zləŋa sanlaha ma lazglaftaha,

³⁹ ama Yawe, Lazglafta ghuni dzaʼa kuni da zləŋay. Tsatsi dzaʼa kataptá kaghuni ma dzva inda ghumaha ghuni, » kaʼa.

⁴⁰ Ama ka kwalaghutá həŋ ta snata. Ka kɗaŋtá həŋ ta magaku taɓta ya snu həŋ ta dzidza taŋ.

⁴¹ Mantsa tama, ka tsəlɓu mndəra tsa mnduha ya ta tsəlɓu ŋa Yawe ta dzaʼa həŋ nda tsəlɓu ŋa tsatsatá skwa wuyayha taŋ. Ka kɗaŋtá zwana taŋ nda zighiha taŋ ta magay ha gita manda va ŋa dzidzíha taŋ.