1Sam 9 - Hdi

Guyakwa i Sawulu nda Samuyel

¹ Ta kwakwara la Biŋyamiŋ, mamu sana mndu ka bikwira vulu ta hgə lu ka Kis, zwaŋa Aviʼel, zigha Tsərur. Tsərur guli ná, zwaŋa Bekurat zigha Afiyah ma mndəra la Biŋyamiŋ.

² Mamu zwaŋa Kis ta hgə lu ka Sawulu, ɗina tsa duhwal ya. Haɗ mndu dər turtuk ma Israʼila taɓta tsatsi ɗinakwa ni wa. Slru slra tsatsi ta ghəŋa inda mndu.

³ Ma sana fitik, ka zwaɗutá kəɗihha Kis, da ni ma Sawulu. Ka Kis nda zwaŋa ni Sawulu mantsa: « Kdəkkdək, la kawadaga nda kwalva turtuk, da zba tsa kəɗihha ya, » kaʼa.

⁴ Ka ranaftá tsi ta inda vli ta ghwá la Ifrayim, nda kwakwara Salisa, slanagha a ta həŋ wa. Ka ranaftá həŋ ta haɗika Saghalim, lay ngha a həŋ wa. Ka ranaftá həŋ ta haɗika la Biŋyamiŋ, slanagha a həŋ wa.

⁵ Manda ɓhadaghatá taŋ ta haɗika Tsuf, ka Sawulu nda tsa kwalva mista ni ya mantsa: « Vra u vra dzagha u. Ka mantsa a tsi wu, ndangəlta a da ɗa ta kəɗihha wu, uʼu dzaʼa ndan tsi, » kaʼa.

⁶ Ka tsa kwalva ya nda tsi mantsa: « Mamu sana mnda Lazglafta ma na luwa na! Mndu kulaŋ lu ya. Skwi ta mnata tsi ná, haɗ ta dɗaku ta haɗik wa. Mbaɗa da tsi, ka waya kəʼa dzaʼa mnuʼuwa mna ta tvi ŋa ksay u, » kaʼa.

⁷ Ka Sawulu nda tsa kwalva ni ya mantsa: « Ka ta dzaʼa u, nahgani dzaʼa klədanaghata u ta mnda Lazglafta na? Ta haɗ skwa zay ma zliba u wu, haɗ sana skwi da uʼu guli ŋa mbəhata wu, nahgani da uʼu? » kaʼa.

⁸ Ka tsa kwalva ya zlghəglanaftá wi ta Sawulu mantsa: « Mamu tsedi kiʼa ta vgha ɗa, tsaya dzaʼa vlaŋta yu ta mnda Lazglafta, ŋa mnaʼuwata ni ta tvi ŋa ksay u, » kaʼa.

⁹ Si ghalya, da la Israʼila ná, ka ta dzaʼa mndu ta ɗawaŋtá skwi da Lazglafta na: « Sawa ka dzaʼa mu da slayaŋ, » ka lu si ta mnay. Na anabi ta hgə lu gitana ná, slayaŋ si ta hga lu ghalya.

¹⁰ Ka Sawulu nda kwalva ni mantsa: « Zɗa tsa gwaɗa gha ya, mbaɗa, » kaʼa. Ka laghwi həŋ da luwa mida tsa mnda Lazglafta ya.

¹¹ Ta ŋlə həŋ ta vli ŋa dzaʼa da tsa luwa ya, ka guyatá həŋ nda kuʼaha ta sliʼagata da ta imi, ka ɗawaŋtá həŋ da həŋ: « Hadna slayaŋ ya ra? » ka həŋ.

¹² Ka həŋ zlghanaftá wi ta həŋ mantsa: « Aŋi! Tar ta kəma gha. La misimmisim, sagha gita da luwa, kabga mamu pla ghəŋ baŋluwa gita ta vli tskala.

¹³ Na gi ɓhadamta ghuni da luwa ya ná, dzaʼa slay kuni ma kɗaku tsi da ŋlaghata ta vli tskala da za skwa zay. Nziya nza tsi ná, haɗ mnduha dzaʼa zutá skwa zay ta kul lagha tsatsi wu, kabga tsatsi dzaʼa ɗawa tfa wi ta ghəŋa tsa pla ghəŋ ya. Tahula tsa, ŋa zay gwal mbala lu ta skwa zay. Lawa misimmisim, kabga dzaʼa slay kuni, » ka həŋ.

¹⁴ Ka laf həŋ tama da tsa luwa ya, ta lam həŋ da luwa, ta sab Samuyel ta kəma taŋ ŋa dzaʼa ta tsa vli tskala ya.

¹⁵ Tsaw ma kɗaku Sawulu ka ɓhadaghata ya, snanam sna Yawe ta Samuyel daga ta pɗakwa fitik turtuk kazlay:

¹⁶ « Mahtsim ta na luwa ná, dzaʼa ghundaghagha ghuna yu ta sana mnda la Biŋyamiŋ, ka famta ka nda ma pghanaghatá rɗi ŋa nzakwa ni ka mali ta ghəŋa mnduha ɗa la Israʼila. Dzaʼa mbanaf mba ta mnduha ɗa ma dzva la Filisti, kabga nda ngha yu ta ksakwa taŋ ka hiɗahiɗa, ɓhiɗagha ɓha waha taŋ, » kaʼa.

¹⁷ Manda nghaŋta Samuyel ta Sawulu, ka Yawe nda tsi mantsa: « Wya tsa mndu mna gha yu ya kay: Tsatsi dzaʼa ga mgham ta ghəŋa mnduha ɗa, » kaʼa.

¹⁸ Ka gavadaghatá Sawulu ta vata Samuyel ta wi tgha luwa, ka ɗawaŋtá tsi. Kaʼa mantsa: « Kdəkkdək, mariha mara ka ga həga slayaŋ ya, » kaʼa.

¹⁹ Ka Samuyel nda Sawulu mantsa: « Iʼi tsa slayaŋ ya, ŋla ta kəma ɗa ta vli tskala. Kawadaga nda iʼi dzaʼa za kuni ta skwa zay gita. Ga sərɗək mahtsim, zlghaghafər yu ta wa skwi ta ndan ka ya, dzaʼa zlighista yu.

²⁰ Tsa kəɗihha gha ta zwaɗuta mahkəna fitik na ya ná, ma ndangəl ka, kabga slaf sla lu ta həŋ. Inda skwiha ɗina ɗina ma Israʼila ní, ŋa wa payanata lu na? Ŋa gha nda inda la ga da gha a wu ra? » kaʼa.

²¹ Ka Sawulu mantsa: « Iʼi ná, mnda la Biŋyamiŋ yu, mndəra mndu kwitikw mataba mndəra la Israʼila. Aŋni ta uʼa ŋni a mala htaku mataba gwal ma mndəra la Biŋyamiŋ wu ra? Kabgawu ta kəl ka ka mana na gwaɗaha na ŋa ɗa katək na? » kaʼa.

²² Ka hlaftá Samuyel ta i Sawulu nda kwalva ni, ka hladamtá həŋ da gidzagidza, ka vlaŋtá həŋ ta vla nzaku nda sgit kawadaga nda hagatá mnduha ta maga hkən mbsak hada.

²³ Ka Samuyel nda mnda rmba mantsa: « Klagap tsa skwa zay mna gha yu kazlay, ka faghuta ka, kəʼa ya kay, » kaʼa.

²⁴ Ka klaftá tsa mnda rmba ya ta fay nda sluʼiha ta wafta, ka fata ta kəma Sawulu. Ka Samuyel mantsa: « Wya tsi ta kəma gha na mayak faghu lu ŋa gha. Kla ka za ka, kabga ŋa gha faghuta lu ŋa tsəna fitik na, daga ta hagaktá yu ta mnduha, » kaʼa. Ka zutá Sawulu baɗ tsa fitik ya kawadaga nda Samuyel.

²⁵ Ka saha həŋ ta tsa vli tskala ya ka laghwi da luwa. Ka ghu Samuyel ta yiva kawadaga nda Sawulu ta dədəmatá ghəŋa həga.

Vlaŋta Samuyel ta ga mgham ta Sawulu

²⁶ Ka tsavaftá həŋ ta tsughbura sərɗək. Watata vli, ka hgaŋtá Samuyel ta Sawulu ta dədəmatá ghəŋa həga. Kaʼa nda tsi mantsa: « Sliʼaf sliʼa gha ka pghadaghata yu, » kaʼa. Ka sliʼaftá Sawulu, ka sab həŋ his his, nda Samuyel nda tsatsi.

²⁷ Ta laha həŋ ta kuraghwa tsa luwa ya, ka Samuyel nda Sawulu mantsa: « Mnana mna ta kwalva gha ka laba tsi ta kəma, ka sladava kagha ka snaghamta yu ta gwaɗa Lazglafta, » ka Samuyel. Ka lab tsa kwalva ya ta kəma.