2Mgh 11 - Hdi

Gá mghama Ghataliya ma Yuda

¹ Nghay Ghataliya, ma ni ma Ahaziya ta mtatá zwaŋa ni, ka kurata tsa marakw ya ta zaɗanatá inda zwani ga mgham.

² Ka klaftá Yehuseva, makwa mgham Yəhuram, makuma ni ma Ahaziya ta Yuʼas, zwaŋa Ahaziya mataba zwana mgham ta rwu lu ta həŋ ya, ka laghu da ɗifanata kawadaga nda mata gla ni ma sana dzuguva pgha ghəzləŋ ma həga Lazglafta. Mantsa ya ɗifanatá lu ta wa ira Ghataliya, dzaʼa lu ta tsatsi wa.

³ Ka zata tsi ta vaku mkuʼ ta ɗifa ma həga Yawe kawadaga nda mata gla ni, ta gay gay Ghataliya ta mgham ta tsa haɗik ya.

Famtá Yuʼas da mgham

⁴ Ta mandəfáŋa vaku, ka ghunaftá Yəhuyada ta mndu ŋa hagadaghata maliha ta ghəŋa gwal vulu dərmək dərmək (100) da la Kari, nda sanlaha ma gwal ta nghapta ga mgham. Ka hagadaghatá tsi ta həŋ da tsi ma həga Yawe. Ka dzraftá tsi ta wi nda həŋ, nda ma waɗata ma huɗa həga Yawe. Ka maranaŋtá tsi ta həŋ ta zwaŋa mgham.

⁵ Tahula tsa, kaʼa mnanaftá həŋ mantsa: « Wya skwi dzaʼa kuni da magay baɗ sagha ghuni da slna baɗ sabat ŋa za luma: Ka dagavapta kuni ka ŋəva hkən. Taŋtaŋa ŋəva dzaʼa nghapta ka həga ga mgham.

⁶ Ka nzata mahisa ŋəva ta wa tgha ta hgə lu ka Sur, ta nzatá mahkəna ŋəva guli ta wa tgha nda ta hula tsa gwal ta nghapta ka həga ga mgham ya. Ka mbaɗa kuni ta vgha ŋa nghapta ka həga.

⁷ Tsa sana ŋəvaha his dzaʼa sliʼapta ma slna ma baɗ Sabat ya ná, tsaha ya dzaʼa ngha mgham ma həga Yawe.

⁸ Ka wanafta kuni ta mgham dendesl, inda kaghuni nda huzla vulu ma dzvu, ka pgha kuni ta mgham da inda vli ta dzaʼa tsi. Dər wa tsi ta ndusadaghata ta vata kaghuni, ka dzata kuni, » kaʼa.

⁹ Ka magatá maliha ta ghəŋa gwal vulu dərmək manda ya mnanaf Yəhuyada, mnda dra skwi ŋa Lazglafta ta həŋ. Dər wati ma həŋ ta lagha nda mnduha taŋ, gwal dzaʼa sliʼafta ma slna baɗ fitika Sabat, nda gwal dzaʼa zlraftá slna baɗ tsa fitik ya, ka lagha həŋ demdem da Yəhuyada mnda dra skwi ŋa Lazglafta.

¹⁰ Ka hlaftá mnda dra skwi ŋa Lazglafta ta gupaha nda ghwadziha si ŋa mgham Dawuda, si pgha lu ma həga Yawe, ka vlaŋtá maliha ta ghəŋa gwal vulu dərmək dərmək (100).

¹¹ Ka pghatá gwal ngha həga ta vgha nda ŋaŋa ta huzla vulu ma dzvu, ka wamtá mgham, ka nzatá ndər ta kəma gwir nda həga Lazglafta, daga nda ga zeghwi dikw nda ga zlaɓa tsa həga ya.

¹² Ka klagaptá Yəhuyada ta zwaŋa mgham, ka wanamtá zlembetsi ma ghəŋ, ka vlaŋtá ɗelewera dzratá wi. Ka famtá həŋ ka mgham, ka pghanaghatá həŋ ta rɗi. Ka həŋ nda dza dzvu nda dza dzvu mantsa: « Ta mblam ka hafa mgham! » ka həŋ.

¹³ Snaŋta Ghataliya ta hlawa gwal ngha həga, nda ŋa mnduha, ka lagha tsi da taba mnduha ma həga Yawe.

¹⁴ Ta nghə tsi ná, wya mgham ta sladu ta vata guguɗi ta tva lami da həga manda ya snu lu ta magay ta dzidzí. Ta sladu maliha gwal vulu, nda gwal vya talakwa ta vata mgham. Ta rfu inda mnduha tsa haɗik ya ka vya talakwa. Ka kuhwiŋtá Ghataliya ta lguta ni, ka wahata, kaʼa mantsa: « A dzratá wa ghuni ya! A dzratá wa ghuni ya! » kaʼa.

¹⁵ Ka mnanatá Yəhuyada ta gwaɗa ŋa maliha ta ghəŋa gwal vulu dərmək dərmək (100), kaʼa nda həŋ mantsa: « Ksidiŋwa ksa mataba mnduha, ka lab la mndu mista ni katsi, ka dzata kuni nda kafay, » kaʼa. Ka pyaftá mnda dra skwi ŋa Lazglafta ta dzata ma həga Yawe.

¹⁶ Ka ksaftá lu ka mbraku, ka klaghata da həga gá mgham nda ta tva lama plisha. Hada, ka dzatá həŋ.

Payafta Yəhuyada ta nzaku

¹⁷ Ka dzranaftá Yəhuyada ta wi ta Yawe, nda mgham, nda mnduha ŋa nzakwa taŋ ka mnduha Yawe. Dzranafha guli ta wi ta mgham nda mnduha.

¹⁸ Ka laghu inda mnduha ta tsa haɗik ya da vla həga Baghal. Ka dzaɓiŋtá həŋ, ka tasiŋtá həŋ tesneʼ ta gwirha ni, nda fwatuha ni dgum dguma. Ka dzatá həŋ ta kəma tsa gwirha ya ta Mataŋ, mnda dra skwi ŋa Baghal. Ka pghatá Yəhuyada, mnda dra skwi ŋa Lazglafta ta gwal nghapta ka həga Yawe.

¹⁹ Ka hlaftá tsi ta maliha ta ghəŋa bakwa gwal vulu dərmək dərmək (100), nda la Kari, nda gwal ta ngha həga mgham, nda inda mnduha ta tsa haɗik ya tani. Ka klagatá həŋ ta mgham ma həga Yawe, ka ɓhadaghatá həŋ da həga gá mgham nda ta wa tgha gwal ta nghapta. Ka nzaftá Yuʼas ta dughurukwa gá mgham.

²⁰ Ka rfu inda mnduha tsa haɗik ya ta rfu, ka nzatá vli leɓtekw ma luwa, tahula dzatá Ghataliya nda kafay ma həga gá mgham.