2Mgh 13 - Hdi

Gá mghama Yəhuʼahaz ma Israʼila

¹ Ta mahisambsak hkən mida vakwa Yuʼas, zwaŋa Ahaziya, ta ga mgham ta ghəŋa la Yuda, ka lam Yəhuʼahaz, zwaŋa Yehu da gá mgham ta ghəŋa la Israʼila ma Samari. Ka zatá tsi ta vaku ghwaŋpəɗ ndəfáŋ ta pala.

² Ka mag tsi ta ghwaɗaka skwi ta wa ira Yawe. Ka ksaftá tsi ta saɗa dmakuha Yaruvgham, zwaŋa Nəvat ya ta hlamtá la Israʼila da ga dmaku ya. Mbəɗana a ta hul ta tsa ghwaɗaka tvi ya wa.

³ Ka gufaftá ŋuɗufa Yawe ta ghəŋa la Israʼila, ka va vlə tsi ta həŋ ma dzva Hazaʼel, mghama la Aram, nda ya ma dzva Benʼhadat, zwaŋa Hazaʼel.

⁴ Ama ka taw Yəhuʼahaz ta taw da Yawe. Ka zlghanaftá Yawe ta tawa ni, kabga nda ngha ká mghama la Aram ta rəha la Israʼila.

⁵ Ka vlaŋtá Yawe ta la Israʼila ta mnda mba həŋ. Ka zluʼaptá la Israʼila ta vgha ma dzva la Aram. Daga ma tsa fitik ya, ka nzakw həŋ ta nzakwa taŋ ləŋləŋ manda ya si ghalya.

⁶ Kulam nda tsa, ta mbəɗana a həŋ ta hul ta dmakwa la ga Yaruvgham ta hlamtá la Israʼila da ga dmaku ya wa. Ka gɗavatá həŋ ta tsa tvi ya, ka zlanatá həŋ ta skwa wuyay Asera ma Samari.

⁷ Haɗ skwi ta pɗata ka ŋa Yəhuʼahaz wu, ta ghəŋa gwal ŋla plis hutaf mbsak, nda mwata plis ghwaŋ, nda sludziha nda səla dəmbuʼ ghwaŋ (10.000) yeya, kabga rwana rwa mghama la Aram ta həŋ, ka niŋtá həŋ manda gninika haɗik ta ŋalaku lu tida ya.

⁸ Pɗakwa slnaha Yəhuʼahaz, nda inda skwi hɗam tsi, nda mbrakwa gá mghama ni ná, vivindam vivinda lu ma ɗelewera vinda slnaha mghamha la Israʼila.

⁹ Ka laghu Yəhuʼahaz da dzidzíha ni, ka paɗamtá lu ma Samari. Ka lam zwaŋa ni Yəhuwas da gá mgham ma vla ni.

Gá mghama Yəhuwas ma Israʼila

¹⁰ Ta mahkən mbsak ndəfáŋ mida vakwa Yuʼas ta gá mgham ta ghəŋa la Yuda, ka lam Yəhuwas, zwaŋa Yəhuʼahaz da gá mgham ta ghəŋa la Israʼila ma Samari. Ka zatá tsi ta vaku ghwaŋpəɗ mkuʼ ta gá mgham.

¹¹ Ka mag tsi ta ghwaɗaka skwi ta wa ira Yawe. Mbəɗana a ta hul ta inda dmakuha Yaruvgham, zwaŋa Nəvat, ta hlamtá la Israʼila da ga dmaku ya wa. Ka dzaʼa tsi ta kəma ta kəma ta tsa tvi ya.

¹² Pɗakwa slnaha Yəhuwas, nda inda skwi ya hɗam tsi, nda mbrakwa ni, nda vulu ya vulu tsi nda Amatsiya, mghama la Yuda ná, vivindam vivinda lu ma ɗelewera vinda slnaha mghamha la Israʼila.

¹³ Ka laghu Yəhuwas da dzidzíha ni, ka nzaftá Yaruvgham ta dughurukwa ga mghama ni. Ka paɗamtá lu ta Yəhuwas ma Samari ta vata mghamha la Israʼila.

Mtakwa Ilisa

¹⁴ Ka ksaftá ɗaŋwa ta Ilisa drəsl ŋa mtaku, ka laha Yəhuwas, mghama la Israʼila da tsi, ka taw tsi ta taw ta ghəŋa ni, kaʼa nda tsi mantsa: « A da ɗa! A da ɗa! Mwata plisha, nda gwal ŋla plisha la Israʼila! » kaʼa.

¹⁵ Ka Ilisa nda tsi mantsa: « Klaf kla ta lgheɗ nda havaha! » kaʼa. Ka klaftá mgham ta lgheɗ nda havaha.

¹⁶ Ka Ilisa nda mghama la Israʼila mantsa: « Tɗap tɗa ta lgheɗ nda dzva gha, » kaʼa. Ka tɗaptá tsi, ka pghaftá Ilisa ta dzvuha ni ta dzvuha mgham,

¹⁷ kaʼa mantsa: « Guniŋ guna ta finitir nda təv safa fitik, » kaʼa. Ka guniŋtá Yəhuwas. Ka Ilisa mantsa: « Hiŋha! » kaʼa. Ka hiŋtá tsi. Ka Ilisa mantsa: « Hava zatá ghwa Yawe tsaya, hava zatá ghwa ta ghəŋa la Aram. Dzaʼa rwana rwa ka ta la Aram ma Afek ha ŋa zaɗanata gha ta həŋ nekwnekw, » kaʼa.

¹⁸ Ka Ilisa nda tsi guli mantsa: « Hlaf hla ta havaha, » kaʼa. Ka hlaftá mghama la Israʼila. Ka Ilisa nda tsi mantsa: « Hahada haha ta haɗik, » kaʼa. Ka hahadatá tsi ta haɗik hkən səla, kada sladaghuta.

¹⁹ Ka ɓasanavatá mnda Lazglafta ta ŋuɗuf, kaʼa mantsa: « Má hutaf səla ka má mkuʼ səla a tsi má hahadata ka, ma dzaʼa zaza ka ta la Aram ha ka zaɗanatá həŋ. Ama ndanana, hkən səla dzaʼa zata ka ta həŋ, » kaʼa.

²⁰ Ka mtutá Ilisa, ka paɗamtá lu. Inda vaku ta sliʼadamtá bakuha gwal zləɗa la Muwav ta haɗika la Israʼila.

²¹ Ma sana fitik, ta paɗay paɗay mnduha ta sana mndu, ka nghaŋtá lu ta ya turtuk ma tsa bakuha gwal zləɗu ya. Ka vzadatá lu ta tsa mndu ya ta hwaya ta hwaya da kula Ilisa. Ka lagha tsi ksaŋtá ghudzifa Ilisa, gi ka vramtá tsi, ka sladata nda səla ni.

Hlaghuta Yəhuwas ta ndəghata luwaha da la Aram

²² Si nzanagha nza Hazaʼel, mghama la Aram ta la Israʼila ma nzakwa Yəhuʼahaz ta gá mgham.

²³ Ama ka zɗanaŋtá Yawe ta huɗi ta la Israʼila, ka tawatá hiɗahiɗa ta həŋ, ka mbəɗaghuta mista taŋ dabga dzratá wa ni nda Abraham, nda Izak, nda ya nda Yakubu. Va a ta zaɗanatá həŋ wu, vziŋ a ta həŋ diʼiŋ nda tsi wa.

²⁴ Ka mtutá Hazaʼel, mghama la Aram. Ka lam zwaŋa ni Benʼhadat da gá mgham ma vla ni.

²⁵ Ka hləglaghutá Yəhuwas, zwaŋa Yəhuʼahaz ta luwaha ma dzva Benʼhadat, zwaŋa Hazaʼel, luwaha si hlaghu Hazaʼel ma dzva da ni Yəhuʼahaz nda vulu ya. Hkən səla zatá Yəhuwas ta Benʼhadat, ka hlaghutá luwaha la Israʼila da tsi.