2Mgh 14 - Hdi

Gá mghama Amatsiya ma Yuda

¹ Ta mahisa vakwa Yəhuwas, zwaŋa Yuʼahaz, ta gá mgham ta ghəŋa la Israʼila, ka nzatá Amatsiya, zwaŋa Yuʼas, ka mghama la Yuda.

² Hisambsak hutaf mida ima ni ta nzatá tsi ka mgham. Hisambsak təmbay mida vakwa ni ta gá mgham ma Ursalima. Yəhughadaŋ hga ma ni, si ma Ursalima.

³ Ka mag tsi ta skwi tɗukwa ta wa ira Yawe, ama klaf a ta ŋa dzidza ni Dawuda wa. Ka ksaftá tsi ta saɗa da ni Yuʼas ma inda skwi.

⁴ Kulam nda tsa, hlu a vliha tskal tskala wa. Ka gɗatá mnduha ta pla ghəŋ, nda dra urdi ŋa dray nda dra ta tsa vliha tskal tskala ya.

⁵ Nghanata ni ta dihatá gá mgham ma dzva ni, ka pslatá tsi ta tsa kwalvaha ta dzatá da ni, mgham Yuʼas ya.

⁶ Ama psla a ta zwana taŋ manda ya nda vinda ma deftera zlaha Musa wu, ka tsa zlaha Yawe ya mnafta na: « Pslata a lu ta dadaha dabga dmakwa zwana taŋ wa. Pslata a lu ta zwani dabga dmakwa dadaha taŋ wa. Dər wa ta gatá dmaku, tsatsi dzaʼa dzata lu, » kəʼa ya.

⁷ Ka rwanatá Amatsiya ta la Idum dəmbuʼ ghwaŋ (10.000) ma didiŋa Slughul. Ma tsa vulu ya, ka klaghutá tsi ta Sela, ka tsanaftá tsi ta hgu ka Yukteʼel, ka nzakw tsa hgu ya ha gita.

⁸ Ka ghunaftá Amatsiya ta gwal ghunay da Yəhuwas, zwaŋa Yəhuʼahaz, zigha Yehu, mghama la Israʼila, kaʼa mantsa: « Sawi ka guyavata u nda vulu! » kaʼa.

⁹ Ka ghunaftá Yəhuwas, mghama la Israʼila ta mndu ŋa mnay ŋa Amatsiya, mghama la Yuda, kaʼa mantsa: « Ma sana fitik, ka teka madzafdzafa la Ləvanuŋ ghunaftá mndu da mghama fwa sedra la Ləvanuŋ na: “Vlaŋ vla ta makwa gha ta zwaŋa ɗa ka markwa taŋ,” kaʼa. Ama ka lagha nimtaka la Ləvanuŋ da ŋalafta ta teka madzafdzaf.

¹⁰ Mantsa nzakwa ni, zaza ka ta la Idum, ka vlaghatá tsaya ta gla ghəŋ. Ghubara ta ghəŋa gha, ka nzata ka mintgha gha. Kabgawu dzaʼa famta ka ta ghəŋa gha da slna tulekaku ya dzaʼa klaghaktá zaɗaku, nda la Yuda tani na? » kaʼa.

¹¹ Ama ka kwalaghutá Amatsiya mghama la Yuda ta snay, ka laf Yəhuwas, mghama la Israʼila. Ka guyatá tsa mghamha his ya nda vulu ma Betʼsemes luwa la Yuda.

¹² Ka zunustá sludziha la Israʼila ta ghuvi ta sludziha la Yuda, ka hwayaghutá sludziha la Yuda dər wa dzagha ni.

¹³ Ka ksutá Yəhuwas, mghama la Israʼila ta Amatsiya, zwaŋa Yuʼas, zigha Ahaziya, mghama la Yuda ma Betʼsemes ka vuʼa. Ka lagha Yəhuwas da Ursalima, ka kuhwaptá matsaka Ursalima ka mitər his dərmək (200), daga ta wa tgha Ifrayim ha ta wa tgha Tuldi.

¹⁴ Ka hlaghatá tsi ta inda dasu, nda tsedi, nda inda huzla ma həga Yawe, nda ya ma dzuguva ɗifa skwa gadghəl ma həga gá mgham. Ka kasaghatá tsi guli ta sanlaha ma mnduha ŋa vara həŋ nda vara, ka vraghatá tsi da Samari.

¹⁵ Pɗakwa slnaha Yəhuwas ya hɗam tsi, nda mbrakwa vulu ya vulu tsi nda Amatsiya, mghama la Yuda ná, vivindam vivinda lu ma ɗelewera vinda slnaha mghamha la Israʼila.

¹⁶ Ka laghu Yəhuwas da dzidzíha ni, ka paɗamtá lu ma Samari ta vata mghamha la Israʼila. Ka lam zwaŋa ni Yaruvgham da gá mgham ma vla ni.

¹⁷ Ka zatá Amatsiya, zwaŋa Yuʼas, mghama la Yuda ta vaku ghwaŋpəɗ hutaf tahula mtatá Yəhuwas, zwaŋa Yəhuʼahaz, mghama la Israʼila.

¹⁸ Pɗakwa slnaha Amatsiya ná, vivindam vivinda lu ma ɗelewera vinda slnaha mghamha la Yuda.

¹⁹ Ka dzraftá lu ta wi má ŋa dzata ma Ursalima, ka hwayaghatá tsi da Lahis. Ama ka ghunaftá lu ta mnduha da zbiŋta ma Lahis, ka dzatá lu hada.

²⁰ Ka vradanaghatá lu ta mbla ni ta plis, ka paɗamta ma Ursalima ta vata dzidzíha ni ma luwa Dawuda.

²¹ Ka klaftá inda la Yuda ta Ghazariya, ka famta ka mgham ma vla da ni Amatsiya, ghwaŋpəɗ mkuʼ ima ni.

²² Tahula laghwa mgham Amatsiya da dzidzíha ni, tsatsi ta zluʼaktá ta luwa Ilat, ka vlaŋtá gá mghama la Yuda, ka ghayafta.

Gá mghama mahisa Yaruvgham ma Israʼila

²³ Ta maghwaŋpəɗ hutafa vakwa Amatsiya, zwaŋa Yuʼas, ta gá mgham ta ghəŋa la Yuda, ka nzatá Yaruvgham, zwaŋa Yəhuwas ka mghama la Israʼila ma Samari. Ka zatá tsi ta vaku fwaɗ mbsak ndeŋ mida ta ga mgham.

²⁴ Ka mag tsi ta ghwaɗaka skwi ta wa ira Yawe. Mbəɗana a ta hul ta dmakuha Yaruvgham, zwaŋa Nəvat ta hlamtá la Israʼila da ga dmaku ya wa.

²⁵ Tsatsi ta vranaktá herhera kwakwara la Israʼila, daga ma Levuʼhamat ha da drəfa Gharava taɓta gwaɗa Yawe, Lazglafta la Israʼila ya ta mnata nda ma wa kwalva ni anabi Yunusa, zwaŋa Amitay mnda la Gatʼhefer ya.

²⁶ Nghay Yawe ta tulekata la Israʼila katakata ka malaghutá mbraku, haɗ mndu da həŋ dər ka vuʼa, dər ya nda pla vgha ni wu, ta ghuya ɗaŋwa həŋ demdem. Haɗ mndu ŋa kataŋtá həŋ wa.

²⁷ Kura a Yawe ta hərɗiŋtá hga la Israʼila ta ghəŋa haɗik wa. Mantsa tama, ka kataftá tsi ta həŋ nda ma dzva Yaruvgham, zwaŋa Yəhuwas.

²⁸ Pɗakwa slnaha Yaruvgham ta magata, nda inda skwiha ya hɗam tsi, nda mbrakwa vuluha vulu tsi, nda ya kəʼa vraganaghata dista gá mghama la Israʼila ta luwaha Damas nda Hamat, luwaha si ta nzakway da la Yuda ná, vivindam vivinda lu ma ɗelewera vinda slnaha mghamha la Israʼila.

²⁹ Ka laghu Yaruvgham da dzidzíha ni, ka lamtá lu ta vata mghamha la Israʼila. Ka lam zwaŋa ni Zakari da gá mgham ma vla ni.