1Sam 8 - Hdi

Ɗaway la Israʼila ta mgham

¹ Manda haluta Samuyel, ka pghatá tsi ta zwana ni ŋa tsa guma ma Israʼila.

² Yuʼel hga zumala ni, Aviya hga mahis. Hahəŋ gwal ta tsa guma ma Bəʼerseva.

³ Ama ksaf a tsa zwana ni ya ta saɗa ni wa. Ka tɗaghatá tsedi ta həŋ, ka tsaʼu həŋ ta sməɗha, ka mbəɗiŋtá həŋ ta kahwathwata ma guma.

⁴ Ka tskavatá inda galata mnduha la Israʼila, ka lagha slanaghatá Samuyel ma Rama.

⁵ Ka həŋ nda tsi mantsa: « Wana nda hala ka, haɗ zwana gha ta ksa saɗa gha wa. Ndanana, zbaf zba ta mgham dzaʼa tsaŋnatá guma, manda ŋa inda sanlaha ma mndəra mnduha, » ka həŋ.

⁶ Zɗəgana a tsa mnay taŋ kazlay na: « Vlaŋna vla ta mgham ŋa tsaŋnatá guma, » kəʼa ya ta Samuyel wa. Ka ndəɓu Samuyel ta dzvu da Yawe.

⁷ Ka Yawe nda Samuyel mantsa: « Snana sna ta həŋ, ka maga ka ta inda skwi dzaʼa mnaghata həŋ. Kagha a vziŋ həŋ wu, iʼi ya. Va a həŋ ta gay ɗa ta mgham ta ghəŋa taŋ wa.

⁸ Daga ma fitika hlagapta ɗa ta həŋ ma Masar ha gita ná, ta zliha zla həŋ ka laghwi da tsəlɓu ŋa sanlaha ma lazglaftaha. Tsa skwi mag həŋ ŋa ɗa mantsa ya na ta mag həŋ ŋa gha ndanana guli.

⁹ Ndana tama, snana sna ta həŋ. Ama ka snanamta ka ɗina ta həŋ. Mnana mna ta həŋ ta skwiha ta raŋtá tsa mgham dzaʼa ga mgham ta ghəŋa taŋ ya, » kaʼa.

Skwiha ta raŋta mgham

¹⁰ Ka mnanatá Samuyel ta inda tsa gwaɗa Yawe ya ta tsa mnduha ta ɗawa mgham ya.

¹¹ Kaʼa mantsa: « Wya skwiha ta raŋtá tsa mgham dzaʼa ga mgham ta ghəŋa kaghuni ya: Dzaʼa hlay mataba zwana ghuni ta sludziha ŋa maga slna nda mwataha plisa ni, nda gwal ŋa ŋla plisha ni, ka ŋa hwaya ta kəma plisa ni a tsi.

¹² Dzaʼa hlay ta həŋ ŋa nzakwa taŋ ka maliha ta ghəŋa sludziha dəmbuʼ, ka maliha ta ghəŋa sludziha hutaf mbsak. Dzaʼa hlay ta həŋ ŋa hva vwahha ni, ŋa tska skwi ta vwahha ni, ka ŋa slara huzla vulu ni, nda huzla mwata plisha ni a tsi.

¹³ Dzaʼa hlay ta kwagha ghuni ŋa danatá urdiha, ka maga slna rmba, nda slna ma uvun.

¹⁴ Dzaʼa hlaghu hla ta ya ɗina ɗina ma vwahha ghuni, nda inabiha ghuni, nda zaytunha ghuni, ka valaŋtá kwalvaha ni.

¹⁵ Dzaʼa hlay ta zaka nimaya ghuni, nda ŋa inabiha ghuni, ŋa valaŋtá maliha ta maganatá slna nda kwalvaha ni.

¹⁶ Dzaʼa hlay ta kwalvaha ghuni, nda kurɗuha ghuni, nda ya ɗina ɗina mataba slaha ghuni, nda kəɗihha ghuni, ŋa hlay ni ta həŋ ŋa ksanatá slnaha ni.

¹⁷ Dzaʼa hlay ta zaka bra rini ghuni. Kaghuni guli ŋa nzakwa ghuni ka vuʼa ni.

¹⁸ Ma tsa fitik ya, dzaʼa wahay kuni ta wahu dabga tsa mgham zbap kaghuni ya, ama ma tsa fitik ya snaghunata a Yawe wu! » kaʼa.

¹⁹ Ka kwalaghutá həŋ ta sna gwaɗa Samuyel. « Kaya! Mgham ta kum aŋni,

²⁰ ŋa nzakwa aŋni guli, manda sanlaha ma mndəra mnduha! Dzaʼa tsaŋna tsa tsa mghama ŋni ya ta guma. Tsatsi dzaʼa klaŋnatá kəma ma dzaʼa da vulu, ŋa vulay ni ta vulu kawadaga nda aŋni, » ka həŋ.

²¹ Snamta Samuyel ta inda tsa gwaɗa mnduha ya, ka snanamtá tsi ta Yawe.

²² Ka Yawe nda Samuyel mantsa: « Snana sna ta gwaɗa taŋ, ka fanamta ka ta mgham ta həŋ, » kaʼa. Ka Samuyel nda la Israʼila mantsa: « Ka vra inda mndu da luwa ni, » kaʼa.