2Mgh 15 - Hdi

Gá mghama Ghazaryahu ma Yuda

¹ Ta mahisambsak ndəfáŋ mida vakwa Yaruvgham ta gá mgham ta ghəŋa la Israʼila, ka nzatá Ghazariya, zwaŋa Amatsiya ka mghama la Yuda.

² Ghwaŋpəɗ mkuʼ ima ni ta nzatá tsi ka mgham. Ka zatá tsi ta vaku hutaf mbsak his mida ta gá mgham ma Ursalima. Yəhulyahu hga ma ni, makwa la Ursalima.

³ Ka mag Ghazaryahu ta skwi tɗukwa ta wa ira Yawe manda va ya si maga da ni, Amatsiya.

⁴ Kulam nda tsa, hlu a vliha tskal tskala wa. Ka gɗatá mnduha ta pla ghəŋ nda dra urdi ŋa dray nda dra ta tsa vliha tskal tskala ya.

⁵ Ka dzuŋtá Yawe ta mgham, ka nzakw tsi nda ghwaɗaka lku tida ha ka mtata ni. Ka nzata tsi nda ghəŋa ni ma sana həga kətsaʼu, ka ŋə zwaŋa ni Yutam mali ta ghəŋa həga gá mgham ta mnduha ta tsa haɗik ya.

⁶ Pɗakwa slnaha Ghazaryahu ta magatá, nda inda skwiha ya hɗam tsi ná, vivindam vivinda lu ma ɗelewera vinda slnaha mghamha la Yuda.

⁷ Ka laghu Ghazariya da dzidzíha ni, ka paɗamtá lu ta vata dzidzíha ni ma luwa Dawuda. Ka lam zwaŋa ni Yutam da gá mgham ma vla ni.

Gá mghama Zakari ma Israʼila

⁸ Ta mahkən mbsak tghas mida vakwa Ghazaryahu, mghama la Yuda ta pala, lama Zakari, zwaŋa Yaruvgham da gá mgham ta ghəŋa la Israʼila ma Samari. Ka zatá tsi ta tili mkuʼ ta gá mgham.

⁹ Ka mag tsi ta ghwaɗaka skwi ta wa ira Yawe manda ya maga dzidzíha ni. Mbəɗana a ta hul ta dmakuha Yaruvgham, zwaŋa Nəvat ta hlamtá la Israʼila da gatá dmaku ya wa.

¹⁰ Ka kalaftá Salum zwaŋa Yaves ta hiɗakwa ni, ka dzuŋta ta kəma mnduha, ka dzata. Ka nzatá tsi ka mgham ma vla ni.

¹¹ Pɗakwa slnaha Zakari ta magata ná, vivindam vivinda lu ma ɗelewera vinda slnaha mghamha la Israʼila.

¹² Manda tsaya hɗamta gwaɗa Yawe ta mnanatá Yehu kazlay na: « Dzaʼa gay zivira gha ta mgham ta ghəŋa la Israʼila ha ka labi ta zigha mafwaɗ, dzaʼa nzaf nza həŋ ta dughurukwa ga mgham, » kəʼa ya.

Gá mghama Salum ma Yuda

¹³ Ta mahkən mbsak təmbay mida vakwa Ghuziya ta gá mgham ta ghəŋa la Yuda, lama Salum, zwaŋa Yaves da gá mgham. Ka zatá tsi ta tili ta gá mgham ma Samari.

¹⁴ Ka saf Mənahem, zwaŋa Gadi ma Tirtsa, ka lagha da Samari, ka dzatá Salum, zwaŋa Yaves. Ka nzatá tsi ka mgham ma vla ni.

¹⁵ Pɗakwa slnaha Salum, nda kala hiɗaku ya payaf tsi, vivindam vivinda lu ma ɗelewera vinda slnaha mghamha la Israʼila.

¹⁶ Ma tsa fitik ya sliʼafta Mənahem ma Tirtsa ka laf liŋtá Tifsah nda vulu. Ka zaɗanatá inda gwal mida, nda kwakwara ni tani, kabga kwala taŋ ta tsuʼafta. Ka tatanaptá tsi ta huɗa miʼaha nda huɗi.

Gá mghama Mənahem ma Israʼila

¹⁷ Ta mahkən mbsak təmbay mida vakwa Ghazariya, mghama la Yuda ta pala, ka nzatá Mənahem, zwaŋa Gadi ka mgham ta ghəŋa la Israʼila. Ka zatá tsi ta vaku ghwaŋ ta gá mgham ma Samari.

¹⁸ Ka mag tsi ta ghwaɗaka skwi ta wa ira Yawe. Ma nzakwa ni nda hafu, mbəɗana a ta hul ta dmakuha Yaruvgham, zwaŋa Nəvat, ta hlamtá la Israʼila da ga dmaku ya wa.

¹⁹ Ka lagha Pul, mghama la Asur zlaganavatá haɗika la Israʼila. Ka vlaŋtá Mənahem ta kfura tsedi ta Pul ka kiluʼ dəmbuʼ hkən mbsak fwaɗ mida (34.000), ŋa kataŋta ma dihanatá gá mghama ni.

²⁰ Kəl lu ka mutsaftá tsa tsedi ya ná, Mənahem ta mnaftá tska dzumna da la Israʼila ka gadghəl ka gadghəl, ka kfura tsedi hutaf mbsak ta mndu turtuk, ŋa vlaŋtá mghama Asur. Ka zlaŋtá mghama Asur ta haɗika Israʼila ka vraghuta ta haɗika ni.

²¹ Pɗakwa slnaha Mənahem nda inda skwi ya maga tsi ná, vivindam vivinda lu ma ɗelewera vinda slnaha mghamha la Israʼila.

²² Ka laghu Mənahem da dzidzíha ni. Ka lam zwaŋa ni Pəkahiya da gá mgham ma vla ni.

Gá mghama Pəkahiya ma Israʼila

²³ Ta mahutaf mbsaka vakwa Ghazariya, mgham la Yuda ta pala, lama Pəkahiya, zwaŋa Mənahem da gá mgham ta ghəŋa la Israʼila ma Samari. Ka zatá tsi ta vaku his ta gá mgham.

²⁴ Ka mag tsi ta ghwaɗaka skwi ta wa ira Yawe. Mbəɗana a ta hul ta dmakuha Yaruvgham, zwaŋa Nəvat, ta hlamtá la Israʼila da ga dmaku ya wa.

²⁵ Ka kalanavatá Peka, zwaŋa Rəmalya mala gwal vula ni ta hiɗaku kawadaga nda la Gilghat hutaf mbsak, ka dzata ma Samari, ma dzuguvi ma matsaka huzlu ma həga gá mgham kawadaga nda i Arguv nda Ariye. Mantsa ya kəʼa dzatá Pəkahiya, ka nzatá tsi ka mgham ma vla ni.

²⁶ Pɗakwa slnaha Pəkahiya nda inda skwiha ya maga tsi ná, vivindam vivinda lu ma ɗelewera vinda slnaha mghamha la Israʼila.

Gá mghama Peka ma Israʼila

²⁷ Ta mahutaf mbsak his mida vakwa Ghazariya, mghama la Yuda ta pala, lama Peka, zwaŋa Rəmalya da gá mgham ta ghəŋa la Israʼila ma Samari. Ka zatá tsi ta vaku hisambsak.

²⁸ Ka mag tsi ta ghwaɗaka skwi ta wa ira Yawe. Mbəɗana a ta hul ta dmakuha Yaruvgham, zwaŋa Nəvat, ta hlamtá la Israʼila da ga dmaku ya wa.

²⁹ Ma fitika gay Peka ta mgham ta ghəŋa la Israʼila, ka sagha Tiglatʼpilʼeser, mghama Asur da klaghutá Ghiyuŋ, nda Avelbetʼmaghaka, nda Yanuwah, nda Kedes, nda Hatsur, nda kwakwara Gilghat, nda Galili, nda Naftali, ka hlaghatá tsi ka vuʼa ta mnduha taŋ da Asur.

³⁰ Ka kalaftá Huseya, zwaŋa Ila ta hiɗaku ta ghəŋa Peka, zwaŋa Rəmalya, ka dzata. Ka nzatá tsi ka mgham ma vla ni ta mahisambsaka vakwa Yutam, zwaŋa Ghuziya ta pala.

³¹ Pɗakwa slnaha Peka nda inda skwiha ya maga tsi ná, vivindam vivinda lu ma ɗelewera vinda slnaha mghamha la Israʼila.

Gá mghama Yutam ma Yuda

³² Ta mahisa vakwa Peka, zwaŋa Rəmalya, mghama la Israʼila ta pala, lama Yutam, zwaŋa Ghuziya da gá mgham ta ghəŋa la Yuda.

³³ Hisambsak hutaf mida ima ni ta nzatá tsi ka mgham. Ka zatá tsi ta vaku ghwaŋpəɗ mkuʼ ta pala ma Ursalima. Yərusa hga ma ni, makwa Tsaduk.

³⁴ Ka mag tsi ta skwi tɗukwa ta wa ira Yawe, manda va ya si maga da ni Ghuziya.

³⁵ Kulam nda tsa, hlu a vliha tskal tskala wa. Ka gɗatá mnduha ta pla ghəŋ nda dra urdi ŋa dray nda dra ta tsa vliha tskal tskala ya. Tsatsi ta baftá wa tgha həga Yawe ma tsa vli ta slruta ya.

³⁶ Pɗakwa slnaha Yutam nda inda skwiha ya maga tsi ná, vivindam vivinda lu ma ɗelewera vinda slnaha mghamha la Yuda.

³⁷ Ma tsa fitik ya, ka zlraftá Yawe ta ghuna Rətsiŋ, mghama la Aram, nda Peka, zwaŋa Rəmalya dika la Yuda.

³⁸ Ka laghu Yutam da dzidzíha ni, ka paɗamtá lu ta vata dzidzíha ni ma luwa dzidza ni Dawuda. Ka lam zwaŋa ni Ahaz da gá mgham ma vla ni.