2Mgh 16 - Hdi

Gá mghama Ahaz ma Yuda

¹ Ta maghwaŋpəɗ ndəfáŋa vakwa Peka, zwaŋa Rəmalya ta pala, ka nzatá Ahaz, zwaŋa Yutam, ka mghama la Yuda.

² Hisambsak ima Ahaz ta nzatá tsi ka mgham, ka zatá tsi ta vaku ghwaŋpəɗ mkuʼ ta gá mgham ma Ursalima. Maga a tsatsi ta skwi tɗukwa ta wa ira Yawe, Lazglafta ni, manda ya maga dzidza ni Dawuda ya wa.

³ Ama tva mghamha la Israʼila ksaf tsatsi, ha ka draftá tsi ta zwaŋa ni ka skwa pla ghəŋ, taɓta manzakɗawayha maga mndəra mnduha ya ghazliŋ Yawe ta kəma la Israʼila.

⁴ Ka vlə tsi ta skwa pla ghəŋ nda urdi ŋa dray nda dra ta vliha tskal tskala ta kuɗuŋurha, nda ya mista inda fuha lbuk lbukwa.

⁵ Ka ŋladaftá i Rətsiŋ, mghama la Aram, nda Peka, zwaŋa Rəmalya, mghama la Israʼila liŋtá Ursalima nda vulu. Ka ŋamtá həŋ, ama ka traptá həŋ ta zatá ghwa nda vulu ta ghəŋa mgham Ahaz.

⁶ Ma va tsa fitik ya, ka zluʼaghutá Rətsiŋ, mghama la Aram ta luwa Ilat, ka ghəzlaptá la Yuda mida. Ka lagha la Idum nzata ma Ilat, ta hada həŋ ha gita.

⁷ Ka ghunaftá Ahaz ta gwal ghunay da Tiglatʼpilʼeser, mghama la Asur ŋa mnanata, kaʼa mantsa: « Kwalva gha yu, zwaŋa gha yu. Saf sa ka katapta ka ta iʼi ma dzva mghama la Aram, nda ya ma dzva mghama la Israʼila, liɗiva la həŋ nda vulu, » kaʼa.

⁸ Ka hlaftá Ahaz ta tsedi nda dasu ma həga Yawe nda ya ma dzuguva ɗifa skwa gadghəla ma həga gá mgham, ka tsghafta ka mbəhu ŋa mghama la Asur.

⁹ Ka snanatá mghama la Asur, ka laf tsi dɗanaghatá Damas ka klaghuta. Ka dzatá tsi ta mgham Rətsiŋ, ka hlaghatá tsi ta la Damas da Kir.

¹⁰ Ka lagha mgham Ahaz da Damas da guyaku nda Tiglatʼpilʼeser, mghama la Asur. Nghaŋta ni ta gwir si ma Damas, ka tsəghanaftá tsi ta Uriya mnda dra skwi ŋa Lazglafta ta tsatá tsa gwir ya nda tva bata ni.

¹¹ Ka dzihwaftá Uriya, mnda dra skwi ŋa Lazglafta ta gwir, taɓta ya mnanaf mgham Ahaz ta tsghədanapta daga ma Damas ya. Ka kɗiŋtá tsi ta magafta makəɗ mgham vrakta ma Damas.

¹² Vragaghata mgham ma Damas, ka nghaŋtá tsi ta gwir, ka gavadaghatá tsi ta vata ni, ka ŋladafta tida.

¹³ Ka draftá tsi ta pla ghəŋ ŋa dray tsuh tsuh, nda mbəha nimaya tida, slranafha ta skwa slray, wutsikafha ta gwir ta usa skwa pla ghəŋha zɗaku.

¹⁴ Tahula tsa, ka klaftá tsi ta gwira ghuva tili si ta kəma Yawe, ma vla ni ta kəma həga Yawe, ma takataka tsa lfiɗa gwira ni nda tsa həga ya, ka fatá tsi ta slərpu nda təv mazlaya tsa lfiɗa gwira ni ya.

¹⁵ Ka mgham Ahaz mnanaftá Uriya, mnda dra skwi ŋa Lazglafta mantsa: « Ka drafta ka ta gwir dagala ta skwa pla ghəŋ ŋa dray tsuh tsuh ŋa ga sərɗək, nda mbəha nimaya ŋa ga hawu, nda skwa pla ghəŋ ŋa dray tsuh tsuh, nda mbəha nimaya ka ŋa mgham, nda skwa pla ghəŋ ŋa dray tsuh tsuh, nda mbəha nimaya, nda skwiha ŋa slranata ka ŋa inda mnduha ta na haɗik na. Ka wutsikafta ka tida ta usa inda skwa pla ghəŋ ŋa dray tsuh tsuh, nda usa inda skwiha ŋa pla ghəŋ. Skwi ya ta nghanatá gwira ghuva tili ya, iʼi dzaʼa ngha gwaɗa tida, » kaʼa.

¹⁶ Ka magatá Uriya, mnda dra skwi ŋa Lazglafta ta inda tsa skwiha mnanaf mgham Ahaz ya.

¹⁷ Ka dzaɓanaptá mgham Ahaz ta kəslambatsha ameleŋkiha, hlaha ta glifiŋha ta həŋ. Ka klagatá tsi ta glifiŋ dagala si ta lghəŋha ka ghuva tili ya, ka fata ta dzəɓatá vli nda pala.

¹⁸ Ka kliŋtá tsi dabga mghama la Asur ta rmak ta wa tgha fitika Sabat ma həga Yawe, ya si baf lu nda ma bli ka tva lama mgham.

¹⁹ Pɗakwa slnaha Ahaz nda inda skwiha ya maga tsi ná, vivindam vivinda lu ma ɗelewera vinda slnaha mghamha la Yuda.

²⁰ Ka laghu Ahaz da dzidzíha ni, ka paɗamtá lu ta vata dzidzíha ni ma luwa Dawuda. Ka lam zwaŋa ni Hizkiya da gá mgham ma vla ni.