2Mgh 1 - Hdi

Dvanaghata Iliya ta mgham Ahaziya

¹ Tahula mtatá mgham Ahav, ka ganavatá la Muwav ta sidi ta la Israʼila.

² Ma sana fitik, ka dɗagata mgham Ahaziya ta dədəmatá ghəŋa həga ni ma Samari, ka balutá tsi katakata. Ka ghunaftá tsi ta gwal ghunay, kaʼa nda həŋ mantsa: « Lawa kwaráhaɗipta da Baghal Zəbuv, lazglafta la Ghekruŋ, ŋa snaŋta ka dzaʼa nza nza yu nda hafu ma na balakwa ɗa na tsi ka ki tsi, » kaʼa.

³ Ama ka duhwala Yawe nda Iliya mnda la Tisbe mantsa: « Sliʼaf sliʼa ka ŋla ka da guyaku nda gwal ghunay mghama Samari, ka mnanata ka ta həŋ: “Haɗ Lazglafta ma Israʼila kəl kuni ka dzaʼa da kwarahay da Baghal Zəbuv, lazglafta la Ghekruŋ wu rki na? ka ka.

⁴ Dabga tsaya, wya ka Yawe mnata nda mghama ghuni: Haɗ ka dzaʼa saha ta ghəzləŋ tida ka wu, dzaʼa mtu mta ka,” » kaʼa. Ka sliʼaftá Iliya ka laghwi.

⁵ Ka vradaghatá gwal ghunay da mgham, kaʼa ɗawaŋta da həŋ mantsa: « Kabgawu kəl kuni ka gi vragaghuta na? » kaʼa.

⁶ Ka həŋ nda tsi mantsa: « Sana mndu ta lafi da guyata nda aŋni, kaʼa nda aŋni na: “Lawa la, ka vra kuni slanaghatá tsa mgham ta ghunaftá kaghuni ya, ka kuni nda tsi na: Wya ka Yawe mnata: Haɗ Lazglafta ma Israʼila kəl ka ka ghuna mndu ɗaway da Baghal Zəbuv, lazglafta la Ghekruŋ wu rki na? Dabga tsaya, haɗ ka dzaʼa saha ta tsa ghəzləŋ tida ka ya wu, dzaʼa mtu mta ka” kaʼa, » ka həŋ.

⁷ Ka mgham ɗawaŋta da həŋ mantsa: « Kinawu tsata tsa mndu ta lafi guyata nda kaghuni ta mnaghunatá tsa gwaɗaha ya na? » kaʼa.

⁸ Ka həŋ nda tsi mantsa: « Sana mndu ya nda gatá lguta swidi ta vgha ni, nda ɓanava huta mista ni, » ka həŋ. Ka mgham tama mantsa: « Iliya mnda la Tisbe ya! » kaʼa.

Kumay mgham ta ksaftá Iliya

⁹ Ka ghunaftá mgham da Iliya ta mali ta ghəŋa sludziha hutaf mbsak, nda mnduha ni hutaf mbsak. Ka laf tsa mala sludziha ya da Iliya ta nzaku ta wa lilwa ta ghwá. Kaʼa nda tsi mantsa: « Mnda Lazglafta, “Sa sa!” ka mgham nda kagha, » kaʼa.

¹⁰ Ka Iliya zlghanaftá wi ta tsa mala sludziha ya mantsa: « Ka mnda Lazglafta yu katsi ná, ka sa sa vu ta luwa ka zuta tsi ta kagha nda na mnduha gha hutaf mbsak na tani, » kaʼa. Ka saha vu ta luwa zuta, nda tsa mnduha ni hutaf mbsak ya tani.

¹¹ Ka ghunəglaftá mgham ta sana mala sludziha hutaf mbsak, nda mnduha ni hutaf mbsak guli. Ka tsa mala sludziha ya nda Iliya mantsa: « Mnda Lazglafta, wya ka mgham mnata: “Ka sa sa tsi misimmisim!” kaʼa, » kaʼa.

¹² Ka Iliya zlghanaftá wi ta həŋ guli mantsa: « Ka mnda Lazglafta yu katsi ná, ka sa sa vu ta luwa ka zuta tsi ta kagha, nda na mnduha gha hutaf mbsak na tani, » kaʼa. Ka saha vu ta luwa zuta, nda tsa mnduha ni hutaf mbsak ya tani.

¹³ Ka ghunəglaftá mgham ta mahkəna mala sludziha hutaf mbsak, nda mnduha ni hutaf mbsak kay guli. Ka laf tsa mahkəna mali ya, ka tsəlɓatá tsi ta kəma Iliya, ka ɗawaŋtá zɗakatahuɗi da tsi, kaʼa mantsa: « Mnda Lazglafta, wya dzvu, zɗaŋnaŋ zɗa ta huɗi ka nzata ŋni nda hafu, iʼi nda na mnduha hutaf mbsak, ka kwalvaha gha na!

¹⁴ Sa sa vu ta luwa ka zutá tsa maliha his taŋtaŋ, nda mnduha taŋ hutaf mbsak hutaf mbsak ya tani. Ama ndanana, zɗaɗiŋ zɗa ta huɗi ka nzata yu nda hafu! » kaʼa.

¹⁵ Ka duhwala Yawe nda Iliya mantsa: « La la kawadaga nda tsi, ma zləŋaŋ ka! » kaʼa. Ka sliʼaftá Iliya ka laha kawadaga nda tsa mala sludziha ya da mgham.

¹⁶ Ka Iliya nda mgham mantsa: « Wya ka Yawe mnata: Dabga vəl ghunafta gha ta gwal ghunay da ɗaway da Baghal Zəbuv, lazglafta la Ghekruŋ, manda skwi haɗ Lazglafta ma Israʼila, Lazglafta ya dzaʼa laviŋta lu ta ɗawa gwaɗa da tsi ya wu ná, haɗ ka dzaʼa saha ta ghəzləŋ ya laf ka tida wu, dzaʼa mtu mta ka, » kaʼa nda tsi.

¹⁷ Ka mtutá Ahaziya taɓta gwaɗa Yawe ta mnata nda ma wa Iliya. Haɗ zwaŋa ni wu, ka nzatá zwaŋama ni Yuram ka mgham ma vla ni. Magu maga manda tsaya ta mahisa vakwa Yəhuram, zwaŋa Yəhusafat ta ga mgham ta ghəŋa la Yuda.

¹⁸ Pɗakwa slnaha Ahaziya, nda ya hɗam tsi ná, vivindam vivinda lu ma ɗelewera vinda slnaha mghamha la Israʼila.